Read Doyayo 2 KƆRƐŊGTU 7 Bible Online

2 KƆRƐŊGTU 7 - Doyayo bible

2 KƆRƐŊGTU 7

¹Saammi rɔbɛ wɛ, nɛ anyɔ wɛ dag hin wɛrɛ Bɛt raa a bé woosɛ sɛwi, yɔ anbɔ, yɛwɛ gaas zul wɛ wɛ ha̧s hinyɔ gi ɓi̧i̧lik muul wɛ hi mɔkil wɛ sɛw; an hoob yɔ giwɛ ha̧a̧k Bɛto, yɛwɛ gaas zul wɛ gi da̧a̧.

²Gààwì lɛlza aakil a nɛ kpoos du! Wí gɔs doo za hin-a̧a̧b gɛ, wi gbɔ̄mr doo za gɛ, wi lōō doo za hinɔ hi kɛ̧ɛ̧tig gɛ.

³Mi bōō dɔgl yɛrɛ an mi gbaasin dɔgl gɛ, ya̧a̧nɛ mi raa hin bɔrɔ gi dorɔ a ha̧a̧w a nɛ muul gbɔɔltɔnɔ, ha̧a̧wi an wɛ wɔr lɛlgbunu wɛ za̧a̧ lɛlgbunu.

⁴Mi gbaak kpoos mi gbɔɔltɔnɔ a nɛɛge, mi gaak zul mi gbɔlums gbɔɔltɔnɔ a nɛ dɔŋgo, a ya̧a̧yɔ hi giwi kɛ̧tingo gedu sɛw, mi dag tɛŋk hi hat daarlɛl gbɔɔltɔnɔ.

⁵Ya̧a̧nɛ a ɔ̧tyɔ wi tuur a Makeduniya gedu hɛw, muul wi dāg holum gɛ, zɛksil sɔmsɔm hi zɛwi. A lakdi gbatins hi dood zaadɛ giro, wɛɛ hoob gi a wi kpoos du.

⁶Nɛ Bɛt yɔ gi rɔɔk dood wɔ hi wɛɛnihi wans kpoosya̧, rɔɔ wii gɔ be hi Titus zaakɔ bɔ.

⁷Rɔ̄ɔ̄wi hi Titus zaakɔ bɔ gii kpɔd gɛ, zaaɔ hi Titus hi zulɔ rɔɔkɔ bɔ nɛ rɔɔg be: fɔksim kol yɔ ginɛ kaŋk dɔglɔ a miige hi kaal nɛ wɔ nɛ kaak dɔglɔ a mimnt yɔ nɛ gaam dɔŋgɔ ge, hi tɛŋk yɔ nɛ i̧i̧k dɔglɔ a mi zulɛ; mi wɛɛ mi dag hat gbɔɔltɔnɔ daar doos bɔ be.

⁸Anyɔ kpoos nɛ ɗɔb hi dɔgl yɔ mi bi̧i̧sin gii si̧, mi mɔ̄khin hage gɛ. Wɛɛ mí mɔk hin hage kaasi si̧, ya̧a̧nɛ mi see an dɔgl mi bi̧i̧k bɔ gaan mimnto, wɛɛ nɛ́ mı̄m aŋ gɛ be.

⁹Ɓɔryɔ mi dag hato, taa a kpoos nɛ yɔ ɗɔb gi dɔŋgo, gi anyɔ kpoos nɛ ɗɔk bɔ kamzin a naandɛms du an nɛ zɛmr kpoos nɛ, ya̧a̧nɛ kpoos nɛ ɗɔk bɔ gi anyɔ Bɛt ha̧a̧ge. Yɔ anbɔ, nɛ́ wāks hinza rɔb a wi dɔŋg gɛ. Bɛt woon kpoos nɛ ɗɔ́k bɔ gii hinɛ an bɔnɛ waks hinza rɔb a wi dɔŋgo.

¹⁰Yɔ labɔ, kpoosɗɔk anyɔ ha̧a̧ Bɛt gi tuusig kpoos zɛmrik yɔ gi kaŋk a za̧a̧tig du, wɛɛ taa an hi mɔkhin hage; wɛɛ kpoosɗɔk a waal du be, gi tuusig wɔrko.

¹¹Ya̧a̧nɛ kpoosɗɔk gbuna bɔ gi anyɔ ha̧a̧ Bɛto, tɛŋk-i̧i̧k nɔni gi tuus hinza a nɛ kpoos du gɛ? À zul nɛ bɔ gaasugɔ tɔɔ ri! à nɔɔtig nɛ tɔɔ ri! à hoob nɛ tɔɔ ri! à ha̧a̧tig nɛ tɔɔ ri an nɛ gbɛnimi! à woos nɛ ha̧a̧tig tɔɔ ri! à ya̧a̧rhant gaak nɛ tɔɔ ri! Nɛ zuun hi gbɔnɔ sɛw a muul nɛ gaaga a dɔglɔ gedu.

¹²Nɛ à mi bi̧i̧sin dɔglɛ, mi bı̧̄ı̧̄sin a za̧a̧nyɔ woo hin-a̧a̧b gi dɔŋg gɛ, wɛɛ taa a za̧a̧nyɔ hi gɔsig hin-a̧a̧b gi dɔŋgo, gi an tɛŋk nɛ i̧i̧k bɔ nɛ gɔk a wi zulɛ gi zuuniy a nɛ teesdu a Bɛt muutdu.

¹³Ya̧a̧nɛ wi dag tɛŋk a gedu. A tɛŋk wi dak bɔ gedu, wi gbɛn Titus hatɔ bɔ dagɔ, wɛɛ kpoos wi kpɛ̧ɛ̧ gbɔɔltɔnɔ daarɔ. Ya̧a̧nɛ, Titus mɔkilɔ kus a nɛ dɔŋg nɛ sɛw.

¹⁴Yɔ anbɔ, à mi baan dɔgl nɛ kaasi a gi muutdu, nɛ da nɛ hā̧ā̧nim seem gɛ, gi anyɔ wi waa wi gisin dɔgl book ɔ̧t nuŋg sɛw hi rɔbo. Yɔ anbɔ be, yɔ mi tɔɔs nuŋg nɛ a Titus muutdu be, hinɔ midɔ a gi rɔb hɛw.

¹⁵Gɔ mɔk mɛɛ tɔnkɛŋk nɛ bɔ hi zek yɔ nɛ zege hi hoobo hi muulbeeki, kol kaŋgg a nɛɛge gbɔɔltɔnɔ gi daarɔ.

¹⁶Mi dag hato anyɔ mi ta̧a̧k dɔgl nɛ a hinyɔ gi gedu sɛw.