Read Doyayo GALATIYA 2 Bible Online

GALATIYA 2 - Doyayo bible

GALATIYA 2

¹Wɛɛ kuudu wɛl koobl daa nasɔ mi wɛɛ mi dɔɔ a Urusalima hi Barnabas, mi kam Titus du hɛw.

²Yɔ Bɛt raasim an mi rek a hɔ gii mi rekɔ. Yɔ mi dagtin hi dood gbɔlɛ Yeesu fɔkya wɔ ɔ̧ɔ̧kya̧, mi wadsihi Dɔgl Rɔb yɔ mi da mi dɔk nɛ a dood wɔ hi taa Yahuduya gɛ hi teesdu. Yɔ anbɔ, ha̧a̧m an bɔ̄ woos yɔ mi da mi woo nɛko, zaabe yɔ mi gi wooko gi wɛɛ hintɔs.

³Hɔnɛ Titus yɔ gi hi miya, taa Yahuduya, gi Yonaniŋkoyayɔ, wɛɛ doo za fɛ̧ɛ̧ge an gi nabɔ gi wɛɛ an Yahuduya hɛw gɛ.

⁴Yeesu fɔkya ya̧a̧gɔ̧ɔ̧nyaadɛ hi guz wi teesdu hi kɛ̧ɛ̧tig an hi sɔ̧ɔ̧ zul wɛ yɔ wɛ dag aakil du a ɔksig wɛ bɔ gedu hi Yeesu Kristu, ha̧a̧hi an hi nab Titus an kuudu hi wɛɛnɛ Yahuduya maak gbaarɛdɛ.

⁵Wii be wi tā̧ā̧ dɔglya̧ gɛ nɛ zaŋ. Ha̧a̧wi an wi oos rɔb yɔ fu̧u̧z a Dɔgl Rɔb bɔ gedu bɛttɔnɔ giya.

⁶Yɔ anbɔ dood wɔ hi gihi seek an dood gbɔlɛ be - dɔgl mi taadu hi gbɔlumsya̧ bɔrɔ. Bɛt gɔ gɛ̧ɛ̧ dood gɛ be - mba dood wɔ hi gihi seek an dood gbɔlɛyɔ hí gōksim hinza gɛ.

⁷Yɔ taa nɛ anbɔ gɛ si̧, Yakuba, hi Piyɛr hi Yohana hi gbɛn a Bɛt gaam woosɛ an mi dɔg dɔglɔ a dood wɔ hi taa Yahuduyaadɛ gɛ hi teesdu anyɔ gaa Piyɛr a Yahuduya wɔ hi teesdu be.

⁸Bɛt yɔ gaa Piyɛr tɛŋk an gi wɛɛ tɔmsɔya a Yahuduya wɔ hi tees du, wɛɛ gaa mii tɛŋk an mi wɛɛ tɔmsɔya a dood wɔ hi taa Yahuduya gɛ hi teesdu be.

⁹Yɔ Yakuba hi Piyɛr hi Yohana, wɔ hi sɔ̧ɔ̧hi an dood gbɔlɛ nɛ zaŋ, hi gbɛn gɛmsil yɔ Bɛt gaami anyɔ gaam woos bɔ, hi wɛɛ hi gaatin hatnaan gɔ hi Barnabas hi miya an hi zuun a wi sɛw wi wootin woosɛ. Wi wɛɛ wi wɔ̀ kɔlk wi a Barnabas hi miya wi woo a dood wɔ hi taa Yahuduya gɛ hi teesdu, hii be hi woo a Yahuduya wɔ hi teesdu be.

¹⁰Hi ɛrim hin gbun kpɔd a bɔwɛ zɛns ya̧a̧rya wɔ a Urusalima ɗaaki. Mi woo hinɔ gii hi tɛŋko.

¹¹Yɔ Piyɛr zaa a Aŋtakiya, mi dɔ̧ɔ̧lige a Yeesu fɔkya wɔ hi lɔlgbar sɛw a hin-a̧a̧b yɔ woo gi dɔŋgo.

¹²Gɔ da ginɛ hinletingo hi dood wɔ hi taa Yahuduya gɛ. Kuudu be, dood zaadɛ hi fu̧u̧z nɛ a Yakuba doodɔ hi, hi tuurɔ. Hɔnɛyɔ Piyɛr hoobha̧a̧g dood wɔ gɔ hi raak a gi an Yeesu fɔkya wɔ hi taa Yahuduya gɛ hi naabɔ, yɔ wɔrɔ hi bɛɛ tuuruko, Piyɛr hɛml gɔ hi dood wɔ hi taa Yahuduya gɛ, ɔɔ hinlek gɔ hi hiya.

¹³Yeesu fɔkya Yahuduya zaadɛ wɔ hi woo mɛlwoosɔ an giya, tuur an Barnabas hɛw gi fɔ mɛlya̧ woos bɔ.

¹⁴Yɔ mi gbɛn hi hɛɛk Dɔgl Rɔb bɔ rɔbɔ bɔ anbɔ, mi raa Piyɛr a dood lɔlgbar sɛw a mɔɔ yɔ mɔ gi Yahuduya, mɔ waak hɛdi an dood wɔ hi taa Yahu-duya hi waako, mɔ́ fɔ̄ Yahuduya maakdɔgl gɛ, ri gi ha̧a̧m an mɔ fɛ̧ɛ̧ dood dɔɔmɛ wɔ hi waa an Yahuduyaadɛ nɔ?

¹⁵Wii Yeesu fɔkya wɔ wi mɔɔy Yahuduyaadɛ zaŋ, wi taa dood rɔ̀bɛ wɔ hi fɔ̄ Bɛtmaakdɔgl gɛ.

¹⁶Yɛrɛ wi mɛɛ a Bɛt gɔ sɔ̧̄ɔ̧̄ za̧a̧nza an doo riiti a maakdɔgl yɔ gi fɔk gi dɔŋg gɛ, gɔ sɔ̧ɔ̧g an doo riiti anyɔ gi ɗɔbsig Yeesu Kristu. Wii hɛw, wi ɗɔbs Yeesu Kristu an wi riis Bɛto a Kristu ɗɔbsigɔ bɔ gi dɔŋgo, taa a maakdɔgl fɔk dɔŋgo. Yɛrɛ taa an doo za gi riis Bɛt a maakdɔgl fɔk dɔŋg ma.

¹⁷Yɔ anbɔ, gid wii Yahuduya wɔ wi tɛk an wi riis Bɛt anyɔ wi ɔksig hi Yeesu Kristu be, wi wɛɛ dood wɔ gɔ hi elihi a hi dood hinha̧a̧l wookyaadɛyɔ anyɔ wi taa Bɛt maakɔdɔgl fɔko. Nɛ yɔ anbɔ gi ma an Kristu wɛɛnɛ hinha̧a̧lwookya ya? ɛ̧-ɛ̧! Lab gɛ nɛ zaŋ!

¹⁸Yɛrɛ doo gi raa Bɛtmaakdɔglɔ wɔ a taa an hi fɔbɔ, kuudu gi wɛɛ gi raa a gi an hi fɔbɔ, nɛ zuun gaattɔnɔ a gi wook hin-a̧a̧bi ma mi?

¹⁹Yɛrɛ mi gi an wɔrko a Bɛtmaakdɔgl dɔŋgo, Bɛt-maakdɔgl bɔ gii gbɔmi, mi za̧a̧ ma a Bɛt zulɛ. Hi da hi doomi a dɔ̧ɔ̧r muulɛ hi Kristu elo,

²⁰mii taa za̧a̧til ma, Kristu giigi za̧a̧til a mi muul du. Waabil mi kuud yɛrɛ mi waak a mi muul du, mi waak hi ɗɔbsig mi a Bɛt waawal yɔ ha̧a̧ge a mi muulɛ gi wɛɛ gi gàà zulɔ gi wɔr a mi kalɛ.

²¹Mi taa Bɛt gɛmsilɔ yɔ za̧a̧s dood bisugo. À Bɛt sɔ̧ɔ̧wɛ an dood riitɛ a maakdɔglɔ fɔk dɔŋgo, Kristu yɔ wɔr nɛ ditɔs.