Read Doyayo IBRANIŊKO 7 Bible Online

IBRANIŊKO 7 - Doyayo bible

IBRANIŊKO 7

¹Mɛlsisedɛk bɔ za̧a̧nɔ gi nɛ Waar i a Salim waal gbɔɔl du, gi Bɛt a wɛɛha maakɔwookya rek a Abraham ge yɔ wɛɛz a waar ɛ wɔ gbɔŋkya̧ bɔ gedu, rɔbsige,

²Abraham ɓesig hinyɔ dag nɛ sɛw du kooblɛ an gaasɛ. Nuŋg bɔ a Mɛlsisedɛk hinɔ raakɔ a Rɔbgɔk Waar yɔ. Wɛɛ gi Salim Waar i, raakɔ a Boolum Waar yɔ.

³Taan baa, taan nàa, taan yaasɛɛ. Hi mɛ̄ɛ̄ mɔɔkɔ dɔgl gɛ, hi mɛ̄ɛ̄ wɔrkɔ dɔgl gɛ. Mɛlsisedɛk gi waak Bɛtmaak-wookya faa, riitin an Bɛt waa.

⁴Nɛ gbɛn Mɛlsisedɛk gbɔ-lumsɔ daar nɛ lɛl zaŋ yaa wɛ Abraham gi gaag gaas gbɔɔl yɔ wɔɔz a gabs du du kooblɛ.

⁵Dood wɔ hi fu̧u̧ a Lewi dɔ̧ɔ̧t du, hi gaahi Bɛtmaakwookya woosɛ, maakdɔgl raa an hi loo dim gaas a dood wɔ hi du kooblɛ, raakɔ a hi loo a nahiza Ibraniŋkoya wɔ hi fu̧u̧z a Abraham dɔ̧ɔ̧t du hi.

⁶Wɛɛ Mɛlsisedɛk dɔ̧ɔ̧tɔ fu̧u̧ a Lewi dɔ̧ɔ̧t du gɛ, loo Abraham gaasɔ gbun a koobl du, rɔbs za̧a̧nyɔ Bɛt raag nɛ a bé woosig hinza.

⁷Hi rɔbo, hinza faak taaɗu: za̧a̧nyɔ gi rɔbsugo gbɔ-lumsɔ daar za̧a̧nyɔ hi rɔbsig daarɔ.

⁸Yɛrɛ hɛdi a Lewi dɔ̧ɔ̧t du, wɔ hi look gaas yɔ dood gɔ hi gaa, hii gi dood wɔ hi wɔrko; hɔnɛ a Mɛlsisedɛk dɔ̧ɔ̧t du be, za̧a̧nyɔ gi look gaas yɔ dood gɔ hi gaa, gɛ doo za̧a̧tili. Hinyɔ Bɛt ɗɛɛrwol raa giibɔ.

⁹Lewi gi nɛ a yaaɔsɛɛ Abraham buudu kete a ɔ̧tyɔ Abraham dagtin hi Mɛlsisedɛk gedu. Hɔnɛyɔ Abraham gaa Mɛlsisedɛk gaas anbɔ, wɛ ɗɛɛ an wɛ raa dɔglɔ a Lewi za̧a̧nyɔ gɔ gi zek hinyɔ dood hi gaako gii gaa Mɛlsisedɛk gaas hɛw a Abraham naan du.

¹¹Bɛt gaa Israhilaya wɔ maakdɔglɛ, es a Lewiya wɔ Bɛtmaakwoosya̧ wɔ hage. À woosya̧ bɔ ɗɛɛ nɛ an gi wɛɛn dood rɔbwookyaadɛ gi da̧a̧, yɔ taa nɛ an Bɛt gi her maakɔ-wookya za dɔɔm yɔ fu̧u̧ a Mɛlsisedɛk dɔ̧ɔ̧t du. Yɔ lòò nɛ doo za yɔ fu̧u̧ a Haruna dɔ̧ɔ̧t du giya. Yɛrɛ ɔnɛ, Bɛt her za̧a̧nɔ a Mɛlsisedɛk dɔ̧ɔ̧t du.

¹²Bɛtmaakwookya gi bɛɛ zɛmruko, maakdɔglɔ gi zɛmr gɔ be.

¹³Yɔ anbɔ Mɛlsisedɛk za̧a̧nyɔ hi dɔg hin wɔrɔ gi zulha, gi dɔ̧ɔ̧t zaayɔ. A dɔ̧ɔ̧t wɔrɔ hi teesdu, doo za wōō nɛ woos a Bɛtmaaksɛŋk bɔ hage zaŋ gɛ;

¹⁴ya̧a̧nɛ hi mɛɛ sɛw a Waar Yeesu fu̧u̧ a Yahuda dɔ̧ɔ̧t du, yɛrɛ Muusa dɔ̄g hinza a gi an Bɛtmaakwookya za gi fu̧u̧ a dɔ̧ɔ̧t bɔrɔ gedu gɛ.

¹⁵Hin bɔ lab dɔglɔ wɛɛ gaaga anyɔ Bɛtmaakwookya za dɔɔm mid gi riitin hi Mɛlsisedɛk.

¹⁶Hí gbāag Bɛtmaak-wookya a dɔ̧ɔ̧tɔ dɔŋg an hinyɔ hi wɔya̧a̧ hage gɛ, gii wɛɛ Bɛtmaakwookya hi za̧a̧tigɔ yɔ gɔ da̧a̧ gɛ tɛŋkɔ.

¹⁷Bɛt ɗɛɛr-wolɔ dɔg dɔgl segya a gi zulha be a mɔ gi Bɛtmaakwookya faa yɔ fu̧u̧ a Mɛlsisedɛk dɔ̧ɔ̧t du.

¹⁸Yɔ anbɔ hi bis dɔgl amnt bɔ anyɔ da taan tɛŋko, wɛɛ gi hintɔsyɔ.

¹⁹Muusa maakdɔglɔ bɔ dā̧ā̧s hinza gɛ - yɛrɛ wɛ dag mɔkilgbaak rɔb yɔ tɔɔ gi daarlɛlɛ, wɛ dagn gii gbɔnɔ sɔɔk a Bɛt dɔŋdi.

²⁰A gedu be, Bɛt hindɛŋglikɔ giiro. Ya̧a̧nɛ anyɔ Lewiya wɔ hi wɛɛ Bɛtmaakwookya amntɔnɔ hindɛŋglik gi taa du gɛ,

²¹Yeesu wɛɛ Bɛtmaakwookya hi hindɛŋglikyɔ, a Bɛt raag hi hindɛŋglikɔ bɔ: a Waar Bɛt dɛŋglɔ, taa an gi wɛɛ gi zɛmr mɔkilɔ: mɔ gi Bɛtmaakwookya faa.

²²wɛ mɛɛ gɔ rɔbtɔnɔ a Yeesu kamz ya̧a̧wɔk yɔ daar zaa amnt bɔ.

²³Yɔ daarɔ, Bɛtmaakwookya hi da hi gi kittɔnɔ yɔ wɔrk taahi nɛ ɔɔk aŋko.

²⁴Gii ɔ̧nɛ yɔ gi waak faa, gin Bɛtmaak wooswook yɔ taa an gi gaa doo za be.

²⁵Hinɔ anbɔ ro gi ɗɛɛ an gi za̧a̧s dood wɔ hi sɛ̧ɛ̧bik hi gii ɓɔryɔ hi faa a Bɛt dɔŋdi gaattɔnɔ anyɔ gi za̧a̧til faa an gi zɔ̧bsihi Bɛto.

²⁶Rii nɛ an wɛ dag Bɛtmaakwookya gbɔɔl mɔɔt an giya, gi gi doo gaat a Bɛt muut du yɔ taan hinha̧a̧lɛ. Doo yɔ taan hin-a̧a̧b nɛ zaŋ, yɔ hɛɛtin hi hinha̧a̧lyaadɛ, yɔ hi dɔɔnig a Bɛt dɔŋgdi,

²⁷rı̄ı̄tin an Bɛtmaakwookya zaadɛ gɛ; hā̧a̧g namb gbɛɛrik ɔ̧t nuŋgo an gi gɔs Bɛt maak an Bɛtmaakwookya gbɔlɛ amntɛ wɔrɔ gɔ hi wook gɛ - an gi yɛls zul ɔ̧nɛ wooko, kuudu gi woos dood ya̧nɛ gɛ. Gaa zulɔ an Bɛt gaas dɔɔ gbunu gaatɔ giya.

²⁸Muusa maakdɔglɔ gbaa dood hɔntil wɔ an Bɛtmaakwookya gbɔlɛ; yɛrɛ hindɛŋglik dɔgl bɔ zaa kuudu a Bɛtmaakdɔgl bɔ gi kalɛ, gbaa Bɛt waa bɔ an Bɛtmaakwookya gbɔɔlɛ an gi gáa a Bɛt muutdu faa.