Read Doyayo KOLOSIYA 4 Bible Online

KOLOSIYA 4 - Doyayo bible

KOLOSIYA 4

¹Nɛɛ ɗɛntɛ wɛ, kaŋkin gbaarɛ nɛ wɔ rɔbtɔnɔ anyɔ bɛrɔ. Bɔnɛ zɛnɔ, nɛɛ hɛw nɛ gin ɗɛnt nɛ a bɛtha be.

²Waan Bɛt zɔ̧k hi tɛŋko, bɔnɛ mɔɔ baanukɔ.

³Wɛɛn nɛ zɔ̧bsiw Bɛt hɛw, an Bɛt gi kpɛ̧rsiw gbɔnɔ a dɔglɔ bɔ gi gbaŋgi an wi dɔks dood dɔgl dubt bɔ hi mɛ̄ɛ̄ nɛ gɛ yɔ gi Kristu dɔgl ɔnɛ. Mi gi hɛdi a luknɔ du a Bɛtdɔgl dɔk dɔŋgo.

⁴Nɛ zɔ̧bsim Bɛto an gi ɗaasimi an mi wads dood Bɛtdɔglɔ dubt bɔ rɔbtɔnɔ anyɔ rii.

⁵Yɔ nɛ gi ɛmbik a dood wɔ hi mɛɛ Waar Yeesu gɛ hi teesdu, oon zul nɛ rɔbtɔnɔ. A ɔ̧tyɔ Bɛt gɔ gi gaan gbɔnɔ an nɛ zuun ɗɔbsig nɛ gedu, bɔnɛ ɔɔ hinɔ gi waginɛ.

⁶Waan dɔgl nɛ book hi ya̧a̧hɛmnti, hi Bɛt hoobo an manda yɔ gɔ hi yaak bis du, an nɛ mɛɛ dood hin-ɛrkya̧ wɔ ta̧a̧kɔ bɛttɔnɔ.

⁷Tikikus gi fɔksin dɔgl mi sɛw. Gii gi saam wɛ rɔb a Bɛt gbɔnɔ du, gi Bɛtwoosya yɔ rii an hi gbaa kpoos a ge, gi wook Bɛt woosɔ hi tɛŋko hi miya.

⁸Ya̧a̧ gii mi gig yaazig a nɛɛge an gi fɔksin dɔgl mi bɛttɔnɔ, gi wɛɛ gi ɓatsin kpoos nɛ.

⁹Mi gig yaak hi Onɛsimus hɛw. Gi doo nɛɛnɛ, gi saam wɛ rɔb a Bɛt gbɔnɔ du, yɔ rii an hi gbaa kpoos a ge. Hi eerɛ hi fɔksin hinyɔ gi daak hɛdi sɛw.

¹⁰Àristarkus yɔ gi a luknɔ du hi miya, raa a mi boon du. Barnabas fabtɔ Markus raa a mi boon du hɛw. Nɛ́ nɛ dag ya̧a̧ a gi zul da̧a̧da̧ ma mi? Gi zaa a nɛɛge, nɛ dagig bɛttɔnɔ.

¹¹Yeesu yɔ nuŋgɔ zaa a Yustus raa a mi boon du sɛw. Hi taarɛ hi wootingo Bɛt wáát woos hi miya. Hi sɛw hi gi Yahuduyaadɛyɔ. Hi ɗaasim gbɔɔltɔnɔ. Yahuduya zaadɛ wɔ hi ɗaasim a Bɛt woos du, hi taaro.

¹²Epafaras raa a mi boon du. Nɛ mɛɛ a gi doo nɛnɛ hɛw, wɛɛ gi Yeesu Kristu woosɔyayɔ. Gɔ gisin Bɛt zɔ̧k hi tɛŋko, zɛnin gɛ zaŋ, an Bɛt gi ɗaasinɛ nɛ ram gi da̧a̧ a gi dɔgl du an nɛ er bɛttɔnɔ a Bɛt gbɔnɔ du, nɛ wɛɛ nɛ mɛɛ hinyɔ Bɛt ha̧a̧g sɛw rɔbtɔnɔ hi kpoos nɛ sɛw.

¹³Mii mi gbɛn woosɔ gbɔɔl gi ɔ̧ɔ̧sig a nɛ dɔŋgo, hi dood wɔ hi gi a Lawdikiya hi a Hirapolis hi dɔŋgo. Yɔ mi gbɛn woosɔ hi lɔl mi gii mi ɗɛɛ dɔglɔ bookɔ.

¹⁴Saam wɛ rɔb Luka yɔ gi dokta bɔ hi Deemas sɛw hi raa a mi boon du.

¹⁵Nɛ boo yɛ̧ɛ̧dɛ Yeesu fɔkya wɔ a Lawdikiya du, hi zaa hi nis bɔ Nimafa hi dood Yeesu fɔkya wɔ gɔ hi gi mɔksig a gi raa du.

¹⁶Gɔ nɛ zaŋg ɗɛɛrwol yɛrɛ gi da̧a̧, nɛ yaa ɗɛɛrwol bɔ a dood Yeesu fɔkya wɔ a Lawdikiya hii an hi zaŋgin hɔ hɛw. Nɛ wɛɛ nɛ zaŋg ɗɛɛrwol bɔ mi da mi bi̧i̧s dood Lawdikiya wɔ.

¹⁷Nɛ raa Arkibus a ri ya, nɛ raag a gi da̧a̧s woos bɔ Waar wɛ Yeesu da gaag an gi woo.

¹⁸Mii bi̧i̧ dɔgl yɔ̧ɔ̧sum wɛrɛ hi zul mi: Mii Pol , mi boonɛ. Bɔnɛ zɛn a mi gi a luknɔ du. An Bɛt gɛmsilɔ gigi hi nɛya! Aanbɔ!