Read Doyayo EFESU 2 Bible Online

EFESU 2 - Doyayo bible

EFESU 2

¹Amntɔnɔ nɛɛ nɛ da nɛ gi an wɔrkɛ a Bɛt muutdu a a̧a̧b nɛ hi hinha̧a̧l nɛ wɔ nɛ da nɛ wook hi dɔŋgo.

²Nɛ da nɛ ɛmbik an waabil yɔ waal yɛrɛ duge, nɛ da nɛ fɔk loorɛha̧a̧l wɔ waar ya̧ bɔ mɔkilɔ gi wook ɓɔryɔ a dood wɔ hi ɓatsig Bɛt zul hi kpoos du giya.

³Hɔɔ, wɛ sɛw, wɛ da wɛ gi nɛ an hiya, amntɔnɔ wɛ da wɛ waak an muul wɛ bɔ ɗɔkumɔ ha̧a̧l bɔ ha̧a̧ge, wɛ fɔk hinyɔ kpoos wɛ hi mɔkil wɛ gihi ha̧a̧ko. Yɔ anbɔ wɛ da wɛ riitin nɛ hi dood zaadɛ; Bɛt nɔɔtigɔ gi nɛ an gi lɛwɛ an hii be.

⁴Nɛ yɛrɛ Bɛt be gin ya̧a̧rmɛɛk gbɔɔltɔnɔ, ha̧a̧g gbɔɔltɔnɔ a wɛ muulɛ.

⁵Wɛɛ be, wɛ wɔr a Bɛt muutdu a wɛ a̧a̧b dɔŋgo. Yɔ anbɔ si̧, Bɛt rɛmsɛ wɛɛ za̧a̧sɛ hi Kristu elo. Za̧a̧sin anbɔ a gɛmsilɔ bɔ gi dɔŋgo.

⁶Anyɔ wɛ ɔks hi Yeesu Kristu, Bɛt ɗunsɛ lɛlgbunu a wɔrk du hi giya, gbaawɛ an wɛ ɗɔɔt hi gii lɛlgbun a bɛtha waalɔ bɔ gedu.

⁷Yɔ anbɔ a waabil yɔ gɔ gi zaa kuudu ge, Bɛt gi gɔsɛ rɔb a wɛ ɔksil du hi Yeesu Kristu an gi zunsɛ gɛmsilɔ tɔɔkɔ yɔ daar hin sɛw.

⁸Yɔ anbɔ Bɛt za̧a̧sinɛ a gɛmsilɔ bɔ gi dɔŋg ro anyɔ nɛ ɗɔbs Yeesu Kristu. Za̧a̧tigɔ fu̧u̧ a wɛɛ gɛ, gi Bɛt gaas ɔ̧ɔ̧n tɔs.

⁹Bɛt zā̧ā̧sɛ a hinrɔb yɔ wɛ mɔk wɛ woo gi dɔŋg gɛ, za̧a̧sɛ tɔs. Yɔ anbɔ, hinɔ fu̧u̧ a woos bɔ gedu an doo gi pɛɛ zulɔ gɛ.

¹⁰Wɛɛ wɛ gi woos ɔ̧ɔ̧nɛ. Bɛt ki̧wɛ a ɔksig wɛ bɔ gedu hi Yeesu Kristu a woos rɔbɛ wɔ Bɛt gɛms nɛ doos gi dɔŋg an wɛ woo hinya̧.

¹¹Ya̧a̧nɛ, nɛ mɛɛ a Yahuduya wɔ dɔmsya̧ wooy a hi muul hi doo naanɛ hi elik zulya̧ a hi dɔmbɛyɔ. Wɛɛ, nɛɛ yɔ nɛ taa Yahuduya gɛ be, hi gin elik a nɛ kpaarɛyɔ.

¹²A ɔ̧tɔ ge nɛ da nɛ taa hi Kristu. Nɛ rɔ̀bɛyɔ. Nɛ ɔ̄ks hi Israhila gɛ. Nɛ da nɛ hɛml hi ya̧a̧wɔk yɔ Bɛt wɔ̀b nɛ hi doodɔ wɔ herihi. Nɛ ɗɔɔt nɛ a waal du, nɛ da nɛ mɛ̄ɛ̄ Bɛt gɛ be, nɛ wɛ̄ɛ̄ nɛ gbaa kpoos nɛ a hinza ha gɛ be.

¹³Yɛrɛ ɓɔryɔ, anyɔ nɛ ɔks hi Yeesu Kristu, nɛɛ wɔ nɛ da nɛ hɛml lɔɔlɔɔlɔ hi Bɛto, Kristu ga̧a̧mɔ bɔ gii sɔdzin ma a gi dɔŋdi.

¹⁴Ya̧a̧nɛ boolum wɛ gɛ Yeesu Kristu, ɔks Yahuduya wɔ wiya hi dɔ̧ɔ̧t zaadɛ wɔ nɛya, wɛɛnɛ dɔ̧ɔ̧t gbunu a Bɛt muut du; wɛɛ yaar lɔlhɛ̧ɛ̧k wɔmnt yɔ da gɛ̧ɛ̧wɛ nɛ tees du.

¹⁵Yɔ wɔr a wɛ hinha̧a̧l dɔŋgo, yɛ̧ɛ̧r maakdɔglɛ hi hinyɔ gi raako an gi ɔks dɔ̧ɔ̧t wɛ eerɛ wɔ dɔ̧ɔ̧t gbunu a ɔksil wɛ bɔ gedu hi giya. Yɔ anbɔ, wɛ́ gɛ̧ɛ̧y ma gɛ, wɛ wɛɛ dɔ̧ɔ̧t seg gbunu, wɛ wɛɛ wɛ bool ma gɔ.

¹⁶Ya̧a̧nɛ, yɔ Yeesu wɔr a dɔ̧ɔ̧r ha, ha̧tir hinyɔ gi lɔlhɛ̧ɛ̧k a wɛ teesdu, wɛ wɛɛtin Bɛt sa̧a̧mɛ a ɔksil wɛ bɔ gedu hi giya a muul gbun bɔ gedu.

¹⁷Kristu zaa dɔg boolum dɔglɛ. Dɔgs nɛɛ wɔ nɛ hɛml hi Bɛto, wɛɛ dɔgs wii Yahuduya wɔ wi sɛ̧ɛ̧big be.

¹⁸A Yeesu Kristu dɔŋg ro, Yahuduya wɔ hi wɔ hi taa Yahuduya gɛ wɛ ɗɛɛ an wɛ sɛ̧ɛ̧b a Baa wɛ Bɛt ge anyɔ wɛ dag Bɛt Mɔkilɔ gbun bɔ gi ɗaasɛ.

¹⁹Yɔ anbɔ, nɛɛ wɔ nɛ taa Yahuduya gɛ, nɛ táa ma rɔ̀bɛ, nɛ taa dood wɔ hi fu̧u̧z lakɛ, nɛ ɔksɔ nɛ gi hɛbtwaato, nɛ gi an Bɛt doodɔ zaadɛ wɔ, nɛ gi Bɛt wāātɔ wɔ hi waak a gi raa du hiya.

²⁰Hi wɔ̧nɛ a sɛŋk yɔ tɔmsyaadɛ hi Bɛtya̧a̧kɛŋkyaadɛ hi yɛɛl luk wɔŋk hage. Yeesu Kristu hi zulɔ gii gi bet gbɔɔl tɛŋkya yɔ er luk sɛŋk yoogil du an gi ɓaasige.

²¹Wɔ hi wɔ̧hi sɛw an wɔmto hi ɔks a gi muulɛ hi hɔɔ hi dɔɔk wɛɛha an hi wɛɛ Bɛtlukɔ gaat yɔ gi waak ɔksig gbunu hi Waar Yeesu.

²²A ɔksil bɔ gedu hi Waar Yeesu , nɛɛ hɛw hi wɔ̧nwɔmɔ an wɔmto an nɛ wɛɛ Bɛtlukɔ bɔ Mɔkilɔ gi waak gedu.