Read Doyayo 1 TIMƆTE 3 Bible Online

1 TIMƆTE 3 - Doyayo bible

1 TIMƆTE 3

¹Dɔgl rɔb yɔ rii an hi gbaa kpoos ha gɛrɛ: doo za gi ha̧a̧g wɛɛk Bɛtwoos kaŋkigzulya, tɛ̀b woos rɔbo.

²Gi an Bɛtwoos kaŋkigzulya bɔ gig doo yɔ taan hin-a̧a̧bi, ginig nis gbunu, gig zulhɔnikya, doo mɔkilya, doo rɔbtigya, rɔbɛzekya rɔbo, hingokya rɔbo,

³bɔgi gaa zulɔ bum du, gig doo kpoos saŋgtya, bɔgi gi doo gàbsi, bɔgi gi doo hinfaakya, bɔgi gbaa kpoosɔ a tus muulɛ,

⁴gig doo raatkaŋkigya rɔbo. Kaŋkig waatɔ rɔbtɔnɔ an hi kɛmsig tɔnɛ, hi wɛɛ hi ɗɔbsige a hinyɔ gi gedu sɛw.

⁵Doo gi mɛ̄ɛ̄ raatɔ kaŋkig gɛ, gi an gi ɗɛɛ Yeesu fɔkya ɔksil yɔ gi Bɛt ɔ̧nɛ kaŋkig ri?

⁶Bɔgi gi Yeesu fɔkya sekt yɔ hi wɛɛnig Bɛtwooszulya. À lab gɛ, gɔ hi bɛɛg wɛɛnik doo gbɔɔl a Yeesu fɔkyaadɛ teesdu, yɔ tɔɔs zulɔ, loorɛha̧a̧l yɔ matinge dɔglɛ.

⁷Wɛɛ ɓɛ, gi an dood wɔ hi taa Bɛt fɔk gɛ hɛw hi mɛɛg nɛ a gi doo rɔbo, an bɔgi dag niit a hin-a̧a̧bɔ wɔ woo nɛ amntɔnɔ hage. À lab gɛ, yɔ wɛɛ yɔ mat a loorɛha̧a̧l ɓoos du.

⁸Gbunɔ, ɗɛntɛ Bɛtwoos ɗaakyaadɛ ginihi waabil ɗɔbti, bɔhi gin mɛl eerɛ, bɔhi gi bumgbaarɛ, bɔhi gi rɔɔsɗɔkum-yaadɛ.

⁹Gihi wa̧a̧k ɗɔbsig dɔgl dubt hi kpoos-esigi.

¹⁰Dood hi yɛɛl hi goohi kete, hí gbɛ̄n hinza a̧a̧b a hii gɛ, ɓɔr hi ɔɔ wooswooko.

¹¹Bɛtwoos ɗaakya wɔ nɛɛdya̧ be, ginihi waabil gaati, bɔhi gi mɛlbookyaadɛ a dood zulha, gihi zulhɔnikyaadɛ, gihi hinrɔbwookyaadɛ wɔ dood hi ɗɛɛ an hi gbaa mɔkilya̧ a hii a hinyɔ gi gedu sɛw.

¹²Ɗɛntɛ Bɛtwoos ɗaakya wɔ ginihi nɛɛ gbunu, kaŋkihi waatya̧ hi raatya̧ rɔbtɔnɔ.

¹³Yɔ anbɔ Bɛtwoosɗaakya wɔ hi woo woosya̧ hi gbɔnɔ, hi dags zulya̧ erkil rɔbo, hi wɛɛ hi ta̧a̧ hi kpoosya̧ gbɔɔltɔnɔ an hi ɗɔbs Yeesu Kristu hi boo dɔglɔ.

¹⁴An mi mɔkig zaak a mɔɔge nɔɔk si̧, mi gisim bi̧i̧k hingok wɛrɛ dorɔ,

¹⁵an gi nɛ an mi aŋk kete, yɔ mɔ mɛɛ waak yɔ gɔ hi waa a Bɛt raadu, raakɔ a Bɛt za̧a̧til bɔ doodɔ ɔksil hi tees du. Bɛt doodɔ wɔ hii gi Bɛt dɔgl gbaakyaadɛ hi ookyaadɛ an tɛ̧ɛ̧ tɛŋkya yɔ gi gbag tɛŋk gaako hi sɛŋk rɔb yɔ gi luk pɛɛko.

¹⁶Bɛtfɔk wɛ bɔ gbɔnɔɔ dɔglɔ dub tɔɔtɔ; wɛ ta̧a̧ anbɔ, raakɔ gɛ: a Yeesu mid hi muulɔ an doo, Bɛt Mɔkilɔ raa dɔglɔ a gi doo riityɔ. Mits Bɛt walɛsɛrɛ. Dood hi dɔg dɔglɔ a dɔ̧ɔ̧t dɔɔmɛ tees du. Dood hi ɗɔbsige a waal du. Bɛt wɛɛ dɔɔnig a gbɔlums lɛl du a bɛtha.