Read Doyayo IBRANIŊKO 13 Bible Online

IBRANIŊKO 13 - Doyayo bible

IBRANIŊKO 13

¹Fɔn waak a yɛ̧ɛ̧dums hat du.

²Bɔnɛ zɛ̧n rɔ̀bɛ zek a nɛ lɛldu, ya̧a̧nɛ rɔbɛzek bɔ anbɔ, hi zek Bɛt walɛsɛrɛ du hi mɛɛ gɛ.

³Mɔkin luknɔya wɔ an nɛɛnɛ gi nɛ luknɔyaadɛ be; mɔkin wɔ hi gihi gɔluko an hi gi muul nɛɛn gɔlik lɛlgbunu hi hii be.

⁴Lootins wɛɛsig dood sɛw hinɗɔbti. Bɔ doo za kusillɛlɔ gi ɓi̧i̧lɔ, raakɔ a bɔ dood hi lootin hi gɔ mansi; Bɛt gi gbaas doo hatilgɔkya wɔ hi mansnaakya wɔ dɔglɛ.

⁵Bɔnɛ ɗɔkin tusɛ; kpoos nɛ kpɛ̧ɛ̧g a hinyɔ nɛ gin hage; ya̧a̧nɛ Bɛt hi zulɔ gi raa: a bé taam ɔɔko, bé taam bisig nɛ zaŋ.

⁶Yɔ anbɔ, gi an wɛ dɔghin hi kpoos ɓaasigi a Waar Bɛt gi ɗaakya beenɛ, hoob taab hinza ha̧a̧ko. Gi an doo gi gɔsib nɔ?

⁷Mɔkin nɛ mɛɛ dood wɔ hi gisin dork nɛ amnti hi Bɛtdɔgl yɔ hi dɔgsinɛ; seen waabilya̧ bɔ da̧a̧kɔda̧a̧, wɛɛn nɛ fɔb ɗɔbsigya̧ bɔ.

⁸Yeesu Kristu gi gbun bɔ gii lelɔ, hi nɛɛko hi faa.

⁹Bɔnɛ ɔɔ hi maatin hi hingokza rɔ̀bɛ sɔmsɔm wɔ an hi hɛɛsin gbɔnɔ; ya̧a̧nɛ bɛr an kpoos wɛ gi dag tɛŋk a Bɛt gɛmsil du, taa a leesdɔgl yɔ gɔ ɗāā hinza gɛ duge.

¹⁰Wɛ gin Bɛtmaaksɛŋk za, ɗɛ̄ɛ̄ an wɔ hi gi wook maak a Yahuda lukgbandilya du hí lē hinza a hage gɛ.

¹¹Bɛtmaak wookya gbɔɔl mɔɔt gɔ kamz namb wɔ hi gbɛɛr ga̧a̧mya̧ a lɛlgaatɛ wɔ lɛlgaatya̧ bɔ gedu an hinha̧a̧l gi bisɔ, hi wɛɛ hi dɔ̧ɔ̧s namb wɔ a pɔnti.

¹²Ya̧a̧nɛ, Yeesu be, yɔ̧ya̧a̧r a waal gbɔɔl lakɛ, an gi gaas dood hi ga̧a̧m ɔ̧nɛ bɔ.

¹³Yɛwɛ tuu an wɛ rek a ge, a waal gbɔɔl lakɛ wɛ ɔks hi gii wɛ mɔm seemhantɔ bɔ.

¹⁴Ya̧a̧nɛ wɛ taan waal gbɔɔl yɔ gɔ gi waa gi am a hɛbtdi hɛdi anyɔ wɛ tɛk waal gbɔɔl za yɔ gɔ gi zaa.

¹⁵Hi Yeesu gɛmsilɔ, yɛwɛ waa Bɛt baaniki, bant wɛ yɔ gigi an gaas rɔb yɔ wɛ gaak a Bɛt ge, raakɔ a ya̧a̧ wɛ bɔ gi waak nuŋgɔ baaniki.

¹⁶Bɔnɛ zɛn rɔbgɔk hi ɗaatingo hi gaasɛ, ya̧a̧nɛ Bɛt gɔ harig hi gaas wɔrɔ anbɔ.

¹⁷Kɛmsin wɔ hi gisin gbɔnɔ dorko, fɔn hinyɔ gɔ hi raanɛ anyɔ hi gi kol nɛ ooko, anyɔ gi an hii hi fɔks Bɛt hin wɔrɔ woosɔ. Kɛmsinɛhi an hi woo woosya̧ hi hato, bɔgi gi hi kpoos ɗɔbti. Hin bɔ lab yɔ ɗaasin hinza gɛ.

¹⁸Zɔ̧bsinwi Bɛto, wi mɛɛ bɛttɔnɔ a kpoos wi gaaga, giw ha̧a̧k an wi ɛmb rɔbtɔnɔ a hinyɔ gi gedu sɛw.

¹⁹Mi gin ɛrk hi tɛŋk an nɛ zɔ̧bsib Bɛto an gi wɛɛnim nɔɔktɔnɔ a nɛɛge.

²⁰Hɔnɛ, an Bɛt yɔ gi gaak boolumi, za̧a̧nyɔ wɛnz Waar wɛ Yeesu a wɔrkɛ teesdu yɔ gi tam wɔ nɛɛraya̧ gbɔɔl hi ya̧a̧wɔk ga̧a̧m yɔ gɔ gi waa faa,

²¹gi gaan tɛŋk a woos rɔb yɔ ha̧a̧g geɗu sɛw, gi wɛɛ gi woo hinyɔ riisige a wɛ kpoos du hi Yeesu Kristu, za̧a̧nyɔ gbɔlums gi ge wɛlɛ hi wɛlɛ. Aanbɔ!

²²Yɛ̧ɛ̧dɛ mi wɛ, mi zɔ̧nɛ an nɛ mɔm nɛ ta̧a̧ dɔgl mi yɛrɛ mi gin tɛŋk gaanuko, ya̧a̧nɛ mi bi̧i̧sin dɔglɔ kaasi.

²³Mɛɛn a yɛ̧ɛ̧ wɛ Timɔte hi tùùsigtuus a luknɔdu. Gi zaa hɛdi nɔɔk-tɔnɔ, wi retin hi gii an mi seezinɛ.

²⁴Boon dood wɔ hi gisin gbɔnɔ dork sɛw, hi Bɛt doodɔ wɔ sɛw. Bɛt doodɔ zaadɛ wɔ hi fu̧u̧z a Itali hi boozinɛ.

²⁵An Bɛt gɛmsilɔ gigi hi nɛɛ sɛw! Aanbɔ!