Read Doyayo GALATIYA 6 Bible Online

GALATIYA 6 - Doyayo bible

GALATIYA 6

¹Yɛ̧ɛ̧dɛ mi wɛ, nɛ́ dum doo za gi mat a hinha̧a̧l du, nɛɛ dood zaadɛ wɔ nɛ ɛmbik anyɔ Bɛt ha̧a̧ge, ɗunsinɛge hi zulhɔniki nɛ ɗaasige nɛ wɛnzig a gbɔnɔ rɔb du. Mɔɔ be oom zul mɔ an bɔ loorɛha̧a̧l gi maatumɔ.

²Ɗaatinnɛ hinɗɔmn nɛ pɛɛtingo, nɛ woo anbɔ nɛ da̧a̧sig hinyɔ Kristu maakdɔglɔ raa giya.

³Doo za gi gi mɔkig a gii gi doo gbɔɔlɛ, wɛɛ gi doo tɔsi gi maatig zulɔ ha̧a̧ltɔnɔ.

⁴An bɔ nɛ hɛw, gi see woosɔ; woosɔ bɔ gi rii, gi dag gbɔlumsɔ a hinyɔ woo hi zulɔ gedu. Bɔgi gòksin woosɔ hi doo za ɔnɛ.

⁵Ya̧a̧nɛ, bɔbe gi pɛɛ hinɗɔmnɔyɔ gi gi zulha giya, bɔ gi gòksin naaza ɔnɛ bɔ.

⁶Gi an za̧a̧nyɔ hi gisig Bɛtdɔgl goko gi gɛ̧ɛ̧ rɔ̧ɔ̧sɔ wɔ gin sɛw hi za̧a̧nyɔ gisig hingoko.

⁷Bɔnɛ maat zul nɛ! Doo ɗɛ̄ɛ̄ an gi kpɛ̧ɛ̧l Bɛt gɛ. Bɛt yɔ ɔɔg gɛ! Hinyɔ doo lug sɛw, gi wɛɛ gi ɓɛr hinɔ giya.

⁸Za̧a̧nyɔ lugs ɗɔkumɔ ha̧a̧l wɔ hin a gi kpoos du, ɗɔkum ha̧a̧l wɔrɔ hi gaa humlya̧ gɛ: wɔrko. Yɛrɛ za̧a̧nyɔ lugs Bɛt Mɔkilɔ hin a gi kpoos du be, Bɛt Mɔkil bɔ gi gaa humlɔ gɛ: za̧a̧tig faa.

⁹Yɛwɛ waa hinrɔb wooko, bɔwɛ mɔɔ. Ɔ̧tyɔ Bɛt dɛ̧ɛ̧ giro, gid wɛ ā̧ps muul wɛ gɛ, ɔ̧tɔ gɔ gi rii wɛ ha̧b woos wɛ bɔ humlɔ.

¹⁰Yɔ anbɔ, Bɛt gi gaawɛ gbɔnɔ, yɛwɛ woos dood sɛw hinrɔbo, wɛɛ yɛwɛ woos zɛnɛ wɔ hi ɗɔbs Yeesu an wɛɛ hinrɔb gi daarlɛl be.

¹¹Seen hinbi̧i̧k gbɔlɛ wɔ mi bi̧i̧sin hi naan mi ta̧!

¹²Dood wɔ hi tɛk an dood zaadɛ hi ta̧a̧hi an dood riitɛ, ha̧a̧hi an hi fɛ̧ɛ̧n nɛ nabɔ an bɔ̄ Yahuduya wɔ hi kamsihi ya̧a̧kɛtil a Kristu wɔrkɔ bɔ a dɔ̧ɔ̧r muul dɔglɔ bɔ gi dɔŋgo.

¹³Dɔms-dɔglya wɔ hɛw hi fɔ̄b Bɛtmaakdɔgl gɛ, ha̧a̧hi an nɛ nabɔ an hi pɛɛ zulya̧ a hinyɔ nɛ woo gi dɔŋg kpɔd.

¹⁴Minɛ, an Bɛt gi yantsim zul mi pɛɛk a hinyɔ gi sɛw gi dɔŋgo, gɛ gɔ mi pɛɛ zul mi a dɔ̧ɔ̧r bɔ hi doo Waar wɛ Yeesu Kristu hage gi dɔŋgo, anyɔ mi mɛɛ a waalmɔkil wɔ hi wɔsim a dɔ̧ɔ̧r bɔ hage, mii be mi gi an wɔrko, mi ɔɔ waalmɔkil wɔ da̧a̧da̧.

¹⁵Yɔ anbɔ, dɔms gi hintɔsyɔ, kpaarums gi hintɔsi be. Hin gbɔɔl gɛ: Bɛt wɛ̍ɛ̍nɛ dood segdɛ.

¹⁶An Bɛt gi gaa dood wɔ hi fɔk gbɔnɔ yɛrɛ sɛw boolumi gi mɛɛsihi ya̧a̧rɛ. Hii gi Bɛt Israhila ɔ̧ɔ̧ rɔbo, hii gi Bɛt doodɔ.

¹⁷Gɔ gi kuudu, bɔ doo za gi zɛksimi! Mi gin Yeesu táálɔ a mi muulɛ.

¹⁸Yɛ̧ɛ̧dɛ mi wɛ, an Waar wɛ Yeesu Kristu gɛmsilɔ gi oo mɔkil nɛ. Aanbɔ!