Read Doyayo EFESU 1 Bible Online

EFESU 1 - Doyayo bible

EFESU 1

¹Mii Pol , Yeesu Kristu tɔmsɔya anyɔ ha̧a̧ Bɛto. Mi bi̧i̧sig Bɛt doodɔ wɔ [hi gi a Efesu] hi fɔk Yeesu Kristu dɔglɔ hi tɛŋko hii ɗɛɛrwol yɛrɛ.

²An Baa wɛ Bɛto hi Waar wɛ Yeesu Kristu hi gaanɛ gɛmsili hi boolumi!

³Yɛwɛ baan Bɛto, Waar wɛ Yeesu Kristu Baatɔ, yɔ rɔbsɛ hi Mɔkilɔ rɔbsɔ yɔ gi sɛw a bɛtha a ɔksig wɛ bɔ gedu hi Kristu!

⁴Yɔ Bɛt da kimdir nɛ waal ket gɛ, ɔksɛ hi Kristu, wɛɛ sɛ̧ɛ̧wɛ an wɛ wɛɛsig doodɔ wɔ wɛ taan hin-a̧a̧b a gi muutdu. Yɛɛl ha̧a̧g wɛ muul ro

⁵gi gbaawɛ an Yeesu Kristu gi woosɛ hinɛ, wɛ wɛɛ Bɛt waatɔ ɛnsɛ a ha̧a̧tigɔ rɔb bɔ gi dɔŋgo.

⁶Yɛwɛ baan Bɛto anyɔ gaawɛ gɛmsilɔ gbɔlumsyɔ ta̧a̧sɛ a waabil wɛ ɔks bɔ gedu hi waaɔ yɔ ha̧a̧g hi kpoosɔ sɛw.

⁷Anyɔ wɛ ɔks hi Kristu, wɛ dag hinha̧a̧l wɛ bisigi hi zul wɛ aakil du a Kristu ga̧a̧mɔ bɔ gub gi dɔŋgo. Bɛt zunsɛ gbɔlumsɔ rɔbgɔkya bɔ anbɔ anyɔ

⁸yaaz rɔbsɔ wɛ zulha gbɔɔltɔnɔ. Gaawɛ hinmɛɛk dubti hi hinmɛɛk zulduya yɔ gi sɛw.

⁹Wɛɛ gɔsɛ wɛ mɛɛn ha̧a̧tigɔ bɔ dood hi da hi mɛɛ nɛ gɛ, anyɔ mɔkɔ gi woo a Kristu naan du.

¹⁰Hinyɔ ha̧a̧g wooko, gɛ a ɔ̧tɔ gɔ gi rii gi ɔks hinwɔ bɛtha hi hɛbtdi sɛw a Kristu nuŋg du, gi gɔ an Kristu gi wɛɛ zulya̧.

¹¹A ɔksig wɛ bɔ gedu hi Kristu, wɛ dag za̧a̧tig bɔ wɛnɛ dagɔ anyɔ Bɛt sɛ̧ɛ̧wɛ gaati gi gbaawɛ an hinyɔ mɔk nɛ wooki; Bɛt gɔ woo hin sɛw anyɔ mɔkɔ gi ha̧a̧g hi zulɔ.

¹²Anyɔ wɛ yɛɛl wɛ gbaa mɔkil wɛ a Kristu ge, yɛwɛ baan Bɛt gbɔlumsɔ.

¹³Nɛɛ hɛw, nɛ kɛm rɔb dɔgl yɔ gi Yeesu Dɔglɔ Rɔb bɔ za̧a̧sinɛ, nɛ wɛɛ nɛ ɗɔbs Yeesu. Yɔ anbɔ, nɛ ɔks gbunu hi giya, wɛɛ Bɛt gbaasin nuŋgɔ nɛ muulɛ hi Mɔkilɔ yɔ raa nɛ a bé gaanɛ.

¹⁴Bɛt Mɔkilɔ bɔ gii raasɛ wɛ mɛɛ sà̧a̧nɛ a Bɛt gbaasɛ rɔɔs wɛ a bɛtha, za̧a̧tig wɛ yɔ̧ɔ̧sum gɔ gi tuurɔ, wɛ dagige. Wɛ baan ma Bɛt gbɔlumsɔ!

¹⁵Ya̧a̧nɛ mii hɛw anyɔ mi lag hi book ɗɔbsig nɛ bɔ nɛ ɗɔbsig Waar Yeesu dɔglɔ, hi hat nɛ bɔ dɔgl a Bɛt doodɔ wɔ hi muul sɛw,

¹⁶mi ɔ̄ɔ̄ Bɛt baanik a nɛ zulha gɛ, mi gin waak mɔkig a mi zɔ̧k du,

¹⁷mi waak zɔ̧k Waar wɛ Yeesu Kristu Bɛtɔ yɔ gi Baa wɛ gbɔlumsya an gi gaan Mɔkilɔ bɔ gi goksin hinmɛɛk dubti gi wɛɛ gi mitsin Bɛto an nɛ mɛɛge gi daarlɛlɛ.

¹⁸Mi gig zɔ̧k an gi gaas lɛlgaal a nɛ kpoos du nɛ mɛɛ hingbɔɔl yɔ Bɛt gbaasin a bɛtha gi elinnɛ, hinyɔ nɛ gbaak mɔkil nɛ hage, hi gbɔlumsɔ rɔɔs yɔ gɔ wɛ dag hi doodɔ wɔ lɛlgbunu.

¹⁹Nɛ wɛɛ nɛ mɛɛ a Bɛt gin tɛŋk gbɔɔltɔnɔ daarlɛlɛ an gi ɗaas ɗɔbsigɔya wɔ wɛya, an tɛŋkɔ gbɔɔl yɔ zuun a Yeesu Kristu gbaŋgi.

²⁰Woon tɛŋk bɔrɔ hin a Kristu muul du a ɔ̧tyɔ rɛmsig a wɔrkɛ teesdu gi gaag ɗɔɔtillɛl a gi naanrɔbo a bɛtha gedu.

²¹A hɔ, Kristu gii gi gbɔɔl a waar ɛ wɔ hi zulha sɛw hi hin nabl zulha sɛw hi mɔkil tɛŋkyaadɛ zulha sɛw hi wɔ hi gin waar ums tɛŋk sɛw hi zulha, hi nuŋg ɗɔbtɛ wɔ hi gi sɛw a waabil yɔ ɓɔryɔ gedu hi a waabil yɔ gɔ gi zaa gedu hɛw.

²²Bɛt gbaa hin sɛw a gi dɔɔ di, gbaag waar gbɔɔl a hinyɔ gi sɛw hage, wɛɛ wɛɛnig fɔkɔya wɔ ɔksilya̧ zulɛ.

²³Fɔkɔya wɔ hii gi Kristu muulɔ. Kristu gi mid zulɔ gaattɔnɔ a hi muul du, hi̧i̧s hinyɔ kim bɛtha sɛw.