Read Doyayo 1 TIMƆTE 5 Bible Online

1 TIMƆTE 5 - Doyayo bible

1 TIMƆTE 5

¹Bɔmɔ bigl ɗɛnt ha̧a̧ltɔnɔ. Gigi an mɔ dɔgsig hinɛ, dɔgsimɔg hi ya̧a̧hɛmnti anyɔ gɔ mɔ raasig baa mɔ hinɛ. Dɔgsum walɛsɛrɛ wɔ hin an mɔ dɔgsig yɛ̧ɛ̧dɛ mɔ.

²Dɔgsum naadnɔwaat wɔ be an mɔ dɔgsig nàà mɔ hiya, nɛɛdsɛrɛ wɔ be an siŋdɛ mɔ hi kpoos gaati.

³Ɗɔbsum kuurɛ wɔ hi gi kuurɛ hi rɔbo, ɗaasumɔhi.

⁴Nis kuur gi gin waato, zaabe, yawalɛ hi yaatɔ hiya, yɛhi gokhin hi mɛɛ Bɛtfɔk bɔ hi gbɔnɔ gi yɛɛl a raadu; gi an hi yɛɛl hi yɛs baaya̧ hi naaya̧ woos wooko. Ya̧a̧nɛ hin bɔ lab gii gɔ har Bɛto.

⁵Nis yɔ gi niskuur rɔbo, gi taan doo za an gi ɗaasig gɛ, gbaa kpoosɔ a Bɛt ge, wɛɛ gi waak Bɛtzɔ̧ki, baanuko yɛmsdu hi lurkdu sɛw.

⁶Yɛrɛ nis kuur yɔ gi waak a zɛlk du, wɔɔrɔ, anyɔ ginɛ za̧a̧til gii hɛw.

⁷Raasumɔhi hin wɔrɔ an bɔhi gin hin-a̧a̧bi.

⁸Doo za gi kaŋk nɛsɛ ɔ̧ɔ̧ gɛ, rɔbɔ doodɔ hii a raa du, in Bɛt gbɔnɔ yɔ daar za̧a̧nyɔ taa nɛ Bɛt ɗɔbsigya gɛ.

⁹Bɔmɔ bi̧i̧ nis kuur yɔ wɛlɔ tuurdir dumbili nɔɔn-gbun kɛn gɛ, a kuurɛ nuŋg ɗɛɛrwol du. Niskuur bɔ gɔ hi bi̧i̧ nuŋgɔ gi an gi gi kuur rɔbo: lootin nɛ hi wal dɔɔ gbun kpɔd.

¹⁰Gi an dood hi book dɔglɔ a da woowoos rɔbɛ; da kaŋk waatɔ rɔbtɔnɔ, dag rɔ̀bɛ, nɛɛs Bɛt doodɔ wɔ dɔɔya̧, ɗààs dood wɔ hi gi a zɛksil du, an bili woowoos rɔbɛ, gid gi anbɔ, hi bi̧i̧ nuŋgɔ.

¹¹Inum nɛɛdsɛrɛ kuurɛ wɔ nuŋgya̧ wɔ bi̧i̧kɔ a ɗɛɛrwol du. Ya̧a̧nɛ, ɗɔkumya̧ gɔ ɗunsihi anbɔ ha̧a̧hi an hi ɔɔ Kristu hi loo walɔ.

¹²Yɔ anbɔ hi pid mɔkilya̧ doos yɔ hi ɔks nɛ hi ɗɔbsigi, hi wɛɛ hi wɛns zulya̧ hin-a̧a̧bi.

¹³A hin wɔrɔ geha sɛw gɔ hi rɔ̧ɔ̧s namrɛ, hi lɛɛlɔ hi gut raato hi raato. Hinyɔ daar bɔrɔ be, hi tɛbt mɛlɛ, hi gut dɔgl yɔ zɛ̧hi gɛ, hi boo hinyɔ taa an hi boo gɛ.

¹⁴Ya̧a̧nɛ gi ha̧a̧mi an nɛɛdsɛrɛ kuurɛ wɔ hi wɛɛ hi loo walɔ, hi mɔɔ waato, hi gɛms raatya̧, an bɔ dood wɔ hi giwɛ lɔlhɛ̧ɛ̧nik hi dag gbɔnɔ hi dɔkt ya̧a̧ha̧a̧l wɛ zulha.

¹⁵Nɛɛd kuurɛ zaadɛ hi hɛɛ gbɔnɔ da̧a̧da̧ hi fɔk Saydanu giya.

¹⁶Nɛɛ za Bɛtɗɔbsigya gi gin nɛsɛ wɔ hi gi nɛɛdkuurɛ a gi raa du, yɛgi kaŋkihi, bɔgi ɗɔmn Yeesu fɔkya wɔ hiya, an hii hi kaŋk kuurɛ nɛɛd wɔ hi gi hi gbunu.

¹⁷Ɗɛntɛ Bɛtwoos kaŋkigya wɔ hi ook woos rɔbtɔnɔ hi rii an hi dag dɔɔrɔɔsya̧ du dɔɔ eerɛ, rɔbɔ, dood wɔ hi wook Bɛtdɔgl dɔkwoosɛ hi hingok woos eer sɛw.

¹⁸Ya̧a̧nɛ, Bɛt ɗɛɛrwolɔ raa a doo woosya rii an gi dag dɔɔrɔɔsɔ dagɔ, wɛɛ raa ɓɛ a bɔmɔ bib nāasɔ̄ɔ yɔ gisim tot nuuk ya̧a̧gbarɔ.

¹⁹Bɔmɔ ta̧a̧ an hi gɛ̧ɛ̧n ɗɛnt Bɛtwoos kaŋkigya hinza, gid segyaadɛ eerɛ zaabe taarɛ hi tā̧ā̧ a ɗɛnt bɔ gɔ hin-a̧a̧bi gɛ.

²⁰Dood wɔ hi ta̧a̧ hinha̧a̧l ɔɔk gɛ, biglumɔhi dood muutdu sɛw an dood zaadɛ gɔ hi gbɛn anbɔ hoob gi ha̧a̧hi.

²¹Mi gim raak hi tɛŋko a Bɛt muutdu hi a Yeesu Kristu muutdu hi a Bɛt walɛsɛrɛ wɔ Bɛt sɛ̧ɛ̧hi hi muutdu an mɔ fɔb hin wɛrɛ mi dɔgsumɔ, bɔmɔ sɔ̧ɔ̧ doo muutdu an mɔ gɛ̧ɛ̧ doodɛ.

²²Bɔmɔ diks naan mɔ gbaak a doo zulha an mɔ gaag woos a Bɛt doodɔ tees du an bɔmɔ ɔ́ks a dood zaadɛ hinha̧a̧l du. Mɔɔ hi zul mɔ, oom zul mɔ an doo gaati a Bɛt muutdu.

²³Bɔmɔ waa mɛm bɔ gii yɔ̧kɔ kpɔdi, yɔ̧m bumhob kaasi an gi wad buu mɔ hi gums wɔ hi fɔbtingo duhɔ.

²⁴Dood zaadɛ hinha̧a̧l hi mid gaattɔnɔ a dood lɔlgbar dos dɔgl yɔ gɔ hi gbaasihi. Yɔ anbɔ, zaadɛ be, hinha̧a̧lya̧ hi mid kuudu.

²⁵Woos rɔbɛ be, gɔ hi mid gaattɔnɔ. Àn taa anbɔ si̧, taa an hi ɔɔ midugɔ.