Read Doyayo IBRANIŊKO 12 Bible Online

IBRANIŊKO 12 - Doyayo bible

IBRANIŊKO 12

¹Yɛrɛ wɛɛ hɛw, anyɔ segyaadɛ wɔrɔ saalya̧zanɔ gbɔɔl hi gɔ̧ɔ̧wɛ, yɛwɛ bis hinyɔ gi a̧a̧nik ɛmbil wɛ sɛw, hi hinha̧a̧lyɔ giwɛ bik hi tɛŋko; yɛwɛ nɔɔ nɔɔkil yɔ gi wɛ muutdu hi hinmɔŋki wɛ tuur a da̧a̧ki,

²wɛ́ gin lɔl wɛ a Yeesu ge yɔ gi wɛ gaak ɗɔbsigi wɛɛ gi ɗɔbsig wɛ gɛmsigo. Anyɔ gbɛn hatyɔ gɔ gi dag a bɛtha, ha̧a̧ya̧a̧r a dɔ̧ɔ̧r ha, mɔ̄k seem a wɔrkɔ bɔ muulɔge gɛ, ɗuk dɔɔ bɛtha, ɗɔɔt a Bɛt waar ums ɗɔɔtillɛl bɔ gi naanrɔbo.

³Mɔkin za̧a̧nyɔ mɔm hinha̧a̧lya wɔ zulɓaasigya̧ bɔ yɛ̧ltɔnɔ a gi gbaŋgi an bɔnɛ ɔɔ kol nɛ gi mɔɔ, bɔ muul nɛ gi hɔninɛ.

⁴A gabs nɛ bɔ nɛ wook a hinha̧a̧l gbaŋ gedu, nɛ́ ēr bɛttɔnɔ an gi tuur a wɔrk du ket gɛ,

⁵nɛ wɛɛ nɛ zɛn dɔgl wɔ gaanin tɛŋk zɛnɔ anyɔ gɔ hi raak waatwalɛ: a waa be, bɔmɔ see Waar Bɛt ya̧a̧rɔ bɔ gim ha̧a̧nik an hintɔs. Wɛɛ Bɛt gɔ gi gim book an mɔ lag tɔnɛ bɔ muul mɔ gi hɔnimɔ.

⁶Ya̧a̧nɛ Waar Bɛt gɔ boo za̧a̧nyɔ ha̧a̧gge giya, wɛɛ gi dood wɔ mɛɛhi sɛw a waat beenɛ lɛk hi sɔɔlɛ.

⁷Mɔn ya̧a̧rhant bɔ hi walumsɛ: Bɛt gin gbaak an waato, nɛ wāa nɔni baatɔ gi boog gɛ?

⁸Wɛɛ Bɛt gi bōōnɛ anyɔ gɔ gi book waatɔ sɛw gɛ, nɛ gigi anbɔ nɛ taa waatɔ ma, nɛ gi mans waato, nɛ waat rɔbɛ gɛ!

⁹Yɔ ginɛ anbɔ be, anyɔ baa wɛ hi gi doo a hɛbtdi hi giwɛ ya̧a̧rhant gaako a hin-a̧a̧b yɔ gɔ wɛ gɔk gi dɔŋgo, wɛ gihi ɗɔbsugo. Wɛɛ be, dāār an wɛ tiis zul wɛ a dood mɔkil wɔ Baaya̧ Bɛt ge an wɛ dag za̧a̧tig wɛ a ge gɛ ya?

¹⁰Baa wɛ gɔ hi giwɛ ya̧a̧rhant gaak ɔ̧t kaasi anyɔ riisihi; nɛ Bɛt ɔ̧nɛ giwɛ gaak ya̧a̧rhant an gi gɛmsɛgɛmsɔ an kuudu wɛ ɔks hi gii a gi gaatig du.

¹¹Hi rɔb ɔ̧nɛ, gɔ wɛ ya̧a̧ryɔ̧ko, kpoos wɛ kpɛ̧ɛ̧ gɛ, wɛ gi dak kosgumnɛ. Yɔ anbɔ ya̧a̧rhant bɔ gisɛ kamzig waabil riit boolumya yɔ gi dood wɔ ya̧a̧rhant gɛmsihi anbɔ lab ya̧a̧nɛ.

¹²Yɔ anbɔ, ɓaasin naan nɛ wɔ hi mɔɔ hi dɔɔɗuk nɛ hɔntil wɔ.

¹³Fɔn gbɔnɔ et wɔ hi dɔɔ nɛ wɔ, an bɔ dɔɔ gumtilya gi hɛɛ gbɔnɔ, dɔɔɔ gi ɓɛdɔ, ɔɔn gi za̧a̧ gi ɓaa.

¹⁴Tɛn ɗɔɔtig rɔbtɔnɔ hi dood sɛw, hi gaatigi a Bɛt muutdu, gaatig bɔ gi taa gɛ, doo za taa an gi gbɛn Waar Yeesu .

¹⁵Oonɛ an bɔ doo za gi wɛɛ kuudu gi lɔɔ Bɛt gɛmsili; an bɔ doo za yɔ gi an tɛ̧ɛ̧kpas zobtil yɔ ruuz a tɛ̧ɛ̧duul muulɛ gi ha̧a̧nik dood kittɔnɔ ya̧a̧r hi ɗɔŋkɔ bɔ.

¹⁶Ya̧a̧nɛ bɔ doo gigi mansnaakya, zaabe lɛlgaat seekya an hintɔs an Esawu yɔ faa Bɛto gi zebrs yɛ̧ɛ̧tɔ waa gbɔlumsɔ hi lees dak gbunu.

¹⁷Ya̧a̧nɛ, anyɔ nɛ mɛɛ, kuudu a ha̧a̧kyɔ ha̧a̧ Esawu an gi dag baatɔ rɔbsɛ, hi wɛɛnig kuudu anyɔ gi kaak nɛ hi mɛɛk gii hɛw; dāg gbɔnɔ an gi dɛmnaan gi zɛmr hinyɔ woo nɛ gɛ.

¹⁸Nɛɛ nɛ sɔ̄ɔ̄ an Israhilaya wɔ hi sɔɔ a Sinay gol dɔŋdi an hi ɗɛɛ ki̧i̧k gɛ be: laazebt dagsige, kuus kpɛ̧ɛ̧ge, lɛlbutili, hi lɛlwilɔ, hi bɛlwitili,

¹⁹pɔ̧r ya̧a̧boon wɔ, hi dɔgl wɔ namsya̧; wɔ gɔ hi kɛm hi ɛrɔ an bɔhi wɛɛ hi dɔgsihi nɛ dɔgl za gi daarɔ.

²⁰Ya̧a̧nɛ hii be hi ɗɛ̄ɛ̄ an hi mɔm dɔgl yɛrɛ hi rāā gɛ. Hi raa dɔglɔ: a namb za gi ki̧i̧ nɛ gol yɛrɛ hɛw hi duunig bet gi wɔrɔ.

²¹Hin bɔrɔ gbɛnkɔ ha̧a̧hoob yɛ̧ltɔnɔ. Muusa yɔ gbɛn anbɔ raa: a hoobha̧a̧b be beek nɔɔha.

²²Yɛrɛ nɛya nɛ sɔɔsɔ a Siyona gol bɔ ge a Bɛt za̧a̧til bɔ gi waal gbɔɔl du, a Urusalima yɔ gi a bɛtha gedu, a lɛlyɔ Bɛt walɛsɛrɛ kittɔnɔ hi mɔks ge hi nak hin hi hato.

²³Nɛ sɔɔ a Bɛt waat saal wɔ hi mɔɔhi doos hi bi̧i̧ nuŋgya̧ a bɛtha hi, a dɔgl-gbaakyayɔ gi dood sɛw Bɛtya̧ ge, a dood riitɛ wɔ hi gaa mɔkilya̧ hi,

²⁴a Yeesu yɔ gi ya̧a̧wɔk seg bɔ teesɔ gedu hi Bɛt ge, a ga̧a̧mwaatig bɔ gɔgi booya̧a̧ gi za̧a̧s doo gi daar Abɛl ga̧a̧m ɔ̧nɛ duge.

²⁵Oon zul nɛ an bɔnɛ in za̧a̧nyɔ gi ya̧a̧book dɔglɔ lako; ya̧a̧nɛ gid dood wɔrɔ hi in za̧a̧nyɔ gisihi Bɛt dɔgl book a waal du hi zɔ̄r dɔgl-gbaak an hi za̧a̧ gɛ, wɛɛ hɛw gi an wɛ za̧a̧ ri? Wɛɛ yɔ wɛ inik za̧a̧nyɔ giwɛ ya̧a̧boonik a bɛtha?

²⁶Amntɔnɔ ya̧a̧boonɔ nams hɛbto, yɛrɛ ɓɔryɔ gii wɛɛ gi dɔg a be woo hin yɛrɛ: a lɔɔsumɔ ge ɓɛ, bé taa hɛbt gii namsig kpɔdi, be nams bɛtha hɛw.

²⁷Dɔgl yɛrɛ, lɔɔsumɔ ɓɛ gi zuunik hinwɔ hi namlɔ zɛmrikya̧ anyɔ da wooy nɛ ɔ̧tza, an hinwɔ hi taa an hi naml gɛ hi zɛ̧ɛ̧rɔ.

²⁸Ya̧a̧nɛ wɛɛ yɔ gɔ wɛ dag wáát yɔ gɔ gi naml gɛ, yɛwɛ baanɔ, yɛwɛ woos Bɛt hin anyɔ rii, wɛ ta̧a̧ge hi hoob a kpoos du.

²⁹Ya̧a̧nɛ Bɛt wɛ gi laa yɔ gɔ muks hin sɛw giya.