Read Doyayo Filmɔŋ 1 Bible Online

Filmɔŋ 1 - Doyayo bible

Filmɔŋ 1

¹Mii Pol , mi gis Yeesu Kristu luknɔya ɔ̧ɔ̧nɛ hi yɛ̧ɛ̧ wɛ Timɔte. Wi bi̧i̧sig saam mi rɔb Filmɔŋ yɔ gi Waar Yeesu woosɔya hi wii lɛlgbunu gii ɗɛɛrwol yɛrɛ.

²Wi book siŋg wɛ Apiya hi Arkibus gɔ gi Yeesu Kristu laaya ɔ̧ɔ̧ an wiya, hi Waar Yeesu fɔkɔya wɔ gɔ hi mɔksig a mɔ raa du hɛw:

³an Baa wɛ Bɛto hi Waar wɛ Yeesu Kristu hi gaanɛ gɛmsili hi boolumi!

⁴A ɔ̧tyɔ gɔ mi zɔ̧k Bɛt gedu sɛw saammi Filmɔŋ, mi mɔkig a mɔɔge mi gig waak baaniki

⁵anyɔ mi kɛm hi book hat mɔ dɔgl yɔ mɔ gɔk a Bɛt doodɔ zulha sɛw hi ɗɔbsigyɔ mɔ ɗɔbs Waar Yeesu.

⁶Mi ɛrk Bɛto an ɗɔbsig mɔ yɔ mɔ ɗɔbsig Waar Yeesu Kristu hi wi lɛlgbunu, gi woo an mɔ mɛɛ hinrɔbyɔ wɛ ɗɛɛ an wɛ woosig bɛttɔnɔ.

⁷Yɛ̧ɛ̧ mi rɔbo, hat mɔ has kpoos mi gbɔɔltɔnɔ, wɛɛ gaam tɛŋk gbɔɔltɔnɔ anyɔ Bɛt doodɔ kpoosya̧ hi ɗɔɔt rɔbtɔnɔ a mɔ dɔŋgo.

⁸Ya̧a̧nɛ an mi gin tɛŋk a Kristu nuŋg du an mi nugum mɔ kɛm tɔn du si̧,

⁹hā̧ā̧m an mi raam hin hi tɛŋk gɛ, ha̧a̧m an mi zɔ̧mɔzɔ̧ki a hat du. Anyɔ mi giyɔ, mii Pol , doo ɗɛnti, àgiyɔ mi gi Yeesu Kristu luknɔya ɔ̧ɔ̧ hɛw,

¹⁰mi gim zɔ̧k a Onɛsimus yɔ gi waa minɛ a Kristu hat yɔ gi wɛ zul gedu, mi wɛɛ ma baatɔ giya anyɔ mi goksig ɗɔbsig gbɔnɔ hɛdi a luknɔ du.

¹¹Da amntɔnɔ ɗāāsum hinɔ gɛ, yɛrɛ ɓɔryɔ ɗɛɛ an gi ɗaasumɔ, wɛɛ ɗɛɛ an gi ɗaas mii be.

¹²Ɓɔryɔ mi gig yaak a mɔɔge, kpoos mi hi hat mi sɛw gi a ge.

¹³Ha̧a̧m nɛ an mi gbaag a mi dɔŋdi yɔ mi gik a luknɔ du te a Dɔgl Rɔb bɔ gi dɔŋgo an gi ɗaasim woos a mɔ kalɛ.

¹⁴Yɛrɛ hā̧ā̧m an mi woo hinza yɔ mɔ mɛɛ dɔglɔ gɛ gɛ. Wɛɛ hā̧ā̧mi an mi fɛ̧ɛ̧mɔ mɔ ta̧a̧ mɔ woosim rɔb gɛ. Ha̧a̧mi an mɔ woo hi ha̧a̧tig mɔɔnɛ.

¹⁵Kinsa Onɛsimus hɛɛtin hi mɔɔ ɔ̧t kaasi labɔ an kuudu gi wɛɛ gi waatin hi mɔɔ faa.

¹⁶Ɓɔryɔ taa gbaar ɗagtili, yɛrɛ daar gbaar daarɔ, gi an yɛ̧ɛ̧ rɔb yɔ ha̧a̧wɛ a ge a Kristu hat du. Wɛɛ mii be, ha̧a̧sim a ge gbɔɔltɔnɔ. Yɛrɛ mi mɔk a ha̧a̧mɔ a ge daarlɛlɛ. Hā̧a̧wɛ a ge an doo hɛbti kpɔd gɛ, ha̧a̧wɛ a ge an Waar Yeesu fɔkɔyayɔ.

¹⁷Gid mɔ seemi hi rɔbo an mi gitin Waar Yeesu woosɔya hi mɔɔ lɛlgbunu, yɛrɛ zemɔge anyɔ gɔ mɔ zek mii be.

¹⁸Gi woosum nɛ hinza bɔbtini, zaabe, mɔ gig fɔk belko, warum miya, bɔmɔ war giya.

¹⁹Mi bi̧i̧ hin yɛrɛ gɛrɛ hi naan miinɛ, mii Pol , mi toomɔ. (Bɔmɔ zɛn a mii gi kol mɔ za̧a̧sigya ya?! )

²⁰Mi zɔ̧mɔ, yɛ̧ɛ̧mi, ta̧a̧simi hin yɛrɛ a Waar Yeesu dɔŋgo. Hasum kpoos mi anyɔ bɛr a ɔksig wɛ bɔ gedu hi Kristu!

²¹Mi mɛɛ bɛttɔnɔ a mɔ́ woo hinyɔ mi ɛrumɔ. Yɔ mi bi̧i̧sum anbɔ mi mɛɛ a mɔ́ woo hinyɔ mi raa gi daarlɛl hɛw.

²²Yɛrɛ hinyɔ gɔ mi ɛrum ɓɛ gɛ: a gɛmntsimi rɔ̀bɛ luk buu gbunu anyɔ mi mɔk a Bɛt gi ta̧a̧ zɔ̧k nɛ an gi wɛɛnim a nɛ lɛlɛ.

²³Epafaras yɔ gi a luknɔ du hi mii a Yeesu Kristu zulɛ boom du.

²⁴Markus hɛw, hi Aristarkus, hi Deemas, hi Luka, kaŋkmiya wɔ a woos du hi boom du sɛw.

²⁵An Waar Yeesu Kristu gɛmsilɔ gigi hi nɛya. Aanbɔ!