Read Doyayo TITUS 3 Bible Online

TITUS 3 - Doyayo bible

TITUS 3

¹Mɔ raas dood Yeesu fɔkya wɔ a ri ya, a bɔhi zɛn dɔgl yɛrɛ. Hi tiis zulya̧ a dood nabl wɔ hi dood gbɔlɛ wɔ hi dɔŋdi, hi kɛmsihi tɔnɛ, hi wɛɛ hi wa̧a̧ kpoosya̧ an hi woo hinyɔ gi rɔb sɛw.

²Bɔhi boo ya̧a̧ha̧a̧l a dood zulha, bɔhi gi dood ya̧a̧kɛtilyaadɛ; hi kɔm lɛl-ookya hi kpoos rɔbo. Hi wɛɛ hi sɔ̧ɔ̧ dood sɛw an hi zuun zulya̧ hɔniki.

³Hɔɔ, amntɔnɔ wɛɛ hɛw wɛ da wɛ gi an yooyɔ. Wɛ da wɛ gi tɔnzuksyaadɛ, wɛ da wɛ wag gbɔnɔ rɔbo, wɛ da wɛ gi ɗɔkum wɔ hi hinrɔbɛ wɔ hi gi sɛw gbaarɛya̧, wɛ da wɛ waan nɛ gabsɛ hi ka̧a̧si. Dood hi da hi giwɛ lɔlhɛ̧ɛ̧nik be, wɛɛ wɛ da wɛ lɔlhɛ̧ɛ̧tingo be.

⁴Yɛrɛ Bɛt Za̧a̧sigya wɛ zunsɛ kpoosɔ rɔb yɔ ha̧a̧ge a dood muulɛ,

⁵za̧a̧sɛ gɔ ya̧a̧rtɔs. Zā̧ā̧sɛ a woos wɛ riitɛ wɔ wɛ woo nɛ hi dɔŋg gɛ, za̧a̧sɛ anyɔ mɛɛsɛ ya̧a̧rɛ. Mɔɔwɛ sego hi hotigɔ bɔ hotɛ, wɛɛ gaawɛ za̧a̧tig seg hi Mɔkilɔ bɔ,

⁶yaasɛ Mɔkilɔ hi rɔbtig gbɔɔltɔnɔ a Yeesu Kristu Za̧a̧sigya wɛ zulɛ,

⁷an wɛ wɛɛ dood riitɛ a rɔbsɔ bɔ gi dɔŋgo, wɛ wɛɛ wɛ gbaa mɔkil wɛ a gi gaawɛ za̧a̧tig faa bɔ wɛnɛ.

⁸Dɔgl yɛrɛ gi Dɔgl Rɔb yɔ bɛr an hi gbaa mɔkil hage giya. Titusi, ha̧a̧mi an mɔ goks dood wɔ hi ɗɔbs Bɛto hinɔ bɛttɔnɔ an hi woo woos rɔb yɔ gɔ gi midɔ. Hinyɔ hi el a hinrɔbwookyɔ, hinɔ bɛrdi! Gɔ rɔbs doo rɔbsɔ.

⁹Yɛrɛ nɔɔm dɔgl tɔs wɔ gɔ hi booko, hi Yahuduya ɗɛntɛ nuŋgɓɛrk wɔ, zaabe hi gbaatingo a Bɛtmaakdɔgl muulɛ, dɔgl wɔrɔ hi gi hintɔsyɔ, gɔ hí ɗaas doo gɛ.

¹⁰Mɔ gbɛn doo za gi gɛksig gbɔnɔ a dood teesdu, yɛɛlum mɔ raasig dɔglɔ an gi ɔɔ hinɔ. Gi ta̧a̧ dɔglɔ ɔɔk gɛ wɛɛm mɔ raasig dɔɔ eesimɛ, gi lag gɛ be, ɔɔmɔge,

¹¹mɛɛm a za̧a̧nɔ wag Bɛt gbɔnɔyɔ gi wɛɛ gi wook hinha̧a̧lɛ. Hinha̧a̧lɔ bɔ gii gi zuun a gbaas zulɔ dɔglɛ.

¹²Mi gisum Artimɛs yaako zaabe Tikikus. Gɔ gi tuurɔ, digzum du nɔɔko an mɔ zaa mɔ zɛmi a Nikopolis, ha̧a̧mi an mi rek mi kɔm hɔ saŋks bɔ gi da̧a̧ kete.

¹³Mɔ ɗaas maak-dɔgl-gokya bɔ Zenasi hi Apolos sɛw bɛttɔnɔ hi rɔbsya̧ dɔglɛ an bɔhi lɔɔ hinza kaasi.

¹⁴Gi an dood wɔ hi ɗɔbs Bɛt an wɛya hi gok hinrɔb wook hi tɛŋko an hi ɗaas za̧a̧nɔ anyɔ ha̧a̧ge an bɔ waabilya̧ gi kɔm tɔs an tɛ̧ɛ̧ yɔ kirkɔ.

¹⁵Dood wɔ hi gi hi mii sɛw hi raa a mi boom du, mɔ boo dood wɔ hi ɗɔbs Yeesu , dood wɔ ha̧a̧hi wi muulɛ. An Bɛt gɛmsilɔ gigi hi nɛɛ sɛw! Àanbɔ!