Read Doyayo 2 KƆRƐŊGTU 8 Bible Online

2 KƆRƐŊGTU 8 - Doyayo bible

2 KƆRƐŊGTU 8

¹Yɛ̧ɛ̧dɛ wɛ, wi gisin raak an nɛ mɛɛ gɛmsil yɔ Bɛt gaa Yeesu fɔkya wɔ hi mɔksig lɛl sɔmsɔm a Makeduniya hɛbt du.

²An ya̧a̧rhant gihi gook gbɔɔltɔnɔ si̧, hi dag hat gbɔɔltɔnɔ, wɛɛ hatya̧ za̧a̧t bɔrɔ ɔks hi ya̧a̧rumsya̧ dubt bɔ, hin wɔrɔ hi tuus rɔbtigya̧ gbɔɔl yɔ daarlɛlɛ.

³Mi ɗɛɛ an mi boo dɔglya̧ a hii hi ha̧a̧tigya̧ hi gàà gaas a lɛlyɔ tɛŋkya̧ tuur ge, wɛɛ daar tɛŋkya̧ hɛw,

⁴hi ɛriw hi ya̧a̧hɛmnti an wi ta̧a̧ hi ɔksa a gaas yɔ hi gaak Bɛt doodɔ wɔ hi gi a Yahuduya hɛbtdu gedu.

⁵Yɔ anbɔ be, taa anyɔ wii wi mɔkugo, wɛɛ hi gaa zulya̧ dor a Waar Yeesu ge hi a wiige anyɔ Bɛt ha̧a̧ge.

⁶Wi wɛɛ wi zɔ̧b Titus gɔ ma an gi da̧a̧s woos gɛmsigya gbuna bɔ a nɛ lɛlɛ anyɔ da yɛɛlɔ.

⁷Yɛrɛ lɛlfɛɛn a hinyɔ gi gedu sɛw, nɛ gin ɗɔbsigi, dɔgl mɛɛki, hinmɛɛki hi tɛŋk-i̧i̧ki; nɛ wɛɛ ha̧a̧n a wi muulɛ. Yɔ anbɔ ha̧a̧wi an lɛl gi fɛɛnɛ a woos gɛmsilya yɛrɛ gedu be.

⁸Yɔ mi raa anbɔ, mí rāā hinɔ an dɔgl tɛŋkya gɛ, mi raa an mi tɛb hat nɛ hi dood zaadɛ tɛŋkya̧-i̧i̧k bɔ mi zuun a gi rɔbo.

⁹Ya̧a̧nɛ nɛ mɛɛ gɛmsil yɔ Waar wɛ Yeesu Kristu gɔsinɛ. Wɛɛsin ya̧a̧rya anyɔ ginɛ rɔɔsya, nɛ dag rɔɔsɛ a ya̧a̧rumsɔ bɔ gedu.

¹⁰Mi dɔgsin mɔkil miin a dɔgl bɔrɔ hage. Ya̧a̧nɛ, darsinɛ an nɛ da̧a̧s hinyɔ nɛ yɛɛl nɛ wook leza, hinyɔ nɛ mɔk dɔglɔ nɛ dons dood zaadɛ. Nɛ́ dōnsihi hinɔ wook bɔ kpɔd gɛ, nɛ donsihi ha̧a̧kyɔ ha̧a̧n wookɔ hɛw.

¹¹Yɛrɛ ɓɔryɔ yɔ̧ɔ̧sin woos bɔ. Woon hi tɛŋk nɛ gi riitin an ha̧a̧kyɔ ha̧a̧n nɛ hinɔ wa̧a̧k a biitirnaandu, wɛɛn nɛ woo anyɔ nɛ ɗɛɛ.

¹²Gid wɛ gin ha̧a̧tig rɔb an wɛ gaa gaasɛ, Bɛt gi ta̧a̧ gaas wɛ bɔ. Nɛ Bɛt taa ɛrk hinyɔ wɛ taanɔ, gi ɛrk hinyɔ wɛ gin giya.

¹³Taa an nɛɛ nɛ yaa zul nɛ a ya̧a̧rhant du an zaadɛ hi dag holumi. Lab gɛ, bɛr an wɛ fɔb dɔglyɔ riitin giya.

¹⁴Yɛrɛ bɛrɔ an nɛ ɗansihi hinyɔ nɛ gin ɓɔryɔ a hinyɔ ha̧a̧hi gedu, an gɔ gi kuudu be, hi ɗansin hinyɔ ha̧a̧ nɛɛ be an nɛ riitin an gbun bɔ,

¹⁵anyɔ Bɛt ɗɛɛrwolɔ raa a za̧a̧nyɔ mɔks nɛ gbɔɔltɔnɔ dāg hinza daarig gɛ, wɛɛ za̧a̧nyɔ mɔks nɛ kaasi lɔɔ hinza gɛ.

¹⁶Bant gi a Bɛt ge anyɔ gaa Titus tɛŋk-i̧i̧k a kpoos du a nɛ zulɛ.

¹⁷Titus ta̧a̧ zɔ̧k wi ta̧a̧, ɔnɛ tā̧ā̧ kpɔd gɛ, gii hi zulɔ gig ha̧a̧k hi tɛŋk an gi woo hinɔ wɛɛ gi rek a nɛɛge anyɔ ha̧a̧ giya.

¹⁸Wi gisin yaak saam wi yɔ Yeesu fɔkya wɔ hi gi lɛl sɛw hi gig baanik a Bɛt dɔgldɔk bɔ dɔŋgɔ hi Titus elo.

¹⁹Taa anbɔ kpɔdi, Yeesu fɔkya wɔ hi mɔksig lɛl sɔmsɔm hi herig an gi ɛmtin hi wiya wi wook gaasmɔksig woos gɛmsilya yɛrɛ lɛlgbunu a Waar Yeesu gbɔlumsɔ dɔŋgo hi ha̧a̧tig wi rɔb yɔ wi gi zuunik gi dɔŋgo.

²⁰Wi wook anbɔ ro an bɔ kuudu doo za gi dag ya̧a̧ za book a wi zulha a gaas gbɔɔl yɛrɛ hi gaaw naan du an wi oo gi dɔŋgo.

²¹Ya̧a̧nɛ, wi tɛk hinyɔ bɛrɔ, wi taa tɛk a Waar Yeesu muutdu kpɔdi, wi tɛk a dood muutdu hɛw.

²²Saam wi zaa bɔ wi gig yaak hi sa̧a̧m wi zaadɛ wɔrɔ lɛlgbunu gi yɛ̧ɛ̧wi Yeesu fɔkya yɔ wi goog dɔɔ kittɔnɔ, gi waasig tɛŋkɔ i̧i̧k a hin sɔmsɔm du, yɛrɛ ɓɔryɔ wɛɛ gi i̧i̧k tɛŋkɔ gi daariklɛl anyɔ ta̧a̧ dɔgl nɛ gbɔɔltɔnɔ.

²³Yɔ anbɔ, hinyɔ gis Titus be, ɔnɛ gi nawiza woosyayɔ, ɔɔksɔ hi wii a woos yɛrɛ gedu a nɛ zulɛ; yɛ̧ɛ̧dɛ wi hii be, ya̧nɛ hi gi Yeesu fɔkya wɔ hi gi lɛl sɛw tɔmsya̧yaadɛyɔ, hi gi Kristu gbɔlums ɔ̧ɔ̧n hɛw.

²⁴Zunsinɛhi hat nɛ bɔ woosɔ a Yeesu fɔkyaadɛ lɛl sɔmsɔm muutdu, wɛɛn nɛ zunsihi a wi ɗɔbsig dɔgl nɛ hi rɔbo.