Read Doyayo KOLOSIYA 2 Bible Online

KOLOSIYA 2 - Doyayo bible

KOLOSIYA 2

¹Ha̧a̧m an nɛ mɛɛ woos mi gbɔɔl ɓaatil yɔ mi ɔ̧ɔ̧sig a nɛ dɔŋgo hi a dood Lawdikiya wɔ hi dɔŋgo, hi dood zaadɛ wɔ hi gbɛn muut mi ket gɛ hi dɔŋgo,

²ha̧a̧m an kpoos nɛ gi er hi tɛŋko nɛ ɔks a hatdu. Yɔ anbɔ nɛ wɛɛ an rɔɔsyaadɛ a hinmɛɛk gbɔɔl bɔ gedu, nɛ wɛɛ nɛ mɛɛ Bɛt dɔgl dubt bɔ dood hi mɛ̄ɛ̄ nɛ gɛ, yɔ gi Kristu.

³Hinmɛɛk dubti hi hinmɛɛkzayɔ gi sɛw rɔɔsya̧ hi yaatɔ a Kristu ge.

⁴Mi raahi n bɔ lab an bɔ doo za gi maatin hi dɔgl hɛmntɛ ya̧a̧gɔ̧ɔ̧nyaadɛ wɔ hi gisin dɔko.

⁵An mi taa nɛ teesdu gɛ si̧, mɔkil mi ɔnɛ gi nɛ tees du. Yɔ mi lag a nɛ wa̧a̧k zul nɛ bɛttɔnɔ, nɛ wɛɛ nɛ gi ɗɔbsig Yeesu Kristu hi tɛŋk be, kpoos mi bɛsimi.

⁶Yɛrɛ anyɔ nɛ ta̧a̧ Yeesu Kristu an Waar wɛ gbɔɔlɛ, ɛmbin nɛ waa ɔksig gbun hi giya.

⁷Wɛɛ gi an nɛ dag tɛŋk nɛ a ge an tɛ̧ɛ̧yɛ̧ɛ̧s a hɛbtdi, nɛ́ gi tɔɔko a gi naandu an luk yɔ hi wɔŋko, wɛɛ ɗɔbsig nɛ gi gi erk bɛttɔnɔ, anyɔ hi goksinɛ; nɛ wɛɛ nɛ gi waak Bɛt baanik hi hat gbɔɔltɔnɔ.

⁸Erin bɛttɔnɔ an bɔ doo za gi maatin hi hinmɛɛkɔ dubtɛ wɔ, zaabe hi dɔgl zaadɛ maatilya tɔs wɔ anyɔ dood gɔ hi goko, gi wɔɔl hinrɔb yɔ Bɛt gaan kpoos du. Hinmɛɛkɔ tɔs bɔ fu̧u̧z a Kristu ge gɛ, fu̧u̧z a dood mɔkil du, zaabe a waal mɔkil du.

⁹Bɛt hi zulɔ hi gikɔ bɔ gi sɛw gi waak a Yeesu Kristu yɔ wɛɛ doo gi muuldu.

¹⁰Nɛɛ hɛw anyɔ nɛ ɔks hi giya, nɛ dag Bɛt za̧a̧tigɔ bɔ fu̧u̧z a ge an kpoos nɛ gi hi̧i̧sɔ. Yeesu Kristu gii gi tɛŋk gbɔlɛ wɔ hi waar ɛ wɔ sɛw zulya̧.

¹¹Anyɔ nɛ ɔks hi Yeesu Kristu nɛ naab hɛw. Dɔms nɛ bɔ be taa an dood dɔmsɛ, gi Kristu woosɔ yɔ ha̧s mɔkil nɛ amntɛ wɔ tɛŋkya̧ nɛ mɔktsig nɛ zul nɛ a nɛ kpoosdu giya.

¹²Yɔ nɛ loo Bɛtmɛmɛ, Bɛtmɛm bɔ zunsin a nɛ gi an wɔrkɛ wɔ hi i̧i̧hi loor du hi Yeesu el giya; wɛɛ yɔ Bɛt ɗunsige, nɛɛ hɛw Bɛt ɗunsin hi Yeesu elo anyɔ nɛ ɗɔbs Bɛt tɛŋkɔ yɔ ɗunds Yeesu a wɔrkɛ teesdu be.

¹³Amntɔnɔ yɔ nɛ dāg nɛ dɔms rɔb bɔ Bɛt ɛr gɛ, Bɛt da gin seek an wɔrkɛ a nɛ hinha̧a̧l dɔŋgo. Yɛrɛ Bɛt wɛɛ ɗunsin hi Yeesu elo a wɔrk du, wɛɛ bitsɛ hinha̧a̧l wɛ sɛw.

¹⁴Yɔ wɛ da wɛ taa nɛ maakɔdɔglɔ fɔk gɛ, wɛ gin nɛ Bɛt belkɔ wɛ zulha. Bɛt wɛɛ ɔsɛ belk bɔ, pugd belk bɔ bi̧i̧ nɛ a ɗɛɛrwol du, wɛɛ taar belkɗɛɛrwol bɔ doog a dɔ̧ɔ̧r ha an wɛ mɛɛ a bitsɛ belk bɔ dɔglɔ da̧a̧da̧.

¹⁵Yɔ Kristu wɔr a dɔ̧ɔ̧r ha, ɗɛɛ loorɛha̧a̧l tɛŋkya wɔ a bɛtha hi hɛbtdi sɛw, wɛɛ ul gabs bi̧i̧ an wɔ gɔ hi lagɔ hi mɛɛ sɛw a ɗɛɛhiɗɛ.

¹⁶Yɔ anbɔ bɔnɛ ɔɔ doo za gi gbaasin dɔgl a hinlek dɔŋgo, hi hinyɔ̧k dɔŋgo, hi ɔ̧t gbɔlɛ wɔ fɔkɔ hi dɔŋgo, hi a naab-ɔ̧t wɔ fɔkɔ hi dɔŋgo, zaabe a holum-ɔ̧t dɔŋgo.

¹⁷Hin amntɛ wɔrɔ sɛw hi gi an hinwɔ gɔ hi tuur sɛw zeks ya̧a̧nɛ. Zeksya̧ hi taa hinrɔbo, hi zuunik hinyɔ gɔ gi midza gii kpɔd. Za̧a̧n rɔb bɔ hi gbɛn zeksɔ, gɛ Kristu.

¹⁸Dood zaadɛ Bɛt walɛsɛrɛ ɗɔbsigya hi giro, wɔ hi book gɛrs wɔ hi gbɛn dɔglya̧, an bɔ hɛw gihi seek an hi gi zultiisigyayɔ. Hi pɛɛk zulya̧ ya̧a̧rɛ anyɔ mɔkilya̧ waal-duya gisihi gɔko. Bɔnɛ ɔɔ dood wɔrɔ lab hi wɔɔl dɔɔrɔɔs nɛ bɔ nɛ dak a Bɛt ge.

¹⁹Hi tā̧ā̧ ɔksig hi Kristu yɔ gi zulya̧ gɛ. Yeesu doodɔ sɛw hi gi an muulɔ. Muul bɔ sɛw dag tɛŋkɔ a zul bɔ ge. Wɛɛ dɔ̧ksillɛl wɔ hi yɛ̧ɛ̧m wɔ hi wa̧a̧k muul bɔ hi gig ɔksugo, hi sɛw hi tɔɔko anyɔ Bɛt gihi tɔɔsugo.

²⁰Yɔ Kristu wɔrɔ, nɛɛ hɛw nɛ wɔr hi giya. Yɔ anbɔ waal mɔkil wɔ hi zɛnɛ an wɔrkɛdɛ. Hi taan tɛŋk nɛ zulha. Ri nɛ ɛmbik an dood waalduyaadɛ nɔ? Ri nɛ ta̧a̧k hinlisya̧ wɔ nɔ?

²¹Hinlisya̧ wɔ gɛrɛ: a bɔmɔ ki̧i̧, bɔmɔ le, zaabe bɔmɔ mɔbɔ.

²²Hinlis wɔrɔ gɔ hi wuu gɛ, hi wɛɛk hintɔs nɔɔko, anyɔ dood dɔgl gi hinya̧ tuusugo, wɛɛ dood gi hinya̧ goko.

²³Hin wɔrɔ sɛw hi gi hintɔsyɔ. Dood zaadɛ be, gɔ hi mɔkig a hinɔ bɛɛrɔ anyɔ hi lag a hinmɛɛk gbɔɔl gidu a rı̄ı̄ an nɛ ɗɔbs Bɛt gi gbun gɛ, tiisin zul nɛ wɛɛdisɛ a Bɛt walɛsɛrɛ wɔ hi tɛŋk gbɔlɛ wɔ sɛw hi dɔŋdi, wɛɛ ha̧a̧nin muul nɛ ya̧a̧rɛ. Dɔgl wɛrɛ sɛw hi gi hintɔsyɔ. Hinmɛɛk ya̧a̧gɔ̧ɔ̧nya bɔrɔ lab gi ɗaasig dood wɔ an hi fɔb ɗɔkumya̧ ha̧a̧l wɔ hii kpɔd.