Read Doyayo YAKUBA 2 Bible Online

YAKUBA 2 - Doyayo bible

YAKUBA 2

¹Yɛ̧ɛ̧dɛ mi wɛ, nɛɛ yɔ nɛ ɗɔbsig Waar wɛ Yeesu Kristu doo gbɔlumsya bɔ, taa an nɛ see doo a muutdu.

²Mɔkin ta̧: an doo za rɔɔsya gul a nɛ mɔksilluk du hi banawaa yɔ hi tun hɛɛlmɔt gi heg naan du, hi gbandil bɛt muulɛ; wɛɛ gid ya̧a̧ryawaa za zaa gul a mɔksilluk bɔ gedu hi gbandil haŋsil be, yɔ nɛ woo ri?

³An nɛ see za̧a̧n rɔɔsya bɔ heg gbandil rɔb muul gii nɛ raage a ɗɔɔtum a lɛl rɔb yɛrɛ ge, nɛ wɛɛ nɛ raa gbandil haŋsilya bɔ be: a erum hɔ! Zaabe a ɗɔɔtum be dɔɔ dɔŋdi a hɛbt di,

⁴yɔ anbɔ, nɛ gbàà gɛ̧ksili a nɛ teesdu, nɛ wɛɛ nɛ gɛ̧ɛ̧k dɔgl bɔ hi mɔkil ha̧a̧lɛ.

⁵Kɛnɛ, yɛ̧ɛ̧dɛ mi rɔbɛ wɛ, nɛ Bɛt her ya̧a̧ryaadɛ a waal lɔlgbarɔ an gi wɛɛnihi dood rɔɔsyaadɛ hi ɗɔbsigi an hi dag Bɛt wáátɔyɔ raa a be gaa dood wɔ ha̧a̧hi ge ma mi?

⁶Wɛɛ nɛya nɛ bɔ̧ɔ̧k ya̧a̧rya wɔ be! Nɛ rɔɔsya wɔ hi taan ya̧a̧kɛtingo hi taan dirk kaŋk a dɔglyɛ̧ɛ̧kluk wɔ hi du ya?

⁷Hii taa ya̧a̧ha̧a̧l book a nuŋg rɔb yɔ Bɛt gaan hage ya?

⁸Gid nɛ waak wook Bɛt wáát maakdɔgl yɔ hi bi̧i̧ a Bɛt ɗɛɛrwol du hi rɔbo: a gi ha̧a̧mɔ namɔza an mɔya, nɛ wook rɔbo.

⁹Yɛrɛ gid nɛ seek dood a muutdu nɛ gɛ̧ɛ̧k dood be, nɛ wook hinha̧a̧lɛ, nɛ wɛɛ nɛ wɛɛ Bɛtmaakdɔgl ha̧tirgoyaadɛyɔ.

¹⁰Za̧a̧ni fɔ Bɛtmaak wɔ sɛw gi wɛɛ gi ha̧tir zaaɔ gbunu, gɔ hin-a̧a̧bi a Bɛtmaak wɔ gedu sɛw.

¹¹Ya̧a̧nɛ za̧a̧nyɔ raa: a bɔmɔ naamansi, wɛɛ raa ɓɛ, a bɔmɔ gbɔm zulɛ; yɔ anbɔ gid mɔ́ nāāmans gɛ, mɔ́ gbɔ̍m zul be, mɔ wɛɛ Bɛtmaakdɔgl ha̧tirgoyayɔ.

¹²Yɔ anbɔ, boonya̧a̧, woon an dood wɔ gɔ hi gbaasihi dɔglɛ hi Bɛtmaakdɔgl rɔb tib yɔ gɔ tuus zul wɛ aakil du giya.

¹³Ya̧a̧nɛ, za̧a̧nyɔ mɛɛs naaza hii ya̧a̧r gɛ, Bɛt gi gbaasig dɔglɛ, taasig ya̧a̧rɔ mɛɛk be. Ya̧a̧rmɛɛki gɔ ɗɛɛ dɔgl-gbaak ɗɛɛ.

¹⁴Yɛ̧ɛ̧mi wɛ, doo gi raa a be ɗɔbsig Bɛto, gi wōōn-woosɔ du gɛ, gi an gi dag nɔ gedu, ɗɔbsigɔ bɔ gi za̧a̧sig ya?

¹⁵Gid yɛ̧ɛ̧mɔza zaa, zaabe siŋg mɔ gi taan gbandili, gi taan leesɛ,

¹⁶doo za a nɛ teesdu gi raahi: a rekum rɔbtɔnɔ! Hegum saŋks gbandili, an bɔ saŋks gi saŋgumɔ, mɔ lelees rɔbtɔnɔ mɔ hi̧i̧; hɔnɛ gi gāag gbandili zaabe lees gɛ, bɛn ma nɔ?

¹⁷Za̧a̧nɔ gi gi ɗɔbsig Bɛto, ɗɔbsigɔ bɔ gi kɔm ɔ̧ɔ̧kɔ gi ɔ̄ks hi woos du gɛ, wɛɛ hintɔsyɔ.

¹⁸Wɛɛ doo za gi raami: a mɔɔ mɔ gin ɗɔbsigi, bee be gin woosɛ; yɔ mi ta̧a̧g a zunsimi ɗɔbsig yɔ taan woosɔ du gɛ, mii mi zunsum ɗɔbsig mi hi woos mi.

¹⁹Mɔ ɗɔbsɔ a Bɛt gi gi gbun ya? Mɔ gɔ rɔbo! Yɛrɛ loorɛha̧a̧l wɔ hɛw hi gig ɗɔbsugo, wɛɛ hi beek hoob be.

²⁰Mɔɔ doo tɔs, hā̧ā̧mɔ an mɔ mɛɛ a ɗɔbsig yɔ taan woosɔ du gɛ gi hintɔsi gɛ ya?

²¹Nɛ Bɛt mɛks baa wɛ Abraham ri gi seeg an doo riiti ɔnɛ? Nɛ yɔ woo hinyɔ rii gii gi gaag ma waawal Isaaku an gaas ma a gi maaksɛŋk ha mi?

²²Mɔ gbɛn yɔ ɗɔbsigɔ ɔks hi woosɔ, ɗɔbsigɔ bɔ gaaga hi woosɔ bɔ.

²³Yɔ anbɔ, Bɛt da̧a̧s hinyɔ ɗɛɛrwolɔ raa: a Abraham ɗɔbs Bɛto, ya̧a̧ gii Bɛt gi seeg an doo riiti, hi wɛɛ hi elig a Bɛt sa̧a̧mɔ ga.

²⁴Yɛrɛ nɛ gbɛnɔ, doo gɔ rii a Bɛt muutdu a woosɔ rɔbɛ wɔ hi dɔŋgo, taa hi ɗɔbsigɔ bɔ gii kpɔd.

²⁵Hinɔ anbɔ ro hinɔ gi turs nis bɔ Rahab, nis kaat ha̧a̧l bɔ. Rahab wɛɛ doo riit a Bɛt muutdu a gi woos dɔŋgo. Gii zeb nɛ Israhila wɔ tɔmsyaya̧ wɔ gi goksihi gbɔnɔ za dɔɔm hi fɔb hi rekɔ.

²⁶Anyɔ muul gɔ taan kol gɛ gi wɔrɔ, gbunɔ giya ɗɔbsigi gi ɔks hi woos gɛ wɔɔr be.