Read Doyayo 1 TESALONIKI 5 Bible Online

1 TESALONIKI 5 - Doyayo bible

1 TESALONIKI 5

¹Yɛ̧ɛ̧dɛ mi wɛ, an hinyɔ gi seek lɛlyɔ gɔ gi rii hi ɔ̧tyɔ hin wɔrɔ gɔ hi tuur gedu, hā̧a̧n an doo gi bi̧i̧sin dɔgl za ha gɛ.

²Ya̧a̧nɛ nɛɛ hi zul nɛ nɛ mɛɛ bɛttɔnɔ a Waar Yeesu ɔ̧tɔ gi zaa a dood zulha an luur yɔ gɔ zaa a yɛms du.

³Dood gɔ hi raako a boolum giro, hinza ɗɛɛ an gi gɔwɛ gɛ, gɔ gi anbɔ ro ya̧a̧rhant gi ɛ̧b ɓɔrbɔ a hi zulha, hi taa wirko; gigi an waagulk kosgumn gi zɛŋk budaa.

⁴Yɛrɛ nɛya, yɛ̧ɛ̧dɛ mi wɛ, nɛ taa a lɛlwil du an ɔ̧t bɔrɔ gi dumrin an luuri.

⁵Nɛ sɛw nɛ gi dood lɛlgaalyaadɛ, nɛ gi dood lurkyaadɛ. Wɛ taa yɛmsyaadɛ, wɛ taa lɛlwilyaadɛ.

⁶Yɔ anbɔ, bɔwɛ yo an dood zaadɛ, yɛwɛ kɔm lɔlɛ, wɛ wa̧a̧ zul wɛ.

⁷Dood yoomyaadɛ be gɔ hi yok a yɛ̧ms du, wɛɛ dood bumwɔnikyaadɛ be gɔ hi wɔnik a yɛms du be.

⁸Yɛrɛ wɛɛ wɛ gi dood lurkyaadɛyɔ, yɔ anbɔ, yɛwɛ wa̧a̧ zul wɛ. Yɛwɛ heg ɗɔbsig hi hat an gabs gbandil tusya a muulɛ, hi za̧a̧tig mɔkili an danɛkutin tusɛ.

⁹Ya̧a̧nɛ Bɛt gbāāwɛ an wɛ kɛm ya̧a̧rhant a gi nɔɔtig du gɛ, yɛrɛ gbaawɛ an wɛ dag za̧a̧tig a Waar wɛ Yeesu Kristu naan du.

¹⁰Yeesu Kristu wɔr a wɛ zulɛ. Ya̧a̧ giya, an wɛ kɔm za̧a̧tili, zaabe wɛ wɔrɔ, hinza gɛ, wɛ́ za̧a̧za̧ hi gii ma ɔ̧nɛ.

¹¹Yɛrɛ gaatinnɛ tɛŋko, ɗaatinnɛ anyɔ nɛ gɔk ɓɔryɔ.

¹²Nɛɛ yɛ̧ɛ̧dɛ mi wɛ, wi zɔ̧nɛ, ɗɔbsin dood wɔ hi wookwoos hi tɛŋk a nɛ teesdu, dood wɔ hi gi wooszulyaadɛ a nɛ teesdu, wɔ Waar Yeesu gaahi woos hi gisin hingok an nɛ oo zul nɛ.

¹³Zunsinɛhi ha̧a̧tig gbɔɔl hi hato a woos yɔ hi wook gi dɔŋgo, waan a boolum du.

¹⁴Wi zɔ̧nɛ hi ya̧a̧hɛmnti, yɛ̧ɛ̧dɛ mi wɛ, raasin dood namrɛ wɔ hin an hi oo zulya̧, ɓatsin hoobɛ wɔ kpoosɛ, ɗaasin hɛ̧ɛ̧rɛ wɔ, mɔmsinɛhi hin hi sɛw.

¹⁵Oon zul nɛ an bɔ doo za gi wɛɛn ha̧a̧l yɔ hi gɔsige, yɛrɛ waan nɛ tɛb an nɛ wootin rɔb a nɛ teesdu, nɛ wɛɛ nɛ woos dood rɔb sɛw.

¹⁶Waan hat daki.

¹⁷Waan Bɛt zɔ̧ki.

¹⁸Baanin Bɛt a hinyɔ tursin gedu sɛw. Hinyɔ Bɛt ha̧a̧g an nɛ woo a ɔksil nɛ bɔ gedu hi Yeesu Kristu giibɔ.

¹⁹Bɔnɛ ans Bɛt Mɔkilɔ woosɔ.

²⁰Doo gi kɛm Bɛt ya̧a̧ɔ gi dɔg hin hi Bɛt Mɔkilɔ, bɔnɛ bɔ̧ɔ̧ dɔglɔ bɔ nɛ see an dɔgl tɔsyayɔ.

²¹Goon hin sɛw, wa̧a̧n hinyɔ bɛrɔ,

²²hɛmlin hi ha̧a̧l yɔ gi sɛw.

²³An Bɛt hi zulɔ gi gaak boolumi gi wɛɛnin dood gaatɛ gi da̧a̧, gi oo mɔkil nɛ, kol nɛ, hi muul nɛ, nɛ gi dood gaatɛ a ɔ̧tyɔ Waar wɛ Yeesu Kristu gɔ gi zaa gedu.

²⁴Bɛt yɔ gin elko gi doo rɔbo, gi woo hinɔ. Ya̧a̧nɛ hinyɔ dɔg sɛw gi wooko, ya̧a̧luur hinɔ taa a ge.

²⁵Nɛɛ yɛ̧ɛ̧dɛ mi wɛ, zɔ̧bsinwi Bɛto.

²⁶Boon yɛ̧ɛ̧dɛ mi Yeesu fɔkya wɔ hi yɛ̧ɛ̧dums hato.

²⁷Mi gin raak hi tɛŋko hi Waar Yeesu nuŋgɔ an nɛ zaŋgs yɛ̧ɛ̧dɛ Yeesu fɔkya wɔ hi gi sɛw ɗɛɛrwol yɛrɛ.

²⁸An Waar wɛ Yeesu Kristu gɛmsilɔ gigi hi nɛya! Aanbɔ!