Read Doyayo 2 TIMƆTE 1 Bible Online

2 TIMƆTE 1 - Doyayo bible

2 TIMƆTE 1

¹Mii Pol , Yeesu Kristu tɔmsɔya anyɔ ha̧a̧ Bɛto, mii bi̧i̧ ɗɛɛrwol yɛrɛ. Bɛt wɛɛnim tɔmsya a za̧a̧tig yɔ raa bé gaa dood wɔ hi waak ɔksig gbunu hi Yeesu Kristu dɔŋgɔ ge.

²Mi yaasig waa mi rɔb bɔ Timɔte yɔ ha̧a̧m a ge gii ɗɛɛrwoli. An Baa wɛ Bɛto hi Waar wɛ Yeesu Kristu hi gààmɔ gɛmsili hi ya̧a̧rmɛɛki hi boolumi!

³Gɔ mi gim waak mɔkig a mi zɔ̧k du, mi gi baanik Bɛt yɔ mi gisig wooswook hi kpoos-esigi anyɔ baa mi hi woo nɛko.

⁴Gɔ mi mɔk mi mɛɛk mɛ̄ɛ̄k mɔ wɔ, wɛɛ yɛms du hi lurk du sɛw gim ha̧a̧sig an mi gbɛnumɔ, an kpoos mi gi dag hat gbɔɔltɔnɔ gi daarlɛlɛ.

⁵Gɔ mi mɔk mi mɛɛk ɗɔbsig mɔ rɔb bɔ. Ɗɔbsig yɔ yāā mɔ Loyis hi nàà mɔ Ewnike hi dag nɛ gi dordi. Mi mɛɛ rɔbtɔnɔ a gi ɗɔɔtig mɔ kpoos du ɓɔri hɛw.

⁶Ya̧a̧nɛ, yɔ mi gbaasum naan zulha, mi gisum dɔk an mɔ mɛks a mɔ́ wa̧a̧ gaas yɔ Bɛt gaam bɛttɔnɔ mɔ́ woon hin hi tɛŋko.

⁷Bɛt gāāwɛ Mɔkilɔ an gi gaawɛ hoob gɛ, giwɛ gaak tɛŋko, hi ha̧a̧tigi hi zulhɔniki.

⁸Bɔ seem gi ha̧a̧m Waar wɛ Yeesu dɔglɔ booko, zaabe mii yɔ mi gi luknɔya a gi nuŋg dɔŋgo. Yɛrɛ yɔ̧m ya̧a̧rhant bɔ mɔnɛ a Dɔgl Rɔb bɔ gi dɔŋgo hi tɛŋk yɔ Bɛt gim gaako.

⁹Gii za̧a̧sɛ, gii wɛɛ gi elɛ an wɛ wɛɛ doodɔ waabil gaatyaadɛ. Bɔ lab taa a woos wɛ rɔbɛ wɔ hi dɔŋgo, gi a ha̧a̧tigɔ hi gɛmsilɔ dɔŋgo. Gaawɛ gɛmsilɔ a Yeesu Kristu naan du yɔ waal yɛɛlid nɛ ket gɛ.

¹⁰Yɛrɛ àgiyɔ, hinɔ mid hi Yeesu Kristu Za̧a̧sigya wɛ zaakɔ bɔ giya. Gii ha̧s wɔrk tɛŋko, wɛɛ gaawɛ Dɔglɔ Rɔb bɔ mitsɛ za̧a̧tig hi waak bɔ wɛlɛ hi wɛlɛ.

¹¹Bɛt yaam an dɔgldɔkya, an tɔmsya, hi an hingokya an mi dɔg Dɔgl Rɔb yɛrɛ.

¹²Ya̧a̧ giya, mi gi ya̧a̧r wɛrɛ yɔ̧ko, wɛɛ hin wɛrɛ hi taam seemha̧a̧nik be. Ya̧a̧nɛ, mi mɛɛ za̧a̧nyɔ mi ɗɔbsige mi wɛɛ mi mɛɛ bɛttɔnɔ a gin tɛŋk an gi oo hinyɔ gaam naan du gi tuur a dɔgl-gbaak ɔ̧ti.

¹³Wa̧a̧m hingok gaat bɔ mɔ kɛm a mi ya̧a̧ du, gi wɛɛsum hinyɔ gɔ mɔ fɔbɔ, mɔ́ goks dood hin anbɔ be a ɗɔbsig du hi hat yɔ wɛ gin ɔksi hi Yeesu Kristu. Ɗɔbsig bɔrɔ hi hat bɔrɔ hi fu̧u̧z a ɔksig wɛ bɔ gedu hi Yeesu Kristu.

¹⁴Oom hingok rɔbɛ wɔ Bɛt gaamɔ naan du hi Mɔkilɔ tɛŋkɔ yɔ gi waak a wɛ kpoos du.

¹⁵Anyɔ mɔ mɛɛ, dood wɔ hi gi a Aaziya hɛbt du sɛw hi ɔɔm-ɔɔ. Fegelus hi Hermɔzanɛs hi gi wɔrɔ hi teesdu hɛw.

¹⁶Onɛsifɔrus gaam tɛŋk dɔɔ kittɔnɔ, wɛɛ seem hā̧a̧g mii yɔ mi gi luknɔ du gɛ. An Waar Bɛt gi mɛɛs raatɔ ya̧a̧rɛ.

¹⁷Yɔ tuur a Roma, yɛ̀ɛ̀lum ɓɛɛk hi ha̧a̧tig gbɔɔltɔnɔ wɛɛ da zɛ̧mi.

¹⁸An Waar Yeesu gi woo an gi dag ya̧a̧rmɛɛk a ge a dɔgl-gbaak-ɔ̧ti. Woosumwoos gbɔɔltɔnɔ a Efesu, mɔɔ mɔ mɛɛ dɔglɔ bɛttɔnɔ hɛw.