Read Doyayo 2 KƆRƐŊGTU 3 Bible Online

2 KƆRƐŊGTU 3 - Doyayo bible

2 KƆRƐŊGTU 3

¹Wii hi zul wi wi wɛɛ wi yɛɛlik zul wi ɗɔbsigi ya? Zaabe, ha̧a̧wi ɗɛɛrwol za doobaanikya kaŋk naan du anyɔ dood zaadɛ hi gɔko an wi tuurin dood hi hi ta̧a̧w du ya? Nɛ ha̧a̧w an fɔkya zaadɛ hi bi̧i̧sin dɔgl wi a ɗɛɛrwol du hi giw baanuko an nɛɛ gɔ nɛ zaŋga nɛ ta̧a̧w ger ya? Zaabe, ha̧a̧w an nɛɛ nɛ bi̧i̧s dood zaadɛ an hi ta̧a̧w ya ri?

²Nɛ nɛɛ hi zul nɛ nɛ gi bant wi ɗɛɛrwol bɔ gii ma mi? Nɛ woos rɔb bɔ wi woosinɛ bi̧i̧y a nɛ kpoos du ma mi? Dood sɛw hi ɗɛɛ an hi zaŋga hi mɛɛ hinɔ.

³Nɛ mid ma an Kristu dɔglbi̧i̧k ɔnɛ yɔ Kristu bi̧i̧ge gi yanziw a nɛɛge giya, bi̧i̧n hi hinmɛkya yɔ gɔ hi bi̧i̧nik ɗɛɛrwol du gɛ, bi̧i̧n hi Bɛt za̧a̧til bɔ Mɔkilɔ giya, bı̧̄ı̧̄ a bethɛɛgil ha gɛ, bi̧i̧ a yɔ̧kthɛɛk ha a dood kpoos ha.

⁴Wi ta̧a̧ anbɔ a Bɛt muutdu a Kristu dɔŋgo.

⁵Taa an wii hi zul wi wi rii an wi raa a wi ɗɛɛ an wi tuus hinza yɔ fu̧u̧ a wiige gɛ. Tɛŋk winɛ yɔ gɔ wi ɗɛɛn hinza wookɔ gi fu̧u̧zig a Bɛt ge.

⁶Gaaw tɛŋko an wi wɛɛ ya̧a̧wɔk seg dɔkwoosyaadɛ. Ya̧a̧wɔkɔ taa hi dɔglbi̧i̧ki, gi hi Bɛt Mɔkilyɔ, dɔgl bi̧i̧k gɔ gbɔ̧ɔ̧mɔ, mɔkil ɔnɛ gɔ za̧a̧sɔ ya̧a̧nɛ.

⁷Anyɔ Bɛtmaakdɔgl woosɔ yɔ hi bi̧i̧ hi dɔglɛ a bethɛɛgil ha gi kaŋk a wɔrk du si̧, gi hin gbɔlumsyayɔ, tuurɔ, Israhilaya wɔ hi ɗɛ̄ɛ̄ an hi seelɔl a Muusa muut du gɛ a muutɔ bɔ gbɔlumsɔ gi dɔŋgo anyɔ gɔ gi da̧a̧ nɛ gii si̧.

⁸Nɛ yɔ anbɔ, Bɛt Mɔkil woosɔ gbɔlumsɔ gi daarlɛl gi ginɛ ri be!

⁹À dɔgl matig woosɔ gbɔlumsɔ be giro, rɔbwookwoosɔ gbɔlumsɔ gi daarlɛl gbɔɔltɔnɔ gi ginɛ ri be!

¹⁰Hɔɔ, a dɔgl yɛrɛ gedu, hinyɔ ginɛ gbɔlumsya amntɔnɔ, gbɔlumsɔ bɔ wɛɛ hintɔsi ma a gbɔlums gbɔɔl yɛrɛ daarig ma gi dɔŋgo.

¹¹Yɔ anbɔ, gid hinyɔ gi an gi da̧a̧ gi gbɔlumsya, hinyɔ gi waak faa be gi gbɔlumsya daarlɛl gbɔɔltɔnɔ.

¹²Anyɔ wi dag mɔkil gbaak yɛrɛ wi book hin hi tɛŋk gbɔɔltɔnɔ, hoob hā̧a̧w hinza gɛ.

¹³Wi taa gɔk an Muusa yɔ yaat muutɔ hi gbandili an bɔ Israhilaya wɔ hi gbɛn muutɔ bɔ gbɔlumsɔ gɔ gi da̧a̧ nɛko.

¹⁴An gɔ hi kɛmhinɛ, zulya̧ ɓaaɓa. Ya̧a̧nɛ tuur a ɔ̧tigi zul te, gbandil muutyaatigya bɔ gi waakwa, gɔ hi zaŋgig Bɛt ɗɛɛrwol amnt bɔ, ha̧s gɛ, gɛ gɔ gi ha̧ts za̧a̧nyɔ gɔ gi ɔks gbunu hi Kristu.

¹⁵Hɔɔ, tuur a ɔ̧tigi zulɛ, gɔ hi zaŋgik Muusa maakdɔglɔ a ɗɛɛrwol du, gbandil bɔ gi yaatig kpoosya̧ yaatɔ.

¹⁶Yɔ doo kpoos gɔ zɛmrɔ gi zaa a Waar Yeesu ge, gbandil bɔ gig nɛ yaatig ha̧s gɔ ɓɔrɔ.

¹⁷Waar Yeesu gii gi Mɔkili; wɛɛ lɛlyɔ Waar Yeesu Mɔkilɔ gi ge, zulkɔŋk aakil du gi lɛlɔge be.

¹⁸Wɛɛ sɛw yɔ gbandil bɔ ha̧s a wɛ muutdu gid wɛ gin muut wɛ aakilha, wɛ seek Waar Yeesu gbɔlumsɔ, gii ɔnɛ giwɛ zɛmruko gi wɛɛnik kpoos wɛ gbun bɔ gii an kpoos ɔnɛ a gi gbɔlums du. Yɔ anbɔ, gbɔlumsɔ bɔ tɔɔ a wɛ kpoos du gi rek doosɛ doosɛ. Waar Yeesu Mɔkilɔ woosɔ bɔ wɛ muul gii bɔ.