Read Doyayo TITUS 2 Bible Online

TITUS 2 - Doyayo bible

TITUS 2

¹Titus, mɔɔ be, dɔgsumɔhi hinwɔ hi fɔk Bɛt dɔgl gaat bɔ gbɔnɔ rɔbtɔnɔ giya.

²Mɔ raa ɗɛntɛ wɔ a bɔhi yɔ̧ bum gi daarlɛlɛ; hi woo hinyɔ rii giya; hi hɔns zulya̧ bɛttɔnɔ, hi fɔb Bɛt dɔgl gbɔnɔ rɔbtɔnɔ hi ɗɔbsigi hi hato hi hinmɔŋki.

³Mɔ raa naadnɔwaat wɔ hɛw hi ɛmb ɛmbilya̧ rɔbtɔnɔ an dood gaatɛ a Bɛt muutdu. Bɔhi boo mɛl a dood zulha, bɔhi gi bum gbaarɛ; goksihi dood zaadɛ hinyɔ gi rɔbo.

⁴Goksihi nɛɛdsɛrɛ wɔ hin an gi ha̧a̧hi a walya̧ ge hi waatya̧ hi,

⁵hi wa̧a̧ zulya̧ rɔbtɔnɔ, bɔhi mɔk mansdɔglɛ, an hi woo woosya̧ a raadu rɔbtɔnɔ an waatsiŋdɛ rɔbɛ, hi laks walya̧ tɔnɛ, an bɔ dood zaadɛ hi boo ya̧a̧ha̧a̧l a Bɛt dɔgl muulɛ.

⁶Mɔ ɓats walɛsɛrɛ wɔ kpoosɛ an hi hɔns zulya̧ rɔbtɔnɔ.

⁷Mɔɔ hɛw, woom hinrɔb gii kpɔd an walɛsɛrɛ wɔ gɔ hi gbɛn ɛmbil mɔ hi fɔbɔ. Gɔ mɔ gisihi hingoko, mɔ goksihi hi gbɔnɔ rɔbtɔnɔ, dɔgl mɔ gi es kpoosɛ.

⁸Dɔgsumɔhi dɔgl gaat bɔ giya an bɔ doo za gi kpɛ̧ɛ̧l dɔglɔ, an bɔ dood wɔ ha̧a̧hi mɛlbook wɛ zulha hi zɛm hin-a̧a̧b a mɔ dɔgl bɔ gedu. Gɔ gi anbɔ seem gi wa̧a̧hi.

⁹Dɔgsum gbaarɛ wɔ hinɛ an hi tiis zulya̧ a ɗɛntɛya̧ dɔŋdi, hi woosihi hinyɔ gi sɛw rɔbtɔnɔ. Bɔhi faa dɔglya̧.

¹⁰Bɔhi loo hinya̧ za luurɛ; yɔ anbɔ, woohi hinrɔbo an baaya̧ hi ɗɛɛ kpoosya̧ gbaak a hi. Gɔ gi anbɔ, hinyɔ hi wook sɛw gi wɛɛn Bɛt Za̧a̧sigya wɛ hingokɔ bɔ hingbɔɔl yɔ dood sɛw hi gbɛnɔ hi mɛɛ a bɛɛrɔ.

¹¹Yɛrɛ Bɛt zuun rɔbtigɔ gaattɔnɔ a dood muutdu an hi sɛw hi za̧a̧.

¹²Wɛɛ rɔbtigɔ bɔ gisɛ goko an wɛ ɔɔ waabil wɛ ha̧a̧l wɔ hi ɗɔkum ha̧a̧l wɔ waaldu, wɛ wɛɛ wɛ hɔns zul wɛ wɛ fɔ Bɛt hi gbɔnɔ, a waabil wɛ yɔ ɓɔryɔ gedu a waal yɛrɛ gedu.

¹³Yɛwɛ oo hinrɔb yɔ wɛ gbaak mɔkil wɛ hage hi hato: gɛ ɔ̧tyɔ gɔ wɛ gbɛn Yeesu Kristu yɔ gi Bɛt wɛ hi Za̧a̧sigya wɛ gbɔɔlɛ, gi midz gedu a gi gbɔlums du.

¹⁴Gaa zulɔ wɔr a wɛ kalɛ an gi ha̧s hinha̧a̧l tɛŋkɔ a wɛ muulɛ, an gi gaasɛ a gi muutdu, an wɛ wɛɛ dood ɔnɛ, an wɛ wɛɛ wɛ waak hinrɔb wook hi hato.

¹⁵Mɔ dɔks dood wɔ dɔgl yɛrɛ mɔ gaahi tɛŋko, ɓatsu-mɔhi kpoosɛ, boomɔhi hi tɛŋk yɔ Bɛt gaamɔ. Bɔmɔ ɔɔ doo za gi kpɛ̧ɛ̧lum nɛ zaŋ.