Read Doyayo 1 TESALONIKI 4 Bible Online

1 TESALONIKI 4 - Doyayo bible

1 TESALONIKI 4

¹A hinyɔ zɛ̧ɛ̧r gedu, yɛ̧ɛ̧dɛ mi wɛ, anyɔ wi gogsin ɗɔɔtil yɔ gi an nɛ ɗɔɔtɔ an nɛ has Bɛt kpoosɔ, nɛ waak ɗɔɔtig anbɔ. Yɛrɛ ɓɔryɔ, wi ɛrinɛ wi gin tɛŋk gaak a ɔksil wɛ bɔ hi Waar Yeesu gedu, wɛɛn nɛ woo du anbɔ ɓɛ, gi daar lɛlɛ.

²Nɛ mɛɛ dɔgl wɔ wi gaanɛ hi Waar Yeesu tɛŋkɔ.

³Yɛrɛ hinyɔ Bɛt ha̧a̧g gɛrɛ: wɛɛn dood gaatɛ a gi muutdu, ɔɔn mansdɔglɛ.

⁴Doo yɔ gi sɛw mɛɛg muulɔ gbaak rɔbtɔnɔ gaattɔnɔ hi ɗɔbsigi.

⁵Bɔgi gin muulɗɔkum ha̧a̧lɛ an dood wɔ hi mɛɛ Bɛt gɛ gɔ hi wooko.

⁶Bɔ doo gi gɔs naaza hin-a̧a̧bi, bɔgi wɛɛs naaza ruu, bɔgi gɔ mans hi naaza nisɛ. Amntɔnɔ wi da wi raanra, wi dɔgsin bɛttɔnɔ nɛ mɛɛ be: a Waar Bɛt gi gbaas dood wɔ hi wookhin anbɔ dɔglɛ.

⁷Bɛt ēlɛ an wɛ waa a ɓi̧i̧lim du gɛ, elɛ an wɛ waa a gaatig du.

⁸Ya̧a̧ giya, za̧a̧nyɔ bis dɔgl yɛrɛ taa doo bisugo, bis Bɛt yɔ gin gaak Mɔkilɔ giya.

⁹An hinyɔ gi seek ha̧a̧tig dɔgl a yɛ̧ɛ̧dums du, a Yeesu ɗɔbsig du, taa an doo gi bi̧i̧sin hin a gi ha̧a̧nɛ a yɛ̧ɛ̧dɛ Yeesu fɔkya muulɛ, nɛ mɛɛ hinɔ da̧a̧da̧. Yɔ anbɔ, nɛɛ hi zul nɛ, Bɛt gogsin ha̧a̧tig yɔ gi an gi ha̧a̧tinnɛ.

¹⁰Nɛ wook anbɔ ro a yɛ̧ɛ̧dɛ wɔ hi gi a Makeduniya hɛbt du sɛw hi gbaŋgi. Yɛrɛ yɛ̧ɛ̧dɛ mi wɛ, wi gisin kpoos ɓaasig an nɛ woo gi daar bɔrɔ ɓɛ.

¹¹I̧i̧n tɛŋk nɛ an nɛ waa rɔbtɔnɔ a boolum du, bɔnɛ gut ya̧a̧yɔ seen gɛ, wɛɛn nɛ woo hin hi zul nɛ an nɛ dagn lees nɛ za̧a̧nɔ, anyɔ wi da wi raan nɛ amntɔnɔ.

¹²Gɔ gi anbɔ, waabil nɛ yɛgi riis dood wɔ hi taa Yeesu fɔkya gɛ, wɛɛ bɔnɛ kams dood mɔɔto.

¹³Yɛ̧ɛ̧dɛ wɛ, ha̧a̧w an nɛ mɛɛ rɔb a wɔrkɛ wɔ hi dɔŋgo an bɔ kpoos nɛ gi ɗɔb an dood zaadɛ wɔ hi taan mɔkil gbaaki.

¹⁴Anyɔ wɛ ɗɔbsig a Yeesu wɔrɔ, wɛɛ rɛml ɗundɔ, wɛ ɗɔbsig hɛw a dood wɔ hi wɔr a ɔksig gbun du hi Yeesu , Bɛt gi wɛnzihi lɛlgbun hi Yeesu be.

¹⁵Hinyɔ wi gisin raak ɓɔryɔ gi dɔgl yɔ fu̧u̧ a hinyɔ Waar Yeesu raa gedu: a wɛ́ɛ́ dood wɔ wɛ zɛ̧ɛ̧r hi kolɛ, a Waar Yeesu zaakɔ ɔ̧ti, wɛ taas wɔrkɛ wɔ ɗundigya̧ dorko.

¹⁶Bɛt gɔ gi ɓooya̧a̧, walsɛrɔ gbɔɔl bɔ gi ɓooya̧a̧, Bɛt pɔ̧rɔ gi uyyɔ, Waar Yeesu hi zulɔ gi siz bɛtha, wɔrkɛ wɔ hi ɗɔbsig nɛ Kristu hi rɛml hi ɗund doosi.

¹⁷Kuudu za̧a̧til wɔ wɛɛ yɔ wɛ zɛ̧ɛ̧rɔ, wɛ ɔks hi hiya wɛ dɔɔ a kuus du an wɛ dagtin hi Waar Yeesu a wɛɛha. Gɔ gi anbɔ ma, wɛ waa anbɔ hi Waar Yeesu wɛlɛ hi wɛlɛ.

¹⁸Ya̧a̧nɛ za̧a̧nyɔ gi sɛw rɔɔg naaza hi dɔgl yɛrɛ.