Read Doyayo 2 KƆRƐŊGTU 6 Bible Online

2 KƆRƐŊGTU 6 - Doyayo bible

2 KƆRƐŊGTU 6

¹Yɔ anbɔ anyɔ wi wook hi Bɛto, wi gin zɔ̧ko a bɔnɛ dag Bɛt gɛmsilɔ ditɔs.

²Bɛt raa be: a gɛmsilgɔk ɔ̧t bɔ gedu be kɛmsumɔ zɔ̧k mɔ, a ɔ̧t yɔ dood gɔ hi za̧a̧k gedu bé ɗaasumɔ. Yɛrɛ ɓɔryɔ gɛmsilgɔk ɔ̧tyɔ, za̧a̧tig-ɔ̧t gi ɓɔri be!

³A hinyɔ gi gedu sɛw wí gbāā dɔɔsiŋklɛl gɛ, an bɔ woos wi bɔ gi wɛɛ ya̧a̧ha̧a̧l book lɛlɛ.

⁴Wi zu̧u̧nik zul wi a hinyɔ gi gedu sɛw an Bɛt woosyaadɛ hi hinmɔŋk gbɔɔltɔnɔ, a ya̧a̧rhant yɔ hi giwi ha̧a̧nik gedu, a hinɓaatil wɔ gedu, a zɛksil wi wɔ gedu,

⁵hi lɛbtig wi wɔ, yaak wi wɔ a luknɔ du, ya̧a̧ɓoolik wɔ, a woos mɔɔtya wɔ gedu, hi kɔmbik-lɔl bɔ, hi a̧a̧kil wɔ,

⁶a gaatig du a Bɛt muutdu, a hinmɛɛk du, a hinmɔŋk du, a rɔbgɔk du, a Bɛt Mɔkil bɔ ɗaakɔ gedu, a hat gaat du,

⁷a hindɔk rɔb a Bɛt tɛŋk bɔ gedu; hi wɔd nɔkgɔ-nikya riitɛ naan du wi woonik hi ɗɔbsig wi an nɔk gɔŋko a naanyɛ̧li, hi Bɛt dɔglɔ an daŋbɛsim a naanrɔbo.

⁸Dood zaadɛ hi giw ɗɔbsugo, dood zaadɛ be hi giw seek an hintɔs; hi book rɔbo wɛɛ zaadɛ be hi book ha̧a̧lɛ a wi zulha. Hi giw seek an ya̧a̧gɔ̧ɔ̧nyaadɛ, wɛɛ wi gi rɔb goko,

⁹hi seewi an doo za mɛ̄ɛ̄wi gɛ, wɛɛ hi mɛɛw rɔbtɔnɔ be; hi seewi an wi wɔrkwɔrɔ, wɛɛ wi gi za̧a̧til be; hi seewi an hi ha̧a̧niwya̧a̧rɛ, wɛɛ hi gbɔ̧wi gɛ be;

¹⁰hi seewi an wi miŋkmimɔ, wɛɛ wi waak hat daki; hi seewi an ya̧a̧ryaadɛ, wɛɛ wi kamsig dood kitɛ rɔɔsɛ; hi seewi an wi taan hinza, wɛɛ wi gin hin sɛw.

¹¹Kɔrɛŋgtuya wɛ, ya̧a̧ wi aas nɛya, kpoos wi kpɛ̧ɛ̧r gbɔɔltɔnɔ a nɛɛge.

¹²Wii wí kpɛ̧ɛ̧sin kpoos wi gɛ, nɛɛ ɔnɛ nɛ kpɛ̧ɛ̧siw kpoos nɛ.

¹³Wɛnzin kpoos nɛ a wii an winɛ bɔ, mi gin book an mi gi waat miin booko - nɛɛ hɛw aasin kpoos nɛ!

¹⁴Bɔnɛ ɔks gbun hi wɔ hi tā̧ā̧ Bɛt ɗɔbsig gɛ. Rɔbgɔki hi ha̧a̧lgɔki hi wook nɔ lɛlgbun nɔ? Zaabe nɔ boolumɔ gi ɔks hi lɛlgaalɛ hi lɛlwil nɔ?

¹⁵Ɔksum nɔni hi nɔni gigi hi Kristu hi loorɛha̧a̧l nɔ? Yeesu ɗɔbsigya gi ɔks gbun ri hi doo yɔ mɛɛ Yeesu gɛ?

¹⁶Ɔksigɔ nɔni gi hi Bɛtluko hi maakwɔd nɔ? Wɛ gi Bɛt Za̧a̧til bɔ luk ɔ̧ɔ̧nɛ anyɔ Bɛt raa: a be waa, be ɛmbɔ a hi tees du; a be wɛɛsihi Bɛtya̧, hii be hi wɛɛsib dood benɛ.

¹⁷Waar Bɛt wɛɛ raa: a nɛ yɔ anbɔ, tuunɛ hi teesdu, hɛɛtinnɛ hi hiya. Bɔnɛ ki̧i̧ hinyɔ ɓi̧i̧lɔ, gɔ gi anbɔ be zenɛ.

¹⁸Be gisin baa nɛ, nɛɛ be nɛ wɛɛsib waat be walɛ hi waat be siŋgdɛ, Waar Bɛt tɛŋkya sɛw gii raa.