Read Doyayo EFESU 6 Bible Online

EFESU 6 - Doyayo bible

EFESU 6

¹Nɛɛ ya̧a̧mwaat wɛ, a ɔksig nɛ bɔ hi Waar wɛ Yeesu gedu, lagsin baa nɛ hi nàà nɛ hii tɔnɛ, hinɔ gii rii.

²Ya̧a̧nɛ, Bɛt ɗɔgl raa a ɗɔbsum baa mɔ hi nàà mɔ, hinɔ gii gi dɔgl doos yɔ ɔksin hinyɔ Bɛt raa a gi woo,

³an hinɔ gi resum rɔbtɔnɔ, an yɛ̧ms mɔ gi zi̧i̧b hɛbtdi.

⁴Nɛya, baa wɛ, bɔnɛ nɔɔs waat nɛ kpoosɛ, kaŋkinɛhi, boonɛhi, gogsinɛhi hinɛ anyɔ Waar Bɛt ha̧a̧ge.

⁵Nɛɛ gbaarɛ wɛ, lagsin ɗɛntɛ nɛ wɔ a waal du tɔn hi hoobo, hi kpoosbeeki, hi kpoos nɛ gbunu anyɔ nɛ lagsig Kristu.

⁶Woon an Kristu woosɔya rɔbɛ wɔ hi fɔk Bɛto hi hinyɔ ha̧a̧g hi kpoos rɔbo, bɔnɛ woo a hi lɔlgbar kpɔd an dood gɔ hi gbɛn gi harihi.

⁷Woosin ɗɛntɛ nɛ wɔ woos rɔbtɔnɔ hi hato an nɛ gi nɛ woosig Waar Yeesu ɔ̧ɔ̧nɛ, taa an nɛ woosig dood ya̧a̧nɛ.

⁸Nɛ mɛɛ a hinyɔ doo gi wook sɛw, gigi gbaari, zaabe gi taa gbaar gɛ, hinza gɔnig gɛ, za̧a̧nɔ gi dag hinyɔ woo rɔbtɔnɔ dɔɔrɔɔsɔ a Waar Yeesu ge.

⁹Nɛɛ be, ɗɛntɛ wɛ, woonhin gbun bɔ gii a hi gbaŋgi, bɔnɛ ya̧ksihi lɔlɛ, wɛ mɛɛ a ɗɛntya̧ hi ɗɛnt nɛnɛ gi a bɛtha. Wɛɛ a gi muutdu doo gɛ̧ksig taaro.

¹⁰Yɔ̧ɔ̧sumɔ, nɛya waan tɛŋk nɛ i̧i̧ki hi Waar Yeesu fɔkɔ a tɛŋkɔ yɔ ɗɛɛ gedu.

¹¹Hegin Bɛt wɔdɔ nɔkgɔnikya wɔ muul sɛw an nɛ dag tɛŋk enuko hi an nɛ ɗɛɛn loorɛha̧a̧l kɛ̧ɛ̧tig wɔ gɔ sɔɔtin doodɛ hi woosɔ maatilya wɔ.

¹²Ya̧a̧nɛ wɛ taa wook gabs hi doo, wɛ wook hi tɛŋk gbɔlɛ wɔ hi gi bɛtha, hi lɛlwil bɔ waar ɛ ɔ̧ɔ̧ wɔ hi gi a waalidu hi mɔkil ha̧a̧l wɔ hi gi a bɛtha waalɔ du.

¹³Ya̧a̧nɛ loon Bɛt nɔkwɔdɔ wɔ sɛw an nɛ dagn tɛŋk a ɔ̧t ha̧a̧l bɔ gedu nɛ er hi kpoos nɛ gbunu gɔ nɛ da̧a̧s hin sɛw.

¹⁴Erin hi kpoos gbunu, malin rɔb yɔ gi an hi̧i̧lɛ a nɛ seedu, hegin hinriit nɔkwɔd gbandil nɛ hɔŋha.

¹⁵Ɛmbinnɛ Yeesu Dɔglɔ Rɔb bɔ yɔ gi gaak dood boolum a kpoos du, hegin gii an taal a dɔɔ du.

¹⁶Loon ɗɔbsig gɔŋk gbɔɔlɛ a hin wɔrɔ geha sɛw an nɛ nimn loorɛha̧a̧l bɔ seeɔ wɔ hi kabzig an laazebti;

¹⁷loon za̧a̧tig danɛ kubtin tusya bɔ hi Bɛt Mɔkilɔ daŋbɛsimɔ yɔ gi Bɛt dɔglɛ.

¹⁸Waan Bɛt zɔ̧ki hi kpoos nɛ sɛw anyɔ Bɛt Mɔkilɔ goksinɛ. Kpoos nɛ waag a geha hi mɔkil nɛ sɛw, zɔ̧bsin Bɛt doodɔ wɔ hi gi sɛw Bɛto.

¹⁹Zɔ̧bsin mii hɛw Bɛto an gi gaam tɛŋko gɔ mi kpɛ̧ɛ̧r ya̧a̧ mi, hi kpoos ɓaasigi, mi dɔks dood Dɔgl Rɔb dubt yɔ doo mɛɛ gɛ mi wadsihi hinɔ bɛttɔnɔ.

²⁰Mi gi Yeesu dɔglɔ tɔmsya an mi woowoosɔ giya. Ya̧a̧nɛ hi wa̧a̧nim ba̧a̧ntusɛ. Zɔ̧bsinmi Bɛto an gi gaam tɛŋko, an mi book dɔglɔ hi walumsɛ.

²¹Tikikus, saam mi yɔ ha̧a̧m a ge hi Bɛt hato, woosya yɔ gi wook Waar Yeesu woosɔ hi tɛŋko gi raasin hin sɛw an nɛɛ hɛw nɛ mɛɛ ɗɔɔtil mi hi hinyɔ mi wooko.

²²Mi gig nak yaak a nɛɛge an nɛ mɛɛ ɗɔɔtil wi, gi wɛɛ gi dɔksin hinɛ an kpoos nɛ gi kusɔ.

²³Yɛ̧ɛ̧dɛ wɛ, an Baa Bɛto hi Waar wɛ Yeesu Kristu hi gaanɛ boolumi hi hato, hi ɗɔbsigi.

²⁴An gɛmsil gi gi hi dood wɔ ha̧a̧hi Waar wɛ Yeesu Kristu hi ha̧a̧tig yɔ gɔ kug gɛ hi zulha sɛw. Aanbɔ!