Read Doyayo FILIPI 1 Bible Online

FILIPI 1 - Doyayo bible

FILIPI 1

¹Mii Pol , hi Timɔte, wii bi̧i̧ ɗɛɛrwol yɛrɛ. Wi gi Yeesu Kristu woosyaadɛ ɔ̧ɔ̧nɛ. Wii gi yaasig Bɛt doodɔ, Yeesu Kristu ɗɔbsigya wɔ hi gi a Filipi sɛw, hi Bɛt wooszulyaya̧ hi woosɗaakyaya̧ wɔ.

²An Baa wɛ Bɛto hi Waar wɛ Yeesu Kristu hi gaanɛ gɛmsili hi boolumi!

³An bili mi gin mɔkugo, mi gi baanik Bɛt mi a nɛ zulɛ.

⁴Nɛɛ sɛw, mi gisin waak Bɛt zɔ̧ki hi hato a mi zɔ̧k du sɛw,

⁵anyɔ nɛ ta̧a̧ Dɔgl Rɔb bɔ woosɔ, nɛ ɗaasim dɔglɔ dɔko a ɔ̧tyɔ baar gedu gi tuur nɛɛko.

⁶Mi mɛɛ rɔbtɔnɔ a Bɛt yɔ yɛɛl woos rɔb bɔrɔ a nɛ kpoos du gi gbor wooki gi tuur gi da̧a̧ a Yeesu Kristu wɛɛzigɔ bɔ gedu.

⁷Gid mi mɔkig anbɔ a mi kpoos du a nɛ zulha sɛw, riiri, mi gin wa̧a̧k mi kpoos du ro ya̧a̧nɛ. Bɛt gɛmsilɔ gi hi miya, an ɓɔryɔ hɛw, yɔ mi gi a luknɔ du, zaabe an yɔ mi gin nɛ zul mi aakil du an mi ka̧d Dɔgl Rɔb bɔ mi wɛɛ mi zuns dood a gi rɔbo hi Bɛt Mɔkilɔ tɛŋkɔ. Nɛɛ sɛw nɛ ɔks hi mii a Bɛt gɛmsilɔ bɔ gaam gedu.

⁸Bɛt mɛɛ a mi dɔk rɔbo anyɔ mi ta̧a̧ a ha̧a̧m gbɔɔltɔnɔ a nɛɛge sɛw, nɛ ha̧a̧sim an mɛmɛ, anyɔ Yeesu Kristu ha̧a̧tigɔ gi mi kpoos du.

⁹Zɔ̧kyɔ mi ɛrk a Bɛt ge gɛ: a mi ɛr Bɛto an ha̧a̧tig nɛ gi tɔɔ gi re doosɛ, doosɛ, nɛ kɛm hin bɛttɔnɔ nɛ wɛɛ nɛ mɛɛ dɔgl yɛ̧ɛ̧ki,

¹⁰an nɛ her hinyɔ rii gi daarɔ, anbɔ, nɛ gáa a Bɛt muutdu, nɛ taa ginik a̧a̧bi a ɔ̧tyɔ Kristu gɔ gi zaa gi gbaa dɔgl gedu.

¹¹Waabil nɛ gi ɛmb hi woos riitɛ wɔ Yeesu Kristu gi wook hi nɛya hi tɔɔ du gbɔɔltɔnɔ an hi ɗɔbsin Bɛto hi baaninge.

¹²Nɛɛ yɛ̧ɛ̧dɛ mi wɛ, ha̧a̧m an nɛ mɛɛ bɛttɔnɔ an kosgumn yɔ zɛ̧mi ā̧a̧n Dɔgl Rɔb bɔ gɛ, ɗaa an gi rek doosɛ!

¹³Ya̧a̧nɛ waar gbɔɔl luk-ookya wɔ hi dood wɔ hi gi dihɛ sɛw hi mɛɛ ɓɔryɔ a mi gi luknɔyayɔ a Kristu dɔŋgo,

¹⁴wa̧a̧k mi bɔ a luknɔ du gaa yɛ̧ɛ̧dɛ kit wɔ tɛŋk a kpoos du an hi ɗɔbs Waar Yeesu gi daarɔ hi dɔg Bɛtdɔglɔ hi kpoosya̧ ɓaasigi, hoobhā̧ā̧hi hinza gɛ.

¹⁵Hi rɔb ɔnɛ dood zaadɛ hi dɔksig dood zaadɛ Kristu dɔglɔ an hi gɔ ka̧a̧s a mi zulha, zaabe anyɔ ha̧a̧hi hinfaltingo. Wɛɛ zaadɛ be, hi dɔk Kristu dɔglɔ hi kpoosya̧ rɔbo.

¹⁶Wɔrɔ hi gɔk hin anbɔ anyɔ ha̧a̧hi a Kristu muulɛ. Hi mɛɛ a Bɛt gaam Dɔglɔ Rɔb bɔ naan du an mi raas dood a Bɛt dɔglɔ gi rɔbo.

¹⁷Yɛrɛ dood wɔrɔ hi dɔk Kristu dɔglɔ hi mɔkil ka̧a̧syayɔ, hi dɔ́g hi kpoos gaat gɛ. Hi tɛk an hi tɔɔs ya̧a̧rhant mi a luknɔ du.

¹⁸Hin anbɔ labɔ sēem gɛ. An hi dɔg Kristu dɔglɔ an nɔ, an hi dɔk hi mɔkil ha̧a̧lɛ, zaabe hi dɔk hi kpoos rɔbo, Kristu dɔglɔ dɔɔgiy ɔnɛ, mi dag hat gedu. Hɔɔ, yɛrɛ mi wɛɛ mi waas hat daki.

¹⁹Ya̧a̧nɛ mi mɛɛ a hin wɔrɔ lab sɛw ya̧a̧rhant mi gɔ gi da̧a̧ sɛw mi zɛm tuusig mi luknɔ du a Bɛtzɔ̧k nɛ bɔ gedu hi ɗaak yɔ Yeesu Kristu Mɔkilɔ bɔ ɗaasim gedu.

²⁰Yɔ anbɔ, kpoos mi ta̧a̧ hinyɔ mi gbaa mɔkil mi hage: a seem taam wa̧a̧k nɛ zaŋ; kin mi za̧a̧ ya, kin mi wɔɔr ya, hinza gɛ. Hin gbɔɔl yɔ daarɔ, gɛ an waak yɔ mi waak muul yɛrɛ duge, mi ɗɔbs Kristu hi kpoos ɓaasigi an ɓɔryɔ zaabe ɔ̧t nuŋg sɛw.

²¹Ya̧a̧nɛ, minɛ, an mi za̧a̧ko, mi za̧a̧sig Kristu giya, wɛɛ wɔrk yɔ gɔ mi wɔrɔ gisim hingbɔɔlɛ a Kristu yɔ gi za̧a̧tig mi gi dɔŋgo.

²²Yɛrɛ gid mi waak za̧a̧tili mi ɗɛɛ an mi wɛɛ mi woowoos rɔb ɓɛ, nɛ mí mɛ̄ɛ̄ hinyɔ gɔ mi her gbun ma gɛ.

²³Minɛ mɔkil mi gɛ̧ɛ̧y lɛl eerɛ, ha̧a̧mi an mi ɔɔ waabil yɛrɛ mi rekɔ mi waa hi Kristu, gii bɛr gi daarlɛl gbɔɔltɔnɔ.

²⁴Nɛ yɛrɛ hinyɔ bɛr gi daarɔ a nɛ zulɛ, ɔmi waa kete (an mi gaan tɛŋk a ɗɔbsig du).

²⁵Hɔɔ giibɔ, ya̧a̧nɛ mi mɛɛ bɛttɔnɔ a mí ɗɔɔtɔ mi waa hi nɛɛ sɛw an mi ɗaasinɛ nɛ re doosɛ doosɛ, nɛ dag hato a ɗɔbsig nɛ bɔ gedu.

²⁶Yɔ anbɔ gɔ mi wɛɛ mi wɛɛz a nɛɛge, nɛ dagn gbɔnɔ an nɛ gɔns zul nɛ gbɔlums hi rɔb a mi dɔŋgo a ɔksil nɛ bɔ gedu hi Yeesu Kristu.

²⁷Hin gbunu: ɛmbil nɛ yɛgi bɛr gi riitin hi Kristu Dɔglɔ Rɔb bɔ. Zaabe an mi dag gbɔnɔ mi zaa mi seenɛ, zaabe mi dāg zaak a nɛɛge gɛ, mi kɛm ɔnɛ a hi dɔgl nɛ booko a nɛ waak hi kɔmbil nɛ gbunu hi mɔkil nɛ gbunu, nɛ kɛɛsig Dɔgl Rɔb bɔ ɗɔbsugɔ hi tɛŋko hi kpoos gbunu nɛ gig ka̧dugo.

²⁸Bɔnɛ ɔɔ lɔlhɛ̧ɛ̧niknɛya wɔ hi ha̧a̧sin hoob fɛŋ mɔɔti. Ya̧a̧nɛ hin bɔ lab Bɛt gii gihi zuunik a hi doo wagsigyaadɛyɔ, wɛɛ nɛɛbe nɛ dak za̧a̧tigyɔ.

²⁹Bɛt yɔ gaan gɛmsil an nɛ ɗɔbs Kristu, ɗɔbsig nɛ bɔ gii kpɔd gɛ, gaan gbɔnɔ an nɛ yɔ̧ya̧a̧r a gi dɔŋg be.

³⁰Ya̧a̧nɛ, yɛrɛ ɓɔryɔ nɛ gi ɔksig hi mii a gabs du. Gabs gbuna bɔ gii anyɔ nɛ da nɛ gbɛnim ɛmbiko, yɛrɛ nɛ kɛŋk dɔglɔ gii ma a mi waak ɛmbik gedu te.