Read Doyayo 2 TESALONIKI 3 Bible Online

2 TESALONIKI 3 - Doyayo bible

2 TESALONIKI 3

¹Nɛɛ yɛ̧ɛ̧dɛ wi wɛ, hinyɔ zɛ̧ɛ̧r gɛrɛ: zɔ̧bsinwi Bɛto an Waar Yeesu dɔglɔ gi yɛd nɔɔk a dood kit wɔ hi ɗɔbs anyɔ daa nɛ nɛ teesdu,

²zɔ̧n an Bɛt gi tuusiw a dood ha̧a̧l wɔ hi gabsɛ wɔ hi naan du, anyɔ dood sɛw hi taa ɗɔbsig Bɛtdɔglɛ.

³Waar Yeesu gi doo rɔbo, hinyɔ dɔg sɛw gi wooko. Gi gaan tɛŋko gi wɛɛ gi oon an bɔ Saydanu gi maatinɛ nɛ wag gbɔnɔ.

⁴Wi gbaak kpoos wi a Waar Yeesu ge a nɛ zulha, wi mɛɛ a nɛ wook hinwɔ wi raanɛ, nɛ wɛɛ nɛ waa wook ɓɛ.

⁵An Waar Yeesu gi kam kpoos nɛ a Bɛt hat du hi a Kristu hinmɔŋk du.

⁶Nɛɛ yɛ̧ɛ̧dɛ wi wɛ, wi gin raak hi Waar wɛ Yeesu Kristu nuŋgɔ: hɛmlin yɛ̧ɛ̧dɛ wɔ hi waak namrɛ hi taa fɔk hinyɔ wi goksinɛ.

⁷Nɛɛ hi zul nɛ nɛ mɛɛ fɔkyɔ gi an nɛ waa nɛ fɔwi. Wi taa nɛ dood namrɛ a nɛ tees du.

⁸Wi lē doo lees tɔs gɛ, gɔ wi tooto ro wi leko. Wi mɔɔ wi woowoos yɛms du hi lurk du sɛw an bɔwi mɔɔs doo za a nɛ tees du.

⁹Nɛ mɔk a wi taan nɛ tɛŋk an wi dag lees a nɛɛge ya? Nɛ yɛrɛ taa anbɔ, gi nɛ an wi daagɔ. Yɛrɛ wi woo anbɔ, an wi gogsin gbɔnɔ hi waabil wi nɛ fɔbɔ.

¹⁰Yɔ wi gi nɛ waak nɛ hi nɛɛ hɛw, wi raanɛ: a za̧a̧nyɔ ha̧a̧g wooswook gɛ, bɔgi lehin be.

¹¹Ya̧a̧nɛ, wi lag a dood nɛ zaadɛ hi gi namrɛyɔ, hi taa wooswooko, hi wɛɛ hi gi gutig ya̧a̧ yɔ seehi gɛ.

¹²Dood wɔ anbɔ wi gihi raak hi tɛŋko a Waar wɛ Yeesu Kristu nuŋg du, an hi kɔm sob hi waa wooswook rɔbtɔnɔ hi kaŋkin zulya̧.

¹³Nɛya, yɛ̧ɛ̧dɛ wɛ nɛ sɛw, bɔnɛ mɔɔ hinyɔ bɛr wookɔ.

¹⁴Doo gi in hingok wɔ wi gaa a ɗɛɛrwol yɛrɛ gedu fɔko, seenɛg bɛttɔnɔ, bɔnɛ ɔks hi gii nɛ zaŋ, an seem gi ha̧a̧g du.

¹⁵Yɛrɛ bɔnɛ seeg an lɔlhɛ̧ɛ̧nikya, dɔgsinɛg hinɛ an yɛ̧ɛ̧ wɛ Yeesu -fɔkya an gi oo zulɔ.

¹⁶Yɛrɛyɔ, an Waar Yeesu yɔ gi boolum Waar i gi gaan boolum hi zulɔ an bili hi gbɔnɔ yɔ gi sɛw! An gi wɛɛ gi gi hi nɛɛ sɛw.

¹⁷Mii Pol , mii bi̧i̧ book yɛrɛ hi naan mi an mi boonɛ. Gɔ mi tɛ̧ɛ̧k naan mi a mi ɗɛɛrwol du sɛw anyɔ lɛ, bi̧i̧k yɔ gɔ mi bi̧i̧ gi anyɔ lɛ.

¹⁸An Waar wɛ Yeesu Kristu gɛmsilɔ gigi hi nɛɛ sɛw. Aanbɔ!