Read Doyayo 1 TIMƆTE 6 Bible Online

1 TIMƆTE 6 - Doyayo bible

1 TIMƆTE 6

¹Dood wɔ hi gi a gbaarums gbɔɔs du hi see ɗɛntɛya̧ an hi rii doo yɔ an hi ɗɔbsihi rɔbtɔnɔ an bɔ dood hi booya̧a̧ ha̧a̧l a Bɛt nuŋgɔ hi Bɛt dɔgl yɔ hi gokingo dood hage.

²Gbaarɛ wɔ hi gin ɗɛntɛya̧ hi fɔk Yeesu , bɔhi ɔɔhi ɗɔbsugɔ a hi gi yɛ̧ɛ̧ya̧ hiya. Lab gɛ! Yɔ hi mɛɛ a ɗɛntya̧ yɔ hi gisig woos wook be gisig ɗaako gi Yeesu ɗɔbsigya yɔ ha̧a̧be a gi muulɛ, gi an hi woosihi woos rɔbtɔnɔ gi daarlɛlɛ. Goksum dood hin wɛrɛ mi dɔgsumɔ, mɔ ɓatsihi muulɛ an hi woo hinya̧.

³Doo za gi goksig dood hinza dɔɔmi gi fɔbtin hi Waar wɛ Yeesu Kristu dɔglɔ gaatɛ wɔ, hi Bɛtfɔk hi gbɔnɔ hingokɔ bɔ gɛ,

⁴gi humnik zultɔɔsigyɔ, mɛɛ hinza gɛ. Gin mɔkil gumsya a gi kpoos du an gi faltinhin hi doodɛ gi bootin gabs a dɔgl dɔŋgo, hinyɔ gɔ gi ɗunsig ka̧a̧si, gabsɛ, ya̧a̧ha̧a̧lɛ, lɔlha̧a̧lɛ,

⁵hi dɔgl-faltingo yɔ lɔɔsumlɛlɔ taaro a dood mɔkil-a̧a̧bya wɔ hi mɛɛ rɔb gɛ hi tees du. Hi seek Bɛtfɔk hinɔ an rɔɔsdak gbɔnɔyɔ.

⁶Hi rɔbo, za̧a̧nyɔ gi fɔk Bɛt hi gbɔnɔ, wɛɛ kpoosɔ gi harig hi hinyɔ ginɔ, gin rɔɔs gbɔɔlɛ.

⁷Nɛ yɛrɛ, wɛ́ kāmz hinza a waal yɛrɛ gedu gɛ, wɛɛ wɛ taa hinza tuunuko.

⁸Yɛrɛ an wɛ gin leesɛ hi gbandili, hinya̧ hi riiwɛri.

⁹Yɔ anbɔ dood wɔ ha̧a̧hi rɔɔs dako, hi matig a maatil du, a ɓoos du, a mɔkil yoo du, hi mɔkil ha̧a̧l kit wɔ hi du, wɛɛ hin wɔrɔ lab gi waksig doodɛ, gihi ha̧tirgo be.

¹⁰Ya̧a̧nɛ ha̧a̧l yɔ gi sɔmsɔm sɛw hi fu̧u̧zig a tusɗɔkum du. Tusɗɔkum gii gɔ gɔ an dood zaadɛ hi hɛɛ ɗɔbsig gbɔnɔ, hi els zulya̧ ya̧a̧rhant gbɔlɛ kittɔnɔ.

¹¹Mɔya, Bɛt dooɔ, hɛmlum hin wɔrɔ sɛw, tɛm woos riiti, hi Bɛtfɔki hi gbɔnɔ, hi ɗɔbsigi, hi hato hi hinmɔŋki, hi kpoos saŋtimi.

¹²Woom ɗɔbsig mɔ gabs rɔbo. Wa̧a̧m za̧a̧tig faa bɔ Bɛt elinmɔ an mɔ dagɔ, anyɔ mɔ da mɔ dɔg ɗɔbsig mɔ rɔb dɔgl a segya kitɛ muutdu.

¹³Mi gim raak a Bɛt yɔ gi gaak hin sɛw za̧a̧tig gi muutdu, hi Yeesu Kristu yɔ boo dɔgl rɔb gaattɔnɔ a Pɔntiyu Pilatu muut du:

¹⁴Fɔm dɔgl yɔ mi gaamɔ, mɔ oog gaattɔnɔ, bɔhi zɛm hinza a̧a̧b gedu! Woom anbɔ gi tuur a ɔ̧tyɔ Waar wɛ Yeesu Kristu gɔ gi midz gedu!

¹⁵Bɛt yɔ wɛ baanige, Tɛŋkya gi gbunu, waar ɛ wɔ Waar ya̧, ɗɛntɛ wɔ Ɗɛntya̧ gii gi zuun Yeesu midzigɔ bɔ a ɔ̧tyɔ dɛ̧ɛ̧ gedu.

¹⁶Gii gi gbunu taa wɔrkya, gi ɗɔɔtig a lɛlgaal yɔ doo ɗɛɛ an gi sɛ̧ɛ̧b gɛ gedu, doo gbɛndirge nɛ gɛ zaŋ, wɛɛ doo ɗɛɛ an gi gbɛnig gɛ be. Ɗɔbsigi hi tɛŋko hi gi ge faa. Aanbɔ!

¹⁷Raam dood wɔ hi gin rɔɔs yɔ waal du a bɔhi tɔɔs zulɛ. Raasumɔhi a bɔhi gbaa kpoosya̧ a rɔɔs yɔ gɔ gi wag hage, gbaahi kpoosya̧ a Bɛt yɔ giwɛ gaak hin sɛw gbɔɔltɔnɔ gi daarlɛlɛ an wɛ dag hat gedu.

¹⁸Raasumɔhi a hi woo rɔbo, hi wɛɛ waar a woos rɔb du, wɛɛhi dood gaasyaadɛ, yu̧u̧sihi naanɛ.

¹⁹Hi gi wook anbɔ, hi mɔktsig zulya̧ rɔɔs rɔb yɔ gɔ hā̧tir gɛ a ɔ̧tyɔ gɔ gi zaa gedu an hi dag za̧a̧tig rɔb bɛttɔnɔ.

²⁰Mɔya Timɔte, oom ɗɔbsig dɔgl yɔ mi gaam an mɔ kaŋk rɔbtɔnɔ. Nɔɔm dɔgl tɔs wɔ hi hinfaltingo ya̧a̧gɔ̧ɔ̧nya dɔgl wɔ; hinya̧ dood gɔ hi el gii a hinmɛɛkyɔ, wɛɛ nuŋgɔ bɔ lab gi a̧a̧byɔ.

²¹Dood zaadɛ wɔ hi fɔk hin wɔrɔ dɔglya̧ hi hɛɛ gbɔnɔ hi ɔɔ ɗɔbsigi. An Bɛt gɛmsilɔ gigi hi nɛya!