Read Doyayo KOLOSIYA 1 Bible Online

KOLOSIYA 1 - Doyayo bible

KOLOSIYA 1

¹Mii Pol , Yeesu Kristu tɔmsɔya anyɔ ha̧a̧ Bɛto, hi yɛ̧ɛ̧ wɛ Timɔte. Wii gi bi̧i̧sig

²Bɛt doodɔ wɔ hi waak a Kolosiya ɗɛɛrwol yɛrɛ anyɔ nɛ ɔks hi Kristu nɛ ɗɔbsige. An Baa wɛ Bɛt gi gaanɛ gɛmsili hi boolumi!

³Gɔ wi gisin Bɛt zɔ̧ko, Bɛt yɔ gi Waar wɛ Yeesu Kristu Baatɔ, wi gisinge waak baaniki.

⁴Wi lag a nɛ ɗɔbs Yeesu Kristu, wɛɛ ha̧a̧n a Bɛt doodɔ wɔ sɛw hi muulɛ ya̧a̧nɛ,

⁵anyɔ nɛ gbaa mɔkil nɛ a hinyɔ Bɛt gbaasin a bɛtha ge, yɔ nɛ yɛɛl nɛ kɛm rɔb bɔ dɔglɔ a Dɔgl Rɔb bɔ gedu.

⁶Dood hi dɔk Dɔgl Rɔb bɔ gi yɛdig a waal du sɛw, hi ta̧a̧k dɔglɔ hi wɛɛ hi Yeesu Kristu ɗɔbsugo. Yɔ anbɔ dɔgl bɔ tuur a nɛɛge hɛw. Yɔ nɛ bɛɛ lako, nɛ́ wɛɛ nɛ́ kɛm gi tuusig Bɛt rɔbsɔ hi rɔbo, nɛ ta̧a̧ge. Hinɔ gii dɔgl bɔ gi yɛdugo gi gaak huml a nɛ teesdu hɛw.

⁷Saam wi rɔb Epafaras yɔ gi Bɛtwoosya an wiya gii goksin Bɛt dɔglɛ. Yɔ gisiw waak Kristu woosɔwook rɔbtɔnɔ be, wi ɗɛɛ an wi gbaa kpoos wi a ge.

⁸Epafaras gii raasiwi a yɔ nɛ waak ɔksig gbunu hi Bɛt Mɔkilɔ, gi nɛ ha̧a̧tingo gbɔɔltɔnɔ.

⁹Ya̧a̧nɛ, anyɔ wi bɛɛ dɔgl nɛ lako, wí ɔ̄sin Bɛt zɔ̧k gɛ, wi gisinge waak zɔ̧ki an gi ɗaasinɛ nɛ mɛɛ hinyɔ ha̧a̧g bɛttɔnɔ a hinyɔ gi gedu sɛw, anyɔ Mɔkilɔ gisin gok hin-mɛɛkɔ sɛw, hi hinkɛŋkɔ dubti.

¹⁰Yɔ anbɔ nɛ ɗɛɛ an nɛ ɛmb an Waar wɛ Yeesu waatɔ rɔbɛ, wɛɛ hinyɔ nɛ gɔk sɛw ɗɛɛ an gi harige, wɛɛ waabil nɛ taa kɔŋk hintɔs an tɛ̧ɛ̧yɔ kirkɔ. Ya̧a̧nɛ, nɛ wookwoos rɔbɛ kittɔnɔ hi tɛŋko, nɛ wɛɛ nɛ mɛɛ Bɛt gi daarɔ.

¹¹Wɛɛ Bɛt yɔ gin tɛŋk gbɔɔltɔnɔ a gi gbɔlums du, gi ɓatsin kpoos nɛ gi daarlɛlɛ an nɛ mɔmhinɛ nɛ oo lɛl a hinyɔ gi gedu sɛw.

¹²Nɛ gi baanik Baa wɛ Bɛt hi hato anyɔ gɛbsinɛ an nɛ wɛɛ rɔɔsdakyaadɛ hi Bɛt doodɔ zaadɛ lɛlgbunu a lɛlgaal waaldu a gi wáát du.

¹³Baa wɛ Bɛt tutsɛ zul wɛ a lɛlwil bɔ tɛŋkɔ gedu, wɛɛ ka̧wɛ a waaɔ yɔ ha̧a̧g gi muulɛ gi wáát du.

¹⁴Bɛt bitsɛ hinha̧a̧l wɛ a waaɔyɔ gaa kolɔ an inis gi dɔŋgo, wɛɛ zul wɛ tuu gɔ aakil du.

¹⁵Bɛt taa hin-gbɛnikya, Yeesu Kristu yɔ gi Bɛt riitinsɔ, zunsɛ Bɛto anyɔ giro. Yeesu gii Bɛt waa fu̧u̧s yɔ daar hinyɔ ki̧y sɛw.

¹⁶Bɛt da kim hin sɛw a bɛtha hi hɛbtdi hi Yeesu Kristu elo. Hinyɔ wɛ ɗɛɛ an wɛ gbɛnɔ, hi hinyɔ wɛ ɗɛɛ an wɛ gbɛn gɛ be, Bɛt ki̧hi sɛw hi Yeesu Kristu, tɛŋk gbɔlɛ wɔ hi waar ɛ wɔ, hi mɔkil nabl wɔ a bɛtha: Bɛt kim hin sɛw hi Kristu elo a gi zulɛ.

¹⁷Da amntɔnɔ a biitirnaandu yɔ hinza ki̧ynɛ gɛ, Yeesu Kristu da giiro. Wɛɛ hin sɛw gi kɔmbik lɛlɔge a gi naandu.

¹⁸Gii gi Yeesu fɔkya wɔ ɔksilya̧ sɛw zulya̧, hi gi an muulɔ. Bɛt yɛɛl woohin sɛw hi Yeesu , wɛɛ gi doo biitiri, gi waa fu̧u̧s yɔ rɛml a wɔrkɛ teesdu giya, an gi wɛɛ hin sɛw zulya hi gbɔnɔdorkya.

¹⁹Bɛt ha̧a̧sig an gii hi zulɔ gi waak a waawal muul du.

²⁰Wɛɛ kamz hinwɔ ki̧hi a hɛbtdi sɛw hi hinwɔ a bɛtha a gi dɔŋdi hi Yeesu an hi bool hi giya, a Yeesu ga̧a̧mɔ bɔ gubr dɔ̧ɔ̧r muul gi dɔŋgo.

²¹Amntɔnɔ nɛɛ hɛw nɛ da nɛ hɛml hi Bɛto. Nɛ wɛɛsig nɛ lɔlɔhɛ̧ɛ̧nikyaadɛ a mɔkil nɛ ha̧a̧l dɔŋgo hi woos nɛ ha̧a̧l wɔ nɛ wooko.

²²Yɛrɛ Yeesu Kristu wɛɛ kamzin a Bɛt dɔŋdi an nɛ bool hi giya. Bɛt ta̧a̧ waaɔ wɔrkɔ a muulɔ wɔrkil bɔ gedu an hin naandɛmsya, an Yeesu gi wɛɛnin dood gaatɛ wɔ kpoosya̧ taan hin ɓi̧i̧limya, zaabe yɔ taan hin-a̧a̧bi a gi muutdu.

²³Hin gbunu: waan ɗɔbsig hi tɛŋko, bɔnɛ ɔɔ dɔglɔ. Bɔnɛ ha̧s mɔkil nɛ a hinyɔ Dɔgl Rɔb bɔ raasin hage. Nɛɛ nɛ lag dɔglɔ, wɛɛ hi dɔks dood a waal du sɛw. Mii Pol , Bɛt yaazimi an woosɔya an mi dɔks dood Dɔglɔ Rɔb bɔ.

²⁴Yɛrɛ yɔ mi ya̧a̧ryɔ̧k a nɛ dɔŋgo mi dag hat gbɔɔltɔnɔ. Mi ya̧a̧ryɔ̧k an Yeesu Kristu da yɔ̧ nɛ be, mi wɛɛ mi baksig hinyɔ zɛ̧ɛ̧r a Kristu ya̧a̧rhantɔ bɔ gedu a Yeesu fɔkya wɔ ɔksilya̧ yɔ gi an muulɔ sɛwi hi zulɛ.

²⁵Mii mi wɛɛ fɔkɔya wɔ woosyaya̧ anyɔ Bɛt gaam woos bɔ naandu a nɛ gbaŋgi an mi dɔksin dɔglɔ sɛw bɛttɔnɔ.

²⁶Da amntɔnɔ dɔgl dubt bɔ da yaatɔ, yɔ anbɔ dood dɔ̧ɔ̧t kitɛ wɔ anyɔ zaŋya̧ fɔbɔ a wɛl kitɛ wɔ hidu hi mɛɛ gɛ. Yɛrɛ Bɛt zuns doodɔ gaatɛ wɔ dɔgl dubt bɔ zunsɔ.

²⁷Dɔgl dubtyɔ tɔɔ gi daar hin zaadɛ sɛw a dood wɔ hi taa Yahuduyaadɛ gɛ hi teesdu, gɛ Kristu gi waak ɔksig gbun hi nɛya, nɛ gbaak mɔkil nɛ a ge, a nɛ tuur a Bɛt gbɔlums du. Bɛt ha̧a̧g nɛ an gi zuns doodɔ hii dɔgl dubt yɛrɛ gbɔlumsɔ yɔ daarlɛlɛ.

²⁸Ya̧a̧nɛ wi book Kristu dɔglɔ. Wi raasig dood an hi oo zulya̧ gbunu gbunu, wi wɛɛ wi gisihi hingok gbunu gbunu hi hinmɛɛk gbɔɔltɔnɔ. Anbɔ, gɔ wi gbaahi a Bɛt muutdu, bɔbe gi ram gi da̧a̧ a waabilɔ ɔksig gbun bɔ hi Kristu gedu.

²⁹Hinyɔ mi ɓɛɛk giibɔ. Mi wook anbɔ hi mɔɔt gbɔɔltɔnɔ hi Bɛt tɛŋkɔ yɔ Yeesu Kristu gaami. Tɛŋkɔ bɔ gii gi wook mi muuldu gbɔɔltɔnɔ.