Read Doyayo EFESU 5 Bible Online

EFESU 5 - Doyayo bible

EFESU 5

¹Fɔn Bɛt dɔɔɔ an waat rɔbɛ wɔ ha̧a̧g a hi.

²Ɛmbin a hat du anyɔ Kristu ha̧a̧g a nɛɛge, gi wɛɛ gi gààsɛ zulɔ a Bɛt ge an gaasɛ hi namb yɔ hi gbɛɛrɔ hi nɔms Bɛt an gaasɛ hi ki̧i̧lɔ hɛmnti.

³Mansi hi ɓi̧i̧lim yɔ gi sɛw, zaabe ɗɔkumha̧a̧lɛ, bɔ hinɔ gi booy a nɛ teesdu nɛ zaŋ, hinɔ bɛ̄r anbɔ a Bɛt doodɔ teesdu gɛ.

⁴Bɔhi lag ya̧a̧lɛbtigi, zaabe yooya̧a̧, zaabe hin-kpɛ̧ɛ̧liki, hinya̧ hii gi dɔɔm a hinyɔ bɛr raak gedu. Bɛr an hi kɛnɛ nɛ raak banti a Bɛt ge.

⁵Yɔ anbɔ mɛɛn bɛttɔnɔ a mansnaakya, ɓi̧i̧limya, tusɗɔkumya, hi riitin hi maak wɔ fɔkya̧, doo wɔrɔ anbɔ sɛw hi taa Kristu wáátɔ hi Bɛt ɔ̧nɛ dako.

⁶Bɔ doo gi maatinnɛ dɔgl tɔs, ya̧a̧nɛ a hin wɔrɔ hi dɔŋg ro Bɛt nɔɔtigɔ gi zaak a dood wɔ hi gisig zulɓaasig hi zulha.

⁷Bɔnɛ ɔks hi hii nɛ zaŋ.

⁸Amntɔnɔ nɛ da nɛ gi nɛ lɛlwilɔ, yɛrɛ nɛ gi lɛlgaal a ɔksig nɛ bɔ gedu hi Waar Yeesu. Ɛmbin an lɛlgaal waato!

⁹Ya̧a̧nɛ lɛlgaal humlɔ gɔ fu̧u̧ a rɔbgɔk du, a hinriit yɔ gi gedu, a rɔb du sɛw.

¹⁰Seen hinyɔ gɔ gi har Waar Yeesu gii nɛ woo.

¹¹Bɔnɛ ɔks a lɛlwil woos tɔs wɔ dood hi wook gedu, hinya̧ hi ɗɛ̄ɛ̄ an hi gaa huml rɔb gɛ. Yɔ bɛrɔ midinɛhi a lɛlgaal du.

¹²Ya̧a̧nɛ hinwɔ dood wɔrɔ hi wook a yaatillɛl du bookɔ hɛw gàà seemɛ.

¹³Yɔ anbɔ lɛlgaal gi mid woos wɔrɔ, hi gihi gbɛnik rɔbtɔnɔ. Yɔ anbɔ, lɛlgaal gi gɔ gaas hin sɛw an hi gbɛnihi.

¹⁴Hinɔ gii hi raa hinɔ: a rɛmha, mɔɔ yɔ mɔ yoko, ɗundum a wɔrkɛ wɔ hi tees du! Kristu gii gi gaasumɔ an ɔ̧ti.

¹⁵Oon zul nɛ hi ɛmbil nɛ yɔ nɛ ɛmbik rɔbtɔnɔ, bɔnɛ ɛmb an wɔ hin gɔ wagihi. Ɛmbin an wɔ hi mɛɛhinɛ.

¹⁶Bɔdinnɛ ɔ̧t yɛrɛ hi woos rɔb yɔ gɔ nɛ ɗɛɛg wook sɛw, waal ha̧a̧tiro, ya̧a̧nɛ.

¹⁷Yɔ anbɔ, bɔnɛ kɔm an dood wɔ hi taan zul gɛ. Nɛnɛ mɛɛn hinyɔ Bɛt gig ha̧a̧k a nɛɛge.

¹⁸Bɔnɛ wɔn bumɛ: gi zɛlk hinɛ, kpoos nɛ hi̧i̧sige hi Bɛt Mɔkilɔ,

¹⁹anyɔ nɛ ɛɛk Dawda hin-ɛɛnɛ, hi hin-ɛɛn zaadɛ Bɛt ɗɔbsingoyaadɛ, hi hin-ɛɛn Bɛtbaanikya yɔ Bɛt Mɔkilɔ gin gaako, ɛɛnhinɛ nɛ waa Waar Yeesu ɗɔbsig hi hin nɛ ɛɛn bɔ hi kpoos nɛ sɛw,

²⁰nɛ wɛɛ nɛ waa Baaba yɔ gi Bɛto baanik a hinyɔ gi hage sɛw hi Waar wɛ Yeesu Kristu nuŋgɔ.

²¹Bɔbe tiisig zulɔ a naaza dɔŋdi anyɔ hoob gig ha̧a̧k Kristu.

²²Nɛɛdɛ, tiisin zul nɛ a wal nɛ hi dɔŋdi anyɔ nɛ titsig Waar Yeesu be.

²³Wal gi nis bɔ zul ɔ̧ɔ̧nɛ anyɔ Kristu gi fɔkɔya wɔ hi gi muulɔ zulya̧ be, gi za̧a̧sigyaya̧ be.

²⁴Gbunɔ gii anyɔ Yeesu fɔkyaadɛ hi tiisig zulya̧ a Kristu dɔŋdi, nɛɛd wɔ yɛhi gi anbɔ hi walya̧ a hinyɔ gi gedu sɛw.

²⁵Walɛ wɛ, yɛgi ha̧a̧nɛ a nɛɛɗ nɛ hi muulɛ anyɔ Kristu ha̧a̧ge a Yeesu fɔkyaadɛ ɔksilya̧ bɔ ge gi gaa zulɔ a hi dɔŋgo,

²⁶an gi gaasihi hi Bɛtmɛmɛ hi Bɛtɗɔglɔ, gi wɛɛnihi Bɛt doodɔ gaatɛ.

²⁷Yɔ anbɔ Yeesu ha̧a̧g nɛ an gi gbaa fɔkɔya wɔ a gi muut du an nisɔ lool gbɔlumsya yɔ bɛrɔ, gi gaa, gi taan libto, muulɔ yɔ̧ɔ̧ gɛ, zaabe, hinza yɔ riitin anbɔ, yɔ gaa rɔbtɔnɔ, hin-a̧a̧b za dɔɔm gi taa a ge gɛ.

²⁸Walɛ wɔ yɛgi ha̧a̧hi a nɛɛdya̧ muul anbɔ an muul ya̧nɛ. Za̧a̧nyɔ ha̧a̧g anbɔ a nistɔ ge, ha̧a̧g zul ɔ̧ɔ̧nɛ.

²⁹Doo za taa an gi hɛ̧ɛ̧n zulɔ lɔlɛ; gi kaŋkig muulɔ rɔbtɔnɔ, gisig lees leko, anyɔ Kristu gis fɔkɔya wɔ ɔksilya̧ gɔko,

³⁰anyɔ wɛ gi muul dɛɛt a muulɔ gbɔɔl bɔ gi muulɛ.

³¹Ya̧a̧nɛ wal gi ɔɔ baatɔ hi nɔɔtɔ gi ɔks hi nistɔ, hi eer sɛw hi wɛɛ muul gbunu.

³²Gi midig dɔgl dubt gbɔɔl yɔ doo hi mɛɛ gɛ giya. Mi dɔk hinyɔ gi seek Kristu hi fɔkɔya wɔ ɔksilya̧ giya.

³³Hinyɔ wagɔ bɛr an bɔ sɛw gi ha̧a̧ge a nistɔ muulɛ an zulɔ, nis be, yɛgi ɗɔbs waltɔ.