Read Doyayo IBRANIŊKO 2 Bible Online

IBRANIŊKO 2 - Doyayo bible

IBRANIŊKO 2

¹Yɔ anbɔ, yɛwɛ wa̧a̧ Dɔgl Rɔb yɛrɛ wɛ kɛm hi kpoos gbun gi daarlɛlɛ, muulɔge gi daarɔ, an bɔwɛ hɛɛ gbɔnɔ wɛ hɛml hi hin wɔrɔ.

²Ya̧a̧nɛ, dɔglyɔ Bɛt walɛsɛrɛ wɔ hi dɔgɔ zuun tɛŋkɔ, wɛɛ dɔgl gɔ mat nɛ za̧a̧nyɔ ɗa̧a̧ Bɛtmaakdɔgl za gbun dɔɔdu gi lāg gɛ sɛw.

³Nɛ yɔ anbɔ, gid wɛɛ yɔ wɛ kɛm za̧a̧tig gbɔɔl yɔ daarlɛl dɔglɔ, wɛ wā̧ā̧ gɛ, wɛ ɔɔ ditɔs, gi an wɛ wir dɔgl-gbaak bɔ ri ma nɔ? Waar Yeesu yɛɛl dɔg nɛ dɔglɔ gɔ kete, wɛɛ dood wɔ hi kɛm nɛ hi wɛɛ hi boosɛ dɔglɔ wɛ mɛɛn a gi rɔbo.

⁴Wɛɛ Bɛt zuun dɔglya̧ hɛw hi gɛrs hinzuunikyaadɛ, hi gɛrs tɛŋk-yaadɛ, hi gɛrs zaadɛ sɔmsɔm hi Mɔkilɔ gaasɔ yɔ gaa anyɔ ha̧a̧g giya.

⁵Ya̧a̧nɛ Bɛt gāā walɛsɛrɛ ɔ̧ɔ̧ waar ums a waal yɔ gɔ gi zaa wɛ dɔk dɔglɔ a zulɔge gɛ.

⁶Yɛrɛ doo za raa dɔglɔ a lɛlza a Baa Bɛto, nɔ gi doo an gɔ mɔ mɔkige? Nɔ gi doo an mɔ kaŋkige?

⁷Mɔ tiisige a walɛsɛrɛ mɔ wɔ hi wɛɛdis am kaasi, mɔ hegsig ɗɔbsili hi gbɔlumsɛ an waar umskalɛ.

⁸Mɔ gbaa hin sɛw a gi dɔɔ dɔŋdi. Yɔ anbɔ ɔ̄ɔ̄ hinza yɔ taa a gi naan du gɛ gɛ. Hɔnɛ tuur ɓɔryɔ wɛ gbɛ̄ndir a hi gbaa hin sɛw a gi dɔɔ dɔŋdi kɛn gɛ.

⁹Yɛrɛ wɛ gbɛnik Yeesu , za̧a̧nyɔ hi tiisig a Bɛt walɛsɛrɛ wɔ hi wɛɛdis gi am kaasi, wɛ gbɛnig heg ɗɔbsili hi gbɔlums a wɔrk yɔ ha̧a̧ya̧a̧rɔ gi dɔŋgo. Anyɔ Bɛt ha̧a̧g nɛ dood gɛmsugo, ta̧a̧ an Yeesu gi kɛm wɔrkya̧a̧rhantɔ a dood wɔ hi dɔŋg sɛw.

¹⁰Ya̧a̧nɛ, Bɛt gii gi hinwɔ kim sɛw zulɔya, gi gig nɛ ha̧a̧k an gi kam walɛwaat kittɔnɔ gi tuurinihi a gbɔlums du, rii an gi loo za̧a̧tigya̧ gbɔnɔdorkya bɔ taan hin-a̧a̧bi gi ha̧a̧nig ya̧a̧rɛ. Gii be, ya̧a̧rɔ bɔ yɔ̧ anbɔ, gaasig da̧a̧da̧.

¹¹Yɔ anbɔ, Yeesu doogaasigya bɔ a Bɛt muutdu hi dood wɔ gaasihi sɛw baaya̧ gbunu. Ya̧a̧nɛ seem gi ha̧a̧ge an gi elihi a hi yɛ̧ɛ̧dɛ been gɛ,

¹²anyɔ dɔgɔ: a Baa Bɛto, bé dɔks yɛ̧ɛ̧ɗɛ be wɔ nuŋg mɔ, be ɛɛhin be baanum a dood mɔ wɔ mɔksigya̧ bɔ gedu.

¹³Wɛɛ dɔg ɓɛ a bé gbaa kpoos be a Bɛt ge. Wɛɛ dɔg ɓɛ a be gi gɛrɛ, hi waat wɔ Bɛt gaabe.

¹⁴Yɔ anbɔ, anyɔ waat wɔ hi gi muulɛ hi ga̧a̧mɛ, gii Yeesu hi zulɔ hɛw wɛɛ anbɔ, an gi wɔr gi ha̧tir Saydanu tɛŋkɔ a wɔrk zulha,

¹⁵gi wɛɛ gi za̧a̧s dood wɔ hoob gihi nɛ ha̧a̧k wɔrk hi gi an gbaarɛ a waabilya̧ yɔ hi waak gedu sɛw.

¹⁶Hi rɔb ɔ̧nɛ, Yeesu zāās Bɛt walɛsɛrɛ wɔ hii ɗaak gɛ, zaas Abraham waat ɔ̧ɔ̧n ɗaako.

¹⁷Yɔ anbɔ rii an hi wɛɛnig an yɛ̧ɛ̧dɛ ɔ̧ɔ̧ wɔ a hinyɔ gi gedu sɛw an gi wɛɛ Bɛtmaak-wookya gbɔɔl mɔɔt ya̧a̧rmɛɛkya yɔ gɔ woo hinyɔ raa sɛw a Bɛt woos du, an gi gaa zulɔ a Bɛt ge an hinha̧a̧l naandɛmsɛ a doodɔ wɔ hi dɔŋgo.

¹⁸Ya̧a̧nɛ gii hi zulɔ hi ha̧a̧nigya̧a̧r hi maatige, ɗɛɛ an gi ɗaas dood wɔ Saydanu gihi maatig be.