Read Doyayo IBRANIŊKO 6 Bible Online

IBRANIŊKO 6 - Doyayo bible

IBRANIŊKO 6

¹Yɔ anbɔ, yɛwɛ re doosɛ a hingok gbɔlɛ wɔ gedu. Bɔwɛ fɔ ɗɔɔtugɔ a hingok wɔ hi yɛɛl a Kristu ɗɔbsugɔ bɔ gedu. Bɔwɛ wɛɛ wɛ yɛɛl ɗɔbsig bɔ sɛŋkɔ zɛɛki, an woos tɔs wɔ ɔɔkɔ dɔglɔ, hi Bɛt ɗɔbsig dɔglɔ,

²hi Bɛtmɛm bɔ hotingo ɔ̧ɔ̧ gokingo ɔ̧ɔ̧ dɔglɔ sɔmsɔm, hi naangbaak a dood zulha ɗɔglɔ, hi wɔrkɛ rɛmtig dɔglɛ, hi dɔgl-gbaak faa dɔglɔ.

³Bɛt gi ta̧a̧, wɛ́ gɔ hinɔ.

⁴Dood wɔ hi gbɛn nɛ lɛlgaal yɔ fu̧u̧z a Bɛt ge, wɔ hi dag bɛtha gaasɔ, wɔ hi dag Bɛt Mɔkilɔ ya̧nɛ,

⁵wɔ hi dag Bɛtdɔglɔ rɔb bɔ hɛmntigɔ hi tɛŋk wɔ bɛtha gɔ hi zaa,

⁶gid dood wɔrɔ hi wɛɛ kuudu hi ɔɔ Bɛto hi bis dɔglɔ hi wɛɛ hi matig a hi waabil ha̧a̧l du, ri hi wɛɛz hi zɛmr kpoosya̧ ɓɛ? Dood wɔrɔ lab hi do̍o̍ Bɛt waa bɔ gii dɔɔ eesim a dɔ̧ɔ̧rha hi zulya̧ hi gbaag niit ha a dood lɔlgbar sɛw.

⁷Bɛt gi rɔbsig hɛbt yɔ gɔ gi waak bɛl naŋsig lɛlɔge, yɛm tuur disɛ, gi pisig lees wɔ an gi ɗaas dood wɔ hi balko.

⁸Nɛ an hɛbt bɔ gi pisig kobsɛ hi hɛt ha̧a̧l wɔ, taa an gi ɗaa hinza. Taa aŋko, Bɛt gi booge, kuudu hi wɛɛ hi gbaasig laa an kobs bɔ hi hɛt ha̧a̧l wɔ hi dɔ̧ɔ̧.

⁹Nɛ yɛrɛ anyɔ wɛ book nɛ anbɔ gii si̧, yɛ̧ɛ̧dɛ mi wɛ, wi gi ooko, wi mɛɛ a hinyɔ gi nɛnɛ, gɛ hin rɔbɛ wɔ gɔ hi ka̧nɛ a za̧a̧tig du.

¹⁰Bɛt taa hindɔɔmwookya an gi zɛn woos nɛ hi ha̧a̧tig yɔ nɛ zuun hi nuŋgɔ, nɛ woos doodɔ woosɛ, nɛ wɛɛ nɛ gisihi wooko.

¹¹Ha̧a̧w an nɛ gbunu gbunu nɛ zuun tɛŋk gbun bɔ gii a nɛ woos du nɛ gbaa kpoos nɛ gi tuur a hinyɔ nɛ mɔkig geha.

¹²Bɔnɛ nambrɔ, fɔn dood wɔ hi ɗɔbsig Bɛt hi hinmɔŋki gid hi dak hinyɔ Bɛt raa nɛ a bé gaawɛ.

¹³Yɔ Bɛt raa a bé gɔs Abraham hinza, ɗɛ̄ɛ̄ an gi dɛŋglhin a doo za gbɔɔl yɔ daarig gi nuŋg du gɛ, dɛŋgl hi nuŋg ɔ̧ɔ̧nɛ,

¹⁴dɔgɔ: a hɔɔ, bé rɔbsumɔ, bé wɛɛ bé tɔŋks dɔ̧ɔ̧t mɔ.

¹⁵Àbraham fɔb anbɔ hi hinmɔŋki gi dag hinyɔ Bɛt raa a bé woosige.

¹⁶Ya̧a̧nɛ dood hi dɛŋglikhin hi za̧a̧nyɔ daarihi nuŋgɔ. Hindɛŋglik gi raak rɔb gaatyɔ, gi kaarik hinwatingoya yɔ gi sɔmsɔm hi teesdu sɛw.

¹⁷Ya̧a̧nɛ Bɛt yɔ ha̧a̧g an gi zuns dood wɔ gɔ hi dag hinyɔ raa a gi woosihi gaattɔnɔ gi daarɔ, gi wɛɛ gi zunsihi a mɔkilɔ taa zɛmrik zaŋ, gaa hinɔ tɛŋk hi hindɛŋglikyɔ.

¹⁸Hin eerɛ hi gi faa, raakɔ a ya̧a̧wɔki hi hindɛŋgliki, ɗɛ̄ɛ̄ an gi gɔ̧ɔ̧ya̧a̧ gedu gɛ. Yɔ anbɔ wɛ zɛm yaatillɛl a gedu, wɛ zɛm tɛŋkdaklɛl a gedu an wɛ gbaa mɔkil wɛ a hinyɔ Bɛt gbaasɛ gedu.

¹⁹Mɔkilgbaak bɔrɔ gisɛ wɛnɛ kol wɛ doonis bɔ an tus yɔ gɔ hi doon lɛmb a zɛɛdu ɓaattɔnɔ bɛttɔnɔ giya; doonis bɔ tal tuur a Bɛtluk bɔ bɛtha gbandilɔ bɔ kuuɔ ge a lɛlgaat bɔ gedu,

²⁰a lɛlyɔ Yeesu gul ge a wɛ zulɛ an gbɔnɔdorkya. Ya̧a̧nɛ, anyɔ fu̧u̧ a Mɛlsisedɛk dɔ̧ɔ̧t du, Bɛt wɛɛnig maakɔ-wookya gbɔɔl mɔɔt faa.