Read Doyayo IBRANIŊKO 9 Bible Online

IBRANIŊKO 9 - Doyayo bible

IBRANIŊKO 9

¹Ya̧a̧wɔk amnt bɔ da ginnɛ Bɛtbaanikwoos dɔgl-gaak sɔmsɔm hi Bɛtluk yɔ gi waal du.

²Lukgbandil yɔ rɛɛyyɔ gi lukgbandil doosyɔ. À buuɔ gedu, lɛlbɔ gɔ hi el a lɛlgaatyɔ, laa gbaaklɛl giro, kɔntil hɔɔt giro hi kok wɔ hi gbaas Bɛto.

³Lɛl za bɔ gi nɛ a gbandil fɛɛt eesum bɔ kuuɔ ge, hi el gii a lɛlgaatɛ wɔ lɛlya̧ gaatyɔ.

⁴Gin sɛŋk yɔ hi wɔm hi hɛɛlmɔt an gɔ hi gbaa kurum ki̧i̧lhɛmntya hage, hi akɔti gbɔɔl yɔ hi wɔya̧a̧ muulɔge hi sɔɔrin muulɔ sɛw hi hɛɛlmɔto. A akɔti gbɔɔl bɔ gedu hɛb yɔ hi wɔ̧mn hɛɛlmɔt hi yaa kok za nuŋgɔ a maani gedu, hi Haruna sɔɔlɔ gɛrsya bɔ kɔ̧ɔ̧ kɔ̧ɔ̧rɛ, hi bet hɛɛgil wɔ Bɛt bi̧i̧ hin geha hi wɔya̧a̧ muulɔge.

⁵Hi wɔm hin zaadɛ eerɛ hi riitin an Bɛt walɛsɛrɛ , hi er an hi zuun Bɛt gbɔlumsɔ a akɔti gbɔɔl bɔ hi wɔmn hɛɛlmɔt hage, hi yaat hinha̧a̧l bisig lɛl bɔ hi zeksya̧. Yɛrɛ ɓɔryɔ wí ɗɛ̄ɛ̄ wɔd wɔrɔ dɔglya̧ gok sɛw gɛ.

⁶Hi gɛms hin wɔrɔ sɛw anbɔ, Bɛtmaakwookya wɔ hi woosig Bɛt maakɔ hi gulik duhɔ lurkbed a lukgbandil buu doos bɔ gedu.

⁷Wɛɛ a buu eesim bɔ gedu, Bɛtmaakwookya gbɔɔl mɔɔt bɔ gii gɔ gul gedu dɔɔ gbun kpɔd a wɛl nuŋgo. Gul hinɔ duhɔ gi ɔɔ namga̧a̧m kaŋk an gi wa̍a̍tɔ gi gaasin zulɔ hi dood hin-a̧a̧b ya̧nɛ gɛ.

⁸Bɛt Mɔkilɔ zuun nɛ hin anbɔ a lɛlgaat rɔb bɔ gbɔnɔɔ kpɛ̧ɛ̧r nɛ ket gɛ anyɔ lukgbandilya doos bɔ ginɛ kete.

⁹Lukgbandilya doos bɔ gisɛ ya̧a̧daanikyɔ gi zuunik a ɔ̧t yɛrɛ gi zulɛ. A ɔ̧tigi zulɛ hi gaak Bɛt gaasɛ, hi wɛɛ hi gbɛɛrik nambo, hi gɔnsig Bɛt maakɔ a gedu a hinha̧a̧l dɔŋgo, wɛɛ hin wɔrɔ sɛw hi ɗɛ̄ɛ̄ an hi gaas doo yɔ gi baanik Bɛto kpoosɔ gi er gɛ.

¹⁰Hi seek lees wɔ hi hinyɔ̧k wɔ hi maakwɔd doktig wɔ gɔ hi gɔk naabɔ sɔmsɔm. Hin wɔrɔ sɛw gi muulgaasig dɔgl wɔ hii kpɔd gi tuur a ɔ̧tyɔ Bɛt gɔ gi gɛms hin sɛw gedu.

¹¹Yɛrɛ yɔ Kristu zaa an Bɛtmaakwookya gbɔɔl mɔɔt a hinrɔbɛ wɔ gɔ hi záásɛ geha, tal a lukgbandilya gbɔɔl rɔb yɔ daarlɛl gedu. Hi gɔ̄n lukgbandil bɔrɔ hi doo naan gɛ, raakɔ a fu̧u̧ a waal yɛrɛ gedu gɛ.

¹²Kristu gul gedu dɔɔ gbun gaatɔ gii a lɛlgaat mɔɔt bɔ gedu, tāl hi is kpaar ga̧a̧mɛ hi nawaat gbɛɛrik ga̧a̧m a gedu gɛ, yɛrɛ tan hi ga̧a̧m ɔ̧nɛ bɔ gii zaŋ gi tuusin zul wɛ a hinha̧a̧l du a aakil du faa.

¹³Ya̧a̧nɛ gɔ hi loo nawalɛ wɔ hi isɛ kpaar wɔ ga̧a̧mya̧ hi naakimlɛ hi gbɛɛrige hi dɔ̧ɔ̧sig a laadu tamɔ hi waas dood wɔ hi ɓi̧i̧l a muulɛ an gi gaasihi, muulya̧ gi kɔm gaattɔnɔ.

¹⁴Nɛ Kristu yɔ gaa zulɔ hi Mɔkil faa a Bɛt muutdu gaattɔnɔ, ga̧a̧mɔ bɔ gi tɛŋkya gbɔɔltɔnɔ daarlɛlɛ, gi gaas mɔkil nɛ wɔ hi gi a woos wɔrkil du an nɛ woos Bɛt za̧a̧til bɔ woosɛ.

¹⁵Hinɔ giya gi a ya̧a̧wɔk seg bɔ teesɔ gedu hi Bɛto, an dood wɔ Bɛt elihi hi dag rɔɔs faa bɔ hi wɔb ya̧a̧ hage, yɔ Bɛt raa nɛ a bé gaahi. Hi ɗɛɛ an hi dagige anyɔ wɔrk za giro. Kristu gii wɔr ga̧a̧mɔ bɔ gi za̧a̧s dood a hi hinha̧a̧l du, anyɔ hi da hi fɔk nɛ ya̧a̧wɔk amnt bɔ.

¹⁶Ya̧a̧nɛ lɛlyɔ ya̧a̧ rɔb ɗɛɛrwol dɔgl gige, gi an dood wɔ hi mɔkig fɔkɔ hi zuun a za̧a̧nyɔ gbaa hin bɔrɔ, wɔɔrɔ.

¹⁷Yɛrɛ à za̧a̧n bɔ bi̧i̧ ɗɛɛrwol bɔ wɔr nɛ ket gɛ, ɗɛɛrwol bɔ dɔglɔ yɔ ɗɔb gɛ. Ɗɛɛrwol bi̧i̧k bɔ dɔglɔ tɛŋkɔ gɔ giro, gɛ za̧a̧nyɔ bi̧i̧ge gɔ wɔrɔ.

¹⁸Hinɔ gii hi gɔn ya̧a̧wɔk biitir bɔ hɛw hi namga̧a̧mɛ.

¹⁹Bààrɔ, yɔ Muusa boos dood saal wɔ sɛw hinyɔ maakdɔgl raa sɛw, lòò naa kpaar ga̧a̧mɛ hi iskpaar ga̧a̧mɛ, hi mɛmɛ, hi tam sɛɛs hobo, hi kaldekpasɛ ɔksɔ, waat a ɗɛɛrwol bɔ hage, hi a dood muul sɛw dɔgɔ:

²⁰a yɛrɛ gi ya̧a̧wɔkyɔ Bɛt raa a nɛ fɔbɔ ga̧a̧mɔ bɔ giya.

²¹Wa̍a̍t namga̧a̧m bɔ anbɔ a lukgbandilya bɔ hage hi a wɔdɔ wɔ gɔ hi woonik woosɔ hage.

²²Wag kaasi an hinyɔ gi sɛw gi gaa hi namga̧a̧mɛ a maakdɔgl du. Namga̧a̧m gubrig gi taa gɛ, hinha̧a̧l bisig taaro.

²³Bɛr nɛko an hi gaas hin wɔ hi gi bɛtha fɔtɔya̧ anbɔ; yɛrɛ hinwɔ hi gi bɛtha zaŋ gi an hi gaasihi hi hinyɔ ga̧a̧mɔ tɛŋk daar wɔrɔ bɛrkɔ.

²⁴Ya̧a̧nɛ, Kristu gi gul a lɛlgaat yɔ doo hi gɔn naan gedu gɛ, an hinyɔ hi goksin lɛlgaat mɔɔt bɔ fɔtɔ ɔ̧ɔ̧: yɛrɛ gul a bɛtha zaŋ an gi tursɛ a Bɛt muutdu.

²⁵Wɛɛ gul a bɛtha an gi gaa zulɔ dɔɔ kittɔnɔ anyɔ Bɛtmaakwookya gbɔɔl gɔgi gulik a lɛlgaat bɔ gedu wɛl nuŋgo gi kām ga̧a̧m za dɔɔm gɛ.

²⁶An ginɛ anbɔ, ginɛ an gi ha̧a̧nɛ ya̧a̧r dɔɔ kittɔnɔ yɔ waal yɛɛl nɛ gi ki̧yɔ. Yɛrɛ ɓɔryɔ mid dɔɔ gbun gaatɔ giya yɔ waal sɛ̧ɛ̧b da̧a̧ko an gi ha̧s hinha̧a̧l hi zulɔ yɔ gaa an namb yɔ gɔ hi gbɛɛrig hi gɔn maako.

²⁷Anyɔ gis nɛ ɗoo a gi wɔr dɔɔ gbunu kuudu dɔgl-gbaak gi zaa,

²⁸gbunɔ gii Kristu gi gaa zulɔ dɔɔ gbunu an gi ha̧s dood kittɔnɔ hinha̧a̧lya̧; gi midzig dɔɔ eesimɛ a dood wɔ hi gig nɛ ook an gi za̧a̧sihi hi. Midzigɔ bɔ gi taa a hinha̧a̧l dɔŋgo.