Read Doyayo 1 TESALONIKI 1 Bible Online

1 TESALONIKI 1 - Doyayo bible

1 TESALONIKI 1

¹Mii Pol hi Silas hi Timɔte, wi bi̧i̧ ɗɛɛrwol yɛrɛ. Wi yaasig Yeesu fɔkya Tesalonikiyaadɛ ɔksilya̧ yɔ ɔks gbunu hi Baa wɛ Bɛto hi Waar Yeesu Kristu. An Bɛt gi gaanɛ gɛmsili hi boolumi!

²Wi waak Bɛt baanik a nɛ zulha sɛw. Wi waa wi gin mɔkig a wi Bɛt zɔ̧k du.

³Hinyɔ wi mɔk wi mɛɛk a Baa wɛ Bɛt muutdu, gɛ ɗɔbsig nɛ woos bɔ, hi hat nɛ woos bɔ, hi hinmɔŋk yɔ fu̧u̧z a kpoos nɛ gbaak bɔ a Waar wɛ Yeesu Kristu ge.

⁴Wi mɛɛ, yɛ̧ɛ̧dɛ wi wɛ, a Bɛt ha̧a̧g nɛya, sɛ̧ɛ̧nɛ an nɛ wɛɛsig dood ɔ̧nɛ.

⁵Yɔ wi dɔgsin nɛ Dɔgl Rɔb bɔ wi dɔ̄gsin hi dɔgl kpɔd gɛ, wi dɔgsin hi Bɛt tɛŋkɔ, hi Bɛt Mɔkil woosɔ, hi kpoos ɓaasigi a dɔgl yɔ gi rɔb wi gisin dɔk dɔŋgɔ ge. Yɔ anbɔ, nɛ mɛɛ waakyɔ wi waa a nɛ teesdu a nɛ zulɛ an wi ɗaasinɛ.

⁶Nɛɛ nɛ fɔ̀b wiya, nɛ fɔ̀b Waar Yeesu be. Anyɔ nɛ dag ya̧a̧rhant gbɔɔltɔnɔ a Dɔgl Rɔb bɔ gi dɔŋg si̧, nɛ ta̧a̧ge nɛ dag hat yɔ fu̧u̧z a Bɛt Mɔkilɔ ge.

⁷Yɔ anbɔ nɛ wɛɛs Waar Yeesu fɔkɔya wɔ a Makeduniya hi Akaya sɛw gbɔnɔdorkyaadɛ.

⁸Yɔ anbɔ, Waar Yeesu dɔglɔ fu̧u̧ nɛ lɛlɛ gi rek a Makeduniya hi Akaya kpɔd gɛ. Bɛt ɗɔbsig nɛ bɔ dɔglɔ rek tuur lɛl sɛw. An ay ɓɛ dood hi mɛɛ dɔglɔ mɛɛ, dɔgl wi taa du ma an wi boo dɔglɔ.

⁹Yɔ anbɔ, hii hi zulya̧ hi fɔkig a wi zulha dak yɔ nɛ dagiw a nɛ lɛlɛ hi maakwɔd wɔ nɛ ɔɔ, nɛ fɔk Bɛt za̧a̧til rɔb bɔ. Nɛ gisig kɛŋko.

¹⁰Nɛ wɛɛ nɛ ook an waaɔ Yeesu yɔ rɛmsig nɛ a wɔrk du gi wɛɛnig za̧a̧tig du gi fu̧u̧z bɛtha gi zaa. Gii giwɛ za̧a̧sig a Bɛt nɔɔtigɔ yɔ gɔ gi zaa dood zulha gedu.