Read Doyayo GALATIYA 4 Bible Online

GALATIYA 4 - Doyayo bible

GALATIYA 4

¹Hinyɔ ha̧a̧mi raak riitin an yɛrɛ lɛ: mɔkin walaza yɔ yɛr baatɔ rɔɔsɛ. Yɔ wala bɔ yɛr rɔɔs bɔ gi ya̧a̧mi kete gi rɔɔs zulya be, wɛɛ taan tɛŋk an gi woon hinza, hinza gɛ̧ɛ̧g hi gbaar gɛ,

²gi a kaŋkigya wɔ hi rɔɔs-ookya wɔ hi naan du, ɔ̧tyɔ baatɔ dɛ̧ɛ̧ gi tuur kete ɓɔr gi ɔɔ rɔɔsɔ bɔ looko.

³Gbunɔ, wɛɛ hɛw yɔ wɛ gi an ya̧a̧mwaat a hinmɛɛk du, wɛ da wɛ gi an waalmɔkil gbaarɛyɔ.

⁴Wɛɛ, yɔ ɔ̧t rɔb bɔ Bɛt dɛ̧ɛ̧ tuurɔ, Bɛt yaaz waaɔ a waal du mɔɔy a nɛɛza buudu, mɔɔy a Muusa maakdɔgl bɔ gikɔ gedu,

⁵an gi gaa zulɔ inisɛ gi za̧a̧s dood wɔ hi gi nɛ a maakdɔgl bɔ gedu sɛw an wɛ wɛɛ Bɛt waatɔ ɛnsɛ.

⁶Wɛɛ wɛ gi Bɛt waato, yɔ anbɔ Bɛt yaaz waaɔ Mɔkilɔ a wɛ kpoos du. Mɔkil bɔ gɔ el Bɛto a Aba, a Baaba!

⁷Nɛ yɔ anbɔ àgiyɔ mɔ taa gbaar ma, mɔ gi waa mɔ̀ɔlyɔ. Yɔ mɔ gi waa mɔ̀ɔl anbɔ, Bɛt gi gaam rɔɔs yɔ gbaas nɛ waatɔ zaadɛ hɛw.

⁸Da amntɔnɔ yɔ nɛ mɛ̄ɛ̄ Bɛt gɛ, nɛ da nɛ woosig mɔkil ha̧a̧l wɔ hi taa nɛ bɛt rɔbɛ nɛ zaŋ gɛ maak an gbaarɛya̧.

⁹Yɛrɛ nɛ mɛɛ Bɛt be, - gi an mi raa a Bɛt mɛɛnmɛ be, yɛrɛ nɛ wɛɛ nɛ zɛmrik zul nɛ ri an nɛ fɔb waalmɔkil hɔntil wɔ nɔ? Ha̧a̧nɛ an nɛ wɛɛs mɔkil ya̧a̧rya wɔrɔ gbaarɛ ri nɔ?

¹⁰Mi wɛɛ mi lag a nɛ gbaasig ɔ̧t zaadɛ wɛ, hi sɛɛ wɛ, hi wɛl wɛ mɔkil nɛ an nɛ woo Bɛtmaak gedu!

¹¹Nɛ kinsa woos yɔ mi woo a nɛ teesdu sɛw wɛɛ hintɔsi be, mi mɛɛ gɛ. Gɔ mi mɔ̀k hin wɔrɔ anbɔ hoobha̧a̧mha̧.

¹²Yɛ̧ɛ̧dɛ mi wɛ, mi zɔ̧nɛ hi ya̧a̧hɛmnti, wɛɛn an miya, anyɔ mii mi gi an nɛɛ be. Àmntɔnɔ nɛ da nɛ wōōsim hin-a̧a̧b nɛ gɛ zaŋ.

¹³Nɛ mɔk nɛ mɛɛk hɛw, yɔ mi yɛɛl mi dɔgsin Dɔgl Rɔb bɔ, yɔ anbɔ mi da mi gi gumtilyɔ, ya̧a̧ gii mi zaa a nɛɛge.

¹⁴Gums mi bɔ goo hinmɔŋk nɛ gbɔɔltɔnɔ, nɛɛ be, nɛ da nɛ́ bɔ̧ɔ̧m gɛ, nɛ́ bisim gɛ. Nɛ zem rɔbtɔnɔ an Bɛtwalsɛrɔ, nɛ zemi an Yeesu Kristu giya!

¹⁵Nɛ da nɛ dag hat gbɔɔltɔnɔ. Yɛrɛ hat nɛ bɔ gaay? Mi book dɔgl nɛ hi rɔbo a à nɛ ɗɛɛ nɛ an nɛ wig lɔl nɛ nɛ gaami, yɔ nɛ woo nɛ hinɔ hɛw.

¹⁶Yɛrɛyɔ mi gin rɔb raako, mi wɛɛsin lɔlnɛhɛ̧ɛ̧nikya ma ya?

¹⁷Dood dɔgl-a̧a̧bɛdɔkya wɔ hi gisin wooswook hi tɛŋk an gi harinɛ, wɛɛ woosya̧ taa hinrɔb be. Ha̧a̧hi an hi hɛksinɛ, nɛ woosihi woos hi tɛŋko an gi harihi be.

¹⁸Nɛ an nɛ woohin hi tɛŋko, yɔ bɛɛrɔ. Hin gbunu, ha̧a̧mi an hinyɔ nɛ waak wook gi wɛɛ hinrɔbo, wɛɛ taa an gɔ mi gidi nɛ woo hinrɔbɔ kpɔd.

¹⁹Waat mi wɛ, mi gi an nɛɛ yɔ gi waa gulko, mi wɛɛ mi gi ya̧a̧rha̧a̧k a nɛ dɔŋg ɓɛ, gi tuur an Kristu gi wɛɛ gi hi̧i̧s kpoos nɛ, nɛ riitin an giya.

²⁰Kay, saanɛ, ha̧a̧m an mi gi hi nɛɛ ɓɔryɔ an mi boosin kɔlk za dɔɔmi! Yɛrɛ mí mɛ̄ɛ̄ hinyɔ gɔ mi woosin ma gɛ, mi gin koltuun yɛ̧ltɔnɔ a nɛ dɔŋgo.

²¹Nɛɛ zɛnɛ wɛ ha̧a̧n Muusa maakdɔglɔ fɔko, raasinmi: nɛ lāg hinyɔ Muusa dɔgl bɔ raa gɛ ya?

²²Hi bi̧i̧ nɛ gedu a Abraham da gin nɛ waatwalɛ eerɛ, zaa gbunu, nisgbaar waayɔ, zaa gbun bɔ be nisɔ lòòl waayɔ.

²³Nisgbaar bɔ waaɔ mɔɔy an dood sɛw, nis lool bɔ waaɔ be mɔɔy an hinyɔ Bɛt raa nɛ a gi woos Abraham.

²⁴Wɛ ɗɛɛ an wɛ kɛm dɔgl yɛrɛ an ya̧a̧daaniki. Nɛɛd wɔ eerɛ hi gi an Bɛt wɔb ya̧a̧ɔ lɛl eerɛ. Nɛɛ gbun bɔ nuŋgɔ a Hagar yɔ mɔɔ waat gbaarɛ, riitin an ya̧a̧wɔk yɔ hi da hi boo a ga̧a̧t bɔ nuŋgɔ a Sinay hage.

²⁵Nuŋg bɔ Hagar gi Sinay Golɛ a Araab waal du, riitin hi waal gbɔɔl bɔ Urusalima yɔ ɓɔryɔ. Urusalima bɔ hi doodɔ hi gi an gbaarɛ sɛw.

²⁶Wɛɛ nis lool bɔ Saratu, riitin hi Urusalima bɔ a bɛtha yɔ taa a gbaarums du be, gii gi nàà wɛ zaŋ.

²⁷Anyɔ hi bi̧i̧ a Bɛtdɔgl ɗu: a mɔɔ nis kirkili, dagum hato. Mɔɔ yɔ mɔ mɛɛdir waa kosgumn gɛ, ɓoolumya̧a̧ hi hato. Ya̧a̧nɛ, nis yɔ hi ɔɔge waatɔ hi kit hi daar nis yɔ gin wal daarɔ.

²⁸Yɛ̧ɛ̧dɛ mi wɛ, wɛya, wɛ gi an Isaaku, wɛ wɛɛ Bɛt waato a hinyɔ Bɛt raa nɛ a gi woo gi dɔŋgo.

²⁹A ɔ̧tɔge waa bɔ mɔɔy an dood sɛw da zɛks waa bɔ mɔɔy hi Bɛt Mɔkilɔ tɛŋkɔ; yɛrɛ àgiyɔ gi anbɔ te.

³⁰Yɛrɛ Bɛtdɔgl raa a nɔ? Raa a ninum nisgbaar bɔ hi waaɔ, nisgbaar bɔ waaɔ taa rɔɔs bɔ gɛ̧ɛ̧k hi nislool bɔ waaɔ gɛ nɛ zaŋ!

³¹Ya̧a̧nɛ, yɛ̧ɛ̧dɛ mi wɛ, wɛ taa nisgbaar waato, wɛ gi nislool bɔ waat ɔ̧ɔ̧nɛ, wɛ gin zul wɛ aakil du ro!