Read Doyayo IBRANIŊKO 5 Bible Online

IBRANIŊKO 5 - Doyayo bible

IBRANIŊKO 5

¹Yɔ anbɔ, Bɛtmaakwookya gbɔɔl yɔ hi herig sɛw a dood teesdu, hi gbaas doodɛ an gi woos Bɛt woosɛ, gi gaa Bɛt gaasɛ hi namb wɔ hi gbɛɛr an Bɛt gi bis hinha̧a̧l hi dɔŋgo.

²Ɗɛɛ an gi mɔms dood wɔ hi mɛɛhin gɛ hi wɔ hi wag gbɔnɔ hinɛ anyɔ gii gi a hɔntil wɔ hi gbaŋ hɛw.

³Yɔ anbɔ, gɔ gi kamzig maaknamb wɔ gbɛɛr an gi ha̧sin hinha̧a̧lɛ. Taa an gi ha̧sin dood ya̧nɛ kpɔdi, gi ha̧sin ɔ̧nɛ hɛw.

⁴Bɛt gi el doo za an Haruna gɛ, za̧a̧nɔ taa look Bɛtmaakwookya gbɔɔl mɔɔt gbɔlumsɛ.

⁵Yɔ gi anbɔ, Kristu lōō zulɔ an gi wɛɛ Bɛtmaakwookya gbɔɔl mɔɔt gɛ, Bɛt gii raage: a mɔ gi waa beenɛ, nɛɛko be mɔɔmmɔ!

⁶Bɛt wɛɛ dɔg a lɛlza ɓɛ: a mɔ gi maakwookya faa, mɔ fu̧u̧ a maakwookya gbɔɔl bɔ Mɛlsisedɛk dɔ̧ɔ̧t du.

⁷Yɔ Yeesu ginɛ hi muutɔ a waal du, zuun zɔ̧kɔ wɔ hi naandɛŋkɔ wɔ hi kaalɛ hi mɛɛko a Bɛt yɔ ɗɛɛ nɛ an gi za̧a̧sig a wɔrk du gedu. Bɛt wɛɛ ta̧a̧ zɔ̧kɔ zeg anyɔ hoob gig ha̧a̧ko.

⁸Anyɔ gi nɛ Bɛt waa gii hɛw, gok zultiisig hi ya̧a̧rhantɔ wɔ hiya.

⁹A ɔ̧tyɔ wɛɛ doo gbɔɔl gi ram gi da̧a̧, wɛɛs dood wɔ hi gisig tɔn kɛŋk sɛw za̧a̧tig faa zulɔya.

¹⁰Bɛt dɔ̧ɔ̧sig nuŋgɔ gɔ a Bɛtmaakwookya gbɔɔl mɔɔt yɔ fu̧u̧ a Mɛlsisedɛk dɔ̧ɔ̧t du.

¹¹Dɔgl gis kittɔnɔ an wi dɔg a hin wɔrɔ hage hi hin zaadɛ ɓaatil wɔ dɔglɔ gaasugɔ, anyɔ nɛ sam nɛ dɔglɔ kɛŋk nɔɔktɔnɔ gɛ ya̧a̧nɛ.

¹²Yɛrɛ nɛya, wɔ nɛ ginɛ an nɛ wɛɛ hingokya adɛ amntɔnɔ, ha̧a̧n an hi wɛɛ hi gogsin hinwɔ hi yɛɛl a Bɛtdɔgl du giya. Ha̧a̧n an nɛ a̧a̧m wā̧ā̧lɛ, nɛ tɔ̄ɔ̄ an nɛ le kok ɓaatil gɛ.

¹³Yɔ anbɔ doo gi gi a̧a̧mik wa̧a̧lɛ, mɛ̄ɛ̄ hinriit gɛ̧ɛ̧k hi ya̧a̧gɔ̧ɔ̧n gɛ, gi waayɔ.

¹⁴Kok ɓaatil gɔys dood ɓatɛ wɔ hi rɔ̧ɔ̧s dɔglɔ hi wɛɛ hi gɛms zulya̧ an hi mɛɛ rɔb gɛ̧ɛ̧k hi ha̧a̧lɛ.