Read Doyayo 1 KƆRƐŊGTU 9 Bible Online

1 KƆRƐŊGTU 9 - Doyayo bible

1 KƆRƐŊGTU 9

¹Nɛ zul mi gi aakil du ma mi? Mi taa Yeesu tɔmsɔya ya? Mí gbɛ̄n Waar wɛ Yeesu gɛ ya? Nɛ taa woos minɛ a Waar Yeesu woosɔ bɔ gedu ya?

²An mi wɛ̄ɛ̄s dood zaadɛ Yeesu tɔmsɔya hɛw gɛ, hi rɔbo, mi wɛɛs nɛɛ ɔnɛ Yeesu tɔmsɔya: nɛ gi hinyɔ gɔ hi mɛɛnin tɔmsya woos mi bɔ gii ma anyɔ nɛ ɔks gbunu hi Waar Yeesu a dɔgl yɔ mi dɔgsin dɔŋgɔ ge.

³Lɛlyɔ gɔ mi dɔks zul mi hinɛ hi wɔ hi gim hingɛ̧ɛ̧nik gii bɔ.

⁴Nɛ rii an wi dag leesɛ hi hinyɔ̧ki a woos mi dɔŋg ma mi?

⁵Wi taan gbɔnɔ an wi lootin hi nis za Yeesu fɔkya an wi kamzige a rɔ̀bslɛl yɔ wi rek ge, an Yeesu tɔmsɔya zaadɛ wɔ hi yɛ̧ɛ̧dɛ ɔ̧ɔ̧ hi gɔk ya? Nɛ Piyɛr hɛw gi gɔk anbɔ ma mi?

⁶Barnabas hi mii kpɔd wi taan gbɔnɔ gii zaŋ an wi ɔɔ zul wi lenikɔ ger ya? Nɛ zaadɛ wɔrɔ sɛw hi taa zulya̧ lenuko, wii kpɔd wi zul wi lenik ma mi?

⁷Nɛ lag a bɔ laaya ɔ̧ɔ̧ gɔ gi lenik zulɔ a woos du? Bɔ rɛɛ tɛ̧ɛ̧ humlya kittɔnɔ gi wɛɛ gi le humlɔ bɔ gɛ? Bɔ gi ook naa kitɛ gi yɔ̧ wa̧a̧lya̧ bɔ ɔnɛ gɛ?

⁸Hin wɛrɛ mi dɔk hí fu̧u̧ a doo mɔkil du gɛ. Nɛ Bɛtmaakɔ dɔg hingbun bɔ ma mi.

⁹Ya̧a̧nɛ Muusa maak-dɔglɔ raa a bɔmɔ bib nāa sɔ̄ɔ yɔ gisim tot nuuk ya̧a̧gbarɔ an bɔgi tɔbhinɛ. Bɛt gi mɔɔk an gi dɔks naa wɔ hii hin wɔrɔ ya?

¹⁰Nɛ gi dɔk hin wɔrɔ a wi zulha zaŋ ro! Hɔɔ, hin bɔrɔ hi bi̧i̧ a wi dɔŋgo an za̧a̧nyɔ gi bak baliko yɛgi bal hi mɔkilɔ a gi dagɔ, wɛɛ za̧a̧nyɔ gi nuuk tot be, nùùge hi mɔkilɔ a gi dag gaat bɔ ɔnɛ.

¹¹Nɛ yɔ wi lug Bɛt Mɔkil rɔbsɔ a nɛ teesdu, ri gi ɓaasin an wi ɓɛr waal du rɔbsɔ gii a nɛɛge?

¹²À dood zaadɛ hi dag hin a nɛ zulha, nɛ winɛ bɔ nɛ zulha daar ma mi? Nɛ yɛrɛ an wi gin tɛŋk an wi dag hin a nɛɛge si̧, winɛ wí ɛ̄rin hinza gɛ, ha̧a̧wi an wi ha̧a̧ya̧a̧r a hinyɔ gi gedu sɛw gi daarɔ, hi anyɔ gɔ wi a̧a̧n Kristu Dɔglɔ Rɔb bɔ gbɔnɔ.

¹³Nɛ mɛɛ bɛttɔnɔ a wɔ hi wookwoos a Bɛtmaaksɛŋk ha a Bɛtluk du hi dak leesya̧ a Bɛtmaaksɛŋk bɔ gedu, wɛɛ wɔ hi gi wookwoos a sɛŋk yɔ hi wɔm hage be hi dag maaknamb wɔ hi gaa Bɛt hage ya̧nɛ be.

¹⁴Gbunɔ gii hɛw Waar Yeesu gi raa a wɔ hi dɔksig dood Dɔgl Rɔb bɔ, dood wɔ hi gaahi hin an hi len zulya̧ a Dɔgl Rɔb bɔ hi dɔksihi gi dɔŋgo.

¹⁵Yɛrɛ mii mi wōō hinza gbun hi gbɔnɔ anbɔ gɛ, wɛɛ mí bı̧̄ı̧̄ an nɛ gaam hinza yɔ rii gɛ. Ha̧a̧m wɔrk mi gii gi daarɔ, hi anyɔ doo za gɔ gi ha̧tsim hin bɔ lab gbɔlumsɔ bɔ mi gis zul mi gɔko.

¹⁶An mi gis dood Bɛt Dɔgl Rɔb bɔ dɔk si̧, mi dāg gbɔnɔ an mi tɔɔs zul mi gɛ. Ya̧a̧nɛ gi an mi dɔg Dɔgl Rɔb bɔ. À mi dɔg gɛ, yɔ mi dag ya̧a̧rhanto!

¹⁷Gid mii hi zul mi mii sɛ̧ɛ̧ Bɛt dɔgldɔk woos bɔ an mi woo, yɔ rii an mi dag dɔɔrɔɔs mi. Yɛrɛ minɛ mi mɔ̄k nɛ a mi yɛɛl woosɔ bɔ gɛ, Bɛt gii raasimi, gii gaam woos mi an mi woosige.

¹⁸A hin bɔrɔ gedu sɛw, dɔɔrɔɔs mi gɛ nɔni? Nɛ dɔɔrɔɔs mi gɛ gɔ mi dɔk Dɔgl Rɔb bɔ, mí ɛ̄r hinyɔ Bɛt gaam gbɔnɔ an mi ɛr sɛw a Dɔgl Rɔb woos bɔ mi wook dɔŋgɔ ge gɛ, an mi gaa dood Dɔgl Rɔb bɔ ya̧a̧rtɔs.

¹⁹Anyɔ mi gi a dood gbaŋg sɛw an dooyɔ gin zulɔ aakil du, mii wɛɛs dood sɛw woosyaya̧ an mi dagihi hi kitɔ gi daarɔ.

²⁰Yɔ mi ɗɔɔtig hi Yahuduya wɔ, mi ɗɔɔt an Yahu-duya an mi kamzihi a Yeesu Kristu ge. An Muusa maakɔ taan tɛŋk mi zulha gɛ si̧, yɔ mi ɗɔɔtig hi Muusa maakfɔk-yaadɛ ɔ̧ɔ̧, mi gi ɗɔɔtig an hiya - an mi kamzihi a Yeesu Kristu ge.

²¹Yɔ mi ɗɔɔtig hi dood wɔ hi mɛɛ Muusa maakdɔglɔ gɛ, mi ɗɔɔt an hiya, an mi kamzihi a Yeesu Kristu ge. Hɔnɛ an gɔ mi bis Bɛt maakdɔglɔ bɔ, mí bis gɛ, mi fɔk Kristu maakdɔglɔ bɔ giya.

²²Yɔ mi waak hi dood wɔ kpoosya̧ hɔ̧n a ɗɔbsig du anyɔ hi mɛ̄ɛ̄ zulya̧ bɔ aakil dɔglɔ bɛttɔnɔ gɛ, mi wɛɛ hɔntili an hiya, an mi kamzihi a Yeesu Kristu ge. Mi wɛɛn zul mi hin sɛw a dood sɛw hi, an ri nɛ ma si̧ mi za̧a̧s dood zaadɛ za̧a̧sɔ.

²³Mi wook hin sɛw a Dɔgl Rɔb dɔŋgo an mii be, mi dag rɔbsɔ gedu be.

²⁴Nɛ́ mɛ̄ɛ̄ a dood wɔ hi nɔɔk an zaa gi daar naaza gi dag dɔɔrɔɔsɛ hi nɔɔk sɛw gɛ ya? Gɔ anbɔ doo gbun ro gi dag dɔɔrɔɔsɛ. Nɔɔnnɔɔk yɔ gɔ nɛ nɔɔ sɛw an nɛ dag nɔɔkilɗɛɛk nɛ dɔɔrɔɔsɛ.

²⁵Dood nɔɔkilya wɔ ha̧a̧hi nahiza hii daarik sɛw, hi mɔŋk a hinyɔ gi gedu sɛw an muulya̧ gi dag tɛŋko. Hi gɔk anbɔ ro an hi dag waar ums kal yɔ gɔ haŋsɔ, nɛ wɛɛ be, yɛwɛ gɔ an wɛ dag waar ums kal yɔ gɔ haŋs gɛ.

²⁶Miya, mí nɔ̄ɔ̄ nɔɔki tɔs gɛ, mi nɔɔk an mi tuur a da̧a̧klɛl gɔ da̧a̧ dige, mí zɔ̧ɔ̧ naan mi zɛk du gɛ, mi zɔ̧ɔ̧k rɔbtɔnɔ lɛlɔge an mi ɗɛɛ Saydanu za̧a̧n bɔbtin bɔ.

²⁷Mi gi muul mi kaŋkig sa̧a̧ttɔnɔ, mi gig ook hi tɛŋko an bɔ mii yɔ mi dɔks dood zaadɛ Dɔgl Rɔb bɔ Bɛt gi zɛ̧mi mi woo hin-a̧a̧bi gi wɛɛnim kuudu.