Read Doyayo 1 TESALONIKI 3 Bible Online

1 TESALONIKI 3 - Doyayo bible

1 TESALONIKI 3

¹Yɛrɛ a yɔ̧ɔ̧sumɔ gedu wi ɗɛ̄ɛ̄ mɔŋk an wi oo zaa ma gɛ. Wi see bɛr an wi kɔm a Atena muk wi.

²Wi yaa yɛ̧ɛ̧ wɛ Timɔte yɔ gi wook Bɛtwoosɔ hi wiya gi dɔk Dɔgl Rɔb bɔ yɔ gi Kristu dɔglɔ. Wi yaag a nɛɛge an gi gaan tɛŋk gi ɓaasin muulɛ, nɛ er rɔbtɔnɔ a nɛ ɗɔbsig du,

³an bɔ̄ doo gbun nɛ teesdu gi ɔɔ muulɔ a ya̧a̧rhant yɔ wɛ waak gedu. Nɛ mɛɛ hi zul nɛ hɛw an ya̧a̧rhant wɔrɔ labɔ, Bɛt gii gbaasɛ.

⁴Yɔ wi da wi waak hi nɛya, wi dɔksin gaati a ya̧a̧rhant gi zɛ̧ɛ̧zɛ̧mɔ. Hinɔ gii tuurɔ, nɛ mɛɛmɛ.

⁵Ya̧a̧nɛ, anyɔ mi ɗɛ̄ɛ̄ an mi mɔm ook bɔrɔ zaa ma gɛ, mi yaa doo a nɛɛge an gi zaa gi dɔgsim dɔgl nɛ an mi mɛɛ ɗɔbsig nɛ yɔ nɛ ɗɔbsugo. Hoobha̧a̧m nɛ an bɔ loorɛha̧a̧l gi maatinɛ woos wi gi wɛɛ hintɔs.

⁶Yɛrɛ ɓɔryɔ Timɔte wɛɛz has kpoos wi hi ɗɔbsig nɛ dɔglɛ hi hat nɛ a yɛ̧ɛ̧dɛ Yeesu fɔkya wɔ hi dɔgl yɔ fɔksiwi. Raasiw a nɛ waa nɛ giw mɔkugo hi hato, gin ha̧a̧k an nɛ gbɛniwi an wii yɔ giw ha̧a̧k an wi gbɛnin be.

⁷Ya̧a̧ giya, yɛ̧ɛ̧dɛ mi wɛ, a zɛksil wɛ wɔ gedu hi a ya̧a̧rhant wɛ wɔ gedu sɛw, muul wi ɓaa a nɛ zulɛ, a ɗɔbsig nɛ bɔ gi dɔŋgo.

⁸Yɛrɛ, wi wɛɛ wi za̧a̧za̧ ɓɔri ma anyɔ nɛ waak erk rɔbtɔnɔ a ɔksil nɛ bɔ hi Waar Yeesu gedu.

⁹Gi an wi ɗɛɛ Bɛt wɛ baanukɔ ri a nɛ dɔŋgo a hat wɔ nɛ giwi gaak sɛw a gi muutdu nɔ?

¹⁰Lurk du hi yɛms du sɛw wi gi ɛrk Bɛt hi tɛŋko an gi gaaw gbɔnɔ wɛ gbɛntinu, wi baks hinyɔ zɛ̧ɛ̧r ɓɛ a ɗɔbsig nɛ bɔ gedu.

¹¹Yɛrɛ an Baa wɛ Bɛt hi zulɔ hi Waar wɛ Yeesu Kristu hi gɛms gbɔnɔ an wi rekɔ wi seenɛ!

¹²An Waar Yeesu gi woo an hat nɛ a yɛ̧ɛ̧dɛ fɔkɔya wɔ hi muul hi a dood muul sɛw gi rek doosɛ doosɛ, gi tɔɔ gi daarlɛlɛ, an hat wi yɔ gi tɔɔko gi gi daarik lɛl a nɛ muul be.

¹³Yɔ anbɔ Waar Yeesu gi gaa kpoos nɛ tɛŋko, gi es nɛɛ dood gaatɛ wɔ nɛ taan hin-a̧a̧bi a Baa wɛ Bɛt muutdu a ɔ̧tyɔ Waar wɛ Yeesu gɔ gi zaa hi doodɔ gaatɛ wɔ sɛw gedu.