Read Doyayo 2 KƆRƐŊGTU 12 Bible Online

2 KƆRƐŊGTU 12 - Doyayo bible

2 KƆRƐŊGTU 12

¹Gi ɔnɛ an mi ɗɔbs zul mi ɗɔbsɔ - an hinɔ gɔ ɗāās hinza nɛ gɛ hɛw. Mí zaa mí boo gɛrs wɔ mi ɗagtinu hi hinwɔ Waar Yeesu zunsimi.

²Mi mɛɛ ɗoo za Kristufɔkya, nɛɛkgbarige gi wɛl kooblɛ daatɔ nasɔ, - pɛɛy rek a bɛtha taasum bɔ ge - kinsa rek hi muulɔ, mi mɛɛ gɛ, kinsa kolɔ gii tuu gi rekɔ, mi mɛɛ gɛ, Bɛt gii mɛɛ kpɔd.

³Mi mɛɛ za̧a̧n bɔrɔ - kinsa gii hi muulɔ, kinsa kolɔ giya, mi mɛɛ gɛ, Bɛt ɔnɛ mɛɛ -

⁴ha̧sa rek a lɛlhɛmnt du a bɛtha, lag dɔgl zaadɛ wɔ hi daar dɔki yɔ Bɛt gāā doo gbɔnɔ an gi boo gɛ.

⁵A za̧a̧n bɔrɔ gi dɔŋgo, mi boo hingbɔlɛ; a zul mi dɔŋg be, mi taa hingbɔlɛ booko, gi taa hɔntil mi wɔ hii gɛ.

⁶À ha̧a̧m nɛ an mi boo hingbɔlɛ a zul mi dɔŋgo, yɔ mi taa yoo, ya̧a̧nɛ mi gi raak rɔbo. Yɛrɛ mi gi mɔŋko an bɔ doo gi mɔk gi daar hinyɔ gi gbɛnik ɓɔryɔ a miige, hi zaabe hinyɔ gi kɛŋk a miige.

⁷Wɛɛ an bɔ zul mi gi tɔɔ yɛ̧ltɔnɔ a hinwɔ Bɛt zunsim gbɔlumsya̧ hi dɔŋgo, Bɛt yaasim hinza ya̧a̧rhantya an kobs a muul du. Hinɔ gi an Saydanu walsɛrɔ yɔ gɔ lɛmi an bɔmi tɔɔs zul mi yɛ̧ltɔnɔ.

⁸Gbaŋ taarɛ mi zɔ̧ Waar Yeesu an gi hɛmlin hin bɔrɔ.

⁹Gii wɛɛ ta̧a̧zɔ: a gɛmsil be riimɔ anbɔ a hinyɔ ha̧a̧mɔ gedu sɛw. Gɔ mɔ gi hɔntili, tɛŋk be woo gi daarik lɛl a mɔ muul du. Nɛ yɔ anbɔ, mi boo hingbɔlɛ hi hat gi daarɔ a hɔntil mi wɔ hi dɔŋgo, an Kristu tɛŋkɔ gigi hi miya.

¹⁰Ya̧a̧nɛ mi dag hat a hɔntil mi wɔ duge, a niit wɔ gedu, a hinɓaatil wɔ gedu, a ya̧a̧kɛtil wɔ gedu, a zɛksil wɔ gedu, a Kristu dɔŋgo. Gɔ mi gi hɔntil du ro mi gin tɛŋko.

¹¹Mi wɛɛ an yooyɔ. Nɛɛ fɛ̧ɛ̧mi an mi wɛɛ anbɔ. Yɔ anbɔ, ginɛ an nɛɛ nɛ dɔg nɛ dɔgl mi anyɔ bɛrɔ. Anyɔ mi tuur nɛ hinza gii gɛ si̧, tɔmsya gbɔlɛ wɔ hi dāārim a hinza du gɛ.

¹²Tɔmsya rɔb woos mi bɔ wooy ɔnɛ a nɛ teesdu hi a hinmɔŋk yɔ mi mɔm gedu sɛw, hi gɛrs hin-tuusigyaadɛ, woos gɛrsyaadɛ hi tɛŋk gɛrsya zaadɛyɔ.

¹³Yeesu fɔkya wɔ a lɛlzaadɛ wɔ gedu hi dag hinza hi daar nɛɛ ya, hinɔ gi taa a mi ɗɔnɛ an hinɗɔmn gɛ gii gɛ! Nɛ bitsinmi a̧a̧b mi bɔrɔ dɔglɔ!

¹⁴Yɛrɛ ɓɔryɔ dɔɔ taasum gɛrɛ, mi sɛ̧ɛ̧b rek a nɛ lɛlɛ, wɛɛ taa an mi ɗɔnɛ an mi loo hinyɔ nɛ ginɔ. Ya̧a̧nɛ, mi taa rɔɔs nɛ ɓɛɛko, mi ɓɛɛk nɛya. Rii an ya̧a̧mwaat hi len baaya̧ hi naaya̧ gɛ, gi an baa hi naa hii hi len ya̧a̧mwaato.

¹⁵Minɛ mi gaa hinyɔ mi ginɔ hi hat gbɔɔltɔnɔ, mi gaa zul mi a nɛ kol dɔŋgo. Nɛ hin bɔ lab gi gɔk an gi ha̧a̧m a nɛ muul gi daarɔ, gi an hat nɛɛn ɔnɛ gi ɓɛ̧ɛ̧r mi muul ya?

¹⁶Zaabe, an mi ɗɔnɛ gɛ si̧, nɛ raako: a yɛrɛ anyɔ gi doolekya, wa̧a̧zɛ hi kɛ̧ɛ̧tigyɔ.

¹⁷Doo za a wɔ mi yaasinɛhi hi teesdu lòò hinza nɛ naan du gi kamsimi mi le ya?

¹⁸Mi zɔ̧b Titus rekɔ, mi yaaz yɛ̧ɛ̧ za Yeesu fɔkya bɔ hi giya, Titus lenle ya? Wí ɛ̄mb a Bɛt Mɔkil gbun bɔ gedu a gbɔnɔ gbun bɔ gedu gɛ ya?

¹⁹A hinwɔ wi bi̧i̧sin duhɛ gedu sɛw, kinsa nɛ waak mɔkig hinza nɛ kpoos du a wi gaasig zul wi a nɛ dɔŋdi. Taa anbɔ! Wi book hin a Bɛt muutdu a ɔksig wi bɔ gedu hi Kristu; saam mi rɔbɛ wɛ, wi gi dɔk hin bɔ lab sɛw an nɛ tɔɔ du hi ɗɔbsig nɛ.

²⁰Ya̧a̧nɛ hoob gi gim ha̧a̧ko; mi mɔk a kinsa gɔ mi tuurɔ mi zɛ̧nɛ anyɔ ha̧a̧m gɛ, wɛɛ nɛɛ be nɛ zɛ̧mi anyɔ hā̧ā̧ nɛɛ gɛ be. Hoob gim ha̧a̧k an bɔmi zɛm gbaato, kublɛ, nɔɔtigi, gabsɛ, niito, ya̧a̧ha̧a̧lɛ, zultɔɔsigi, zɛksili hi giro a nɛ tees du.

²¹Hoob gim ha̧a̧k an gɔ mi zaa ɓɛ, bɔ Bɛt gi wɛɛnim wansɛ a nɛ dɔŋgo, wɛɛ an bɔmi kaa a dood wɔ hi gɔ hinha̧a̧l amntɔnɔ hi zulha. Hí wɛ̄ɛ̄ hi zɛmr kpoosya̧ an hi tuu a hi libt du gɛ, zaabe a hi mans du gɛ, hi a hi zɛlk yɔ hi ɓi̧i̧l nɛ muulya̧ gedu gɛ.