Read Doyayo GALATIYA 1 Bible Online

GALATIYA 1 - Doyayo bible

GALATIYA 1

¹Mii Pol , mi bi̧i̧s dood Yeesu fɔkya wɔ hi gi mɔksig a lɛl sɛw a Galat hɛbt du ɗɛɛrwol yɛrɛ. Mii hi yɛ̧ɛ̧dɛ wɔ hi gitin hi mii sɛw wi boonɛ. Dood hi ēlimi an mi wɛɛ Bɛt tɔmsɔya gɛ, wɛɛ Bɛt yāā doo za gi elimi an mi wɛɛ tɔmsɔya gɛ. Yeesu Kristu hi Baa wɛ Bɛto yɔ ɗunsig a wɔrk du hii elimi an mi wɛɛ tɔmsya.

³An Baa wɛ Bɛto hi Waar wɛ Yeesu Kristu hi gaanɛ gɛmsili hi boolumi!

⁴Waar wɛ Yeesu Kristu gaa zulɔ a wɛ hinha̧a̧l dɔŋgo an gi ha̧sɛ a waal waabilɔ ha̧a̧l yɔ gi àgiyɔ zɛŋkɔ gedu anyɔ Baa wɛ Bɛt ha̧a̧ge.

⁵Gbɔlums gi ge faa! Aanbɔ.

⁶Kay! saanɛ, hinɔ yɔɔmyɔ anyɔ mi lag a nɛ nɔɔ nɛ ɔɔk Bɛto, Za̧a̧nyɔ elin hi Kristu gɛmsilɔ nɛ wɛɛ nɛ ta̧a̧k dɔgl zaa dɔɔmi.

⁷Dɔgl Rɔb zaa dɔɔm hinɔ taa ɔnɛ! Yɛrɛ mi lag a dood zaadɛ hi zaa a nɛ teesdu hi wɛɛ hi zɛksig zul nɛ anyɔ ha̧a̧hi Kristu Dɔglɔ Rɔb bɔ zɛmrik an gi wɛɛ hin ya̧a̧gɔ̧ɔ̧nya.

⁸Yɛrɛ mi raasinɛ an wii hɛw, zaabe an Bɛtwalsɛrɔ zayɔ fu̧u̧z a bɛtha si̧, gi zaa a nɛɛge gi dɔgsin dɔgl za dɔɔm yɔ gɛ̧ɛ̧y hi dɔglyɔ wi da wi dɔgsinɛ, dɔglɔ taa rɔb nɛ zaŋ. Mi dɔgruko an Bɛt gi boo za̧a̧nɔ gi ha̧tiro!

⁹Mi da mi raasin nɛ dɔglɔ raasɔ, yɛrɛ mi wɛɛ mi gisin dɔglɔ raak ɓɛ: doo za gi dɔgsin dɔgl za dɔɔm yɔ gɛ̧ɛ̧y hi Dɔgl Rɔb yɔ mi da mi dɔgsin nɛ nɛ ta̧a̧, taa Dɔgl Rɔb nɛ zaŋ, yɔ anbɔ an Bɛt gi boo za̧a̧nɔ gi ha̧tiro!

¹⁰Yɛrɛ mi tɛk a dɔgl bɔ gedu an mi bɛs dood ya, zaabe an mi bɛs Bɛt ya? An mi tɛk nɛ an mi bɛs dood tɛ̧, yɔ anbɔ ger mi taa nɛ Kristu woosɔya ma.

¹¹Nɛɛ yɛ̧ɛ̧dɛ mi wɛ, ha̧a̧m an nɛ mɛɛ bɛttɔnɔ a Dɔgl Rɔb yɔ mi dɔgɔ, fu̧u̧z a dood mɔkil du gɛ.

¹²Mí lāg Dɔgl Rɔb bɔ a doo za ya̧a̧ du gɛ, wɛɛ doo za gōksim gɛ hɛw. Yeesu Kristu gii zunsim dɔglɔ hi zulɔ!

¹³Nɛ da nɛ lag waabil mi dɔgl amntɔnɔ a Yahuduya wɔ maakya̧ bɔ mi fɔk nɛ gedu, yɔ mi zɛksig dood Yeesu fɔkya wɔ hi gi Bɛt ɔ̧nɛ ha̧a̧ltɔnɔ an mi gbɔmntihi.

¹⁴Yɔ mi da mi fɔk yaami Yahuduya wɔ Bɛtya̧ maak sɛw hi tɛŋk gbɔɔltɔnɔ, mi woohin an mi ɗɔbs Bɛt mi daar zaadɛya̧ kit wɔ wɛlya̧ riitin hi miya a maak bɔ gedu.

¹⁵Bɛt be sɛ̧ɛ̧m nɛ yɔ mi da mi gi nàa mi buudu, wɛɛ gɛmsimi elim nɛ an mi woosig woosɛ. Yɔ harige

¹⁶zunsim waawal an mi mɛɛge, mi wɛɛ mi dɔks dood wɔ hi taa Yahuduya gɛ waawal Dɔglɔ Rɔb bɔ. Yɔ anbɔ, mi wār doo za doomisɔ gɛ,

¹⁷mí dɔ̄ɔ̄ a Urusalima an mi watin dɔgl hi tɔmsya zaadɛ wɔ hi dosim a Bɛt woos du gɛ hɛw. Mi rek mi waa a Araabiya hɛbt du. Yɔ mi waa hɔ, mi wɛɛ mi wɛɛ a Dimaska.

¹⁸Kuudu wɛl taarɛ, mi wɛɛ mi dɔɔ a Urusalima an mi boo Piyɛr , mi ɗɔɔt hi gii dimaas eerɛ.

¹⁹Mí da mi gbɛ̄n tɔmsya za gɛ, gɛ Yakuba Waar wɛ Yeesu yɛ̧ɛ̧tɔ kpɔd.

²⁰Hinyɔ mi bi̧i̧sin hɛdi, Bɛt mɛɛ a mi gɔ̧ɔ̧ya̧a̧ gɛ!

²¹Kuudu mi rek a Siiriya hɛbtdu hi a Kilikiya hɛbt du.

²²A ɔ̧tɔge dood Kristufɔkya wɔ a Yahuduya hɛbt du hi mɛ̄ɛ̄ muut mi gɛ.

²³Hi kɛm hinyɔ dood hi raak gii kpɔd, a za̧a̧nyɔ da giwɛ zɛksig gi gi tɛk nɛ an gi gbɔmnt dood wɔ hi ɗɔbsig Yeesu sɛw, zɛmrɔ, yɛrɛ gi dɔksig dood Yeesu ɗɔbsig dɔglɛ.

²⁴Hi wɛɛ hi baan Bɛt gɔ a mi dɔŋgo.