Read Doyayo YAKUBA 3 Bible Online

YAKUBA 3 - Doyayo bible

YAKUBA 3

¹Yɛ̧ɛ̧dɛ mi wɛ, bɔ̄ dood kit a nɛ teesdu hi wɛɛ hingok- yaadɛ. Ya̧a̧nɛ nɛ mɛɛ a wɛ́ɛ́ hingokya wɔ hi gbààsɛ dɔgl gi daar dood zaadɛ ya̧nɛ daarɔ.

²Wɛ sɛw wɛ wook hin-a̧a̧bi hi gbɔnɔ sɔmsɔm. Za̧a̧n za gi gɔ hin-a̧a̧b a hinyɔ gi dɔk gedu gɛ, gi doo gaatyɔ, tɛŋkɔ ɗɛɛ an gi oo muulɔ sɛw.

³Gid wɛ yaa tus a dɔy ya̧a̧ du an gi lagsɛ tɔnɛ, wɛ gi kaŋk dɔy bɔ muulɔ a lɛlyɔ ha̧a̧wɛ ge sɛw.

⁴Yɛrɛ lɛmb gbɔlɛ wɔ mɛmbal gbɔɔl du: mɔkin tɔɔkya̧, zɛk gɔ fɛge gig renuko, nuukɔya bɔ gi nuunsɔ fɛŋwaa bɔ nuunuko gig renik a lɛlyɔ ha̧a̧g ge sɛw.

⁵Gbunɔ, mɛlyɔ ya̧a̧ du gi muul wansɔ zaayɔ, gi pɛɛk zulɔ, gi hin gbɔlɛ booko. Seen laa fɛŋwaayɔ gɔ dɔ̧ɔ̧ tɛs za gbɔɔlɛ.

⁶Mɛl yɔ ya̧a̧ du gi an laayɔ. Gin ha̧a̧l yɔ gi sɛw, mɛlyɔ ya̧a̧ du gi a muul du gi gaak muul ha̧a̧lɛ, gi ha̧tirgo muul wɛ sɛw gig kpɔɔk hi laa yɔ fu̧u̧z a ya̧a̧rhant lɛl du.

⁷Doo ɗɛɛ an gi ɛ̧ɛ̧n namb dɔ̧ɔ̧t wɔ hɛt du sɛw hi nɔɔs wɔ dɔ̧ɔ̧tya̧ sɛw, hi hinza̧a̧til wɔ hi ɛmbingo buu hi hinza̧a̧til wɔ mɛm du sɛw.

⁸Mɛl ɔnɛ doo za ɗɛ̄ɛ̄ an gi ɛ̧ɛ̧nig gɛ. Mɛl gi hinha̧a̧l yɔ gɔ tā̧ā̧ kɔmbik gɛ. Hi̧i̧s ɗɔŋk yɔ gɔ gbɔm doo giya.

⁹Wɛ gi baanik Baa wɛ Waar Bɛto hi mɛl yɔ ya̧a̧ du, wɛ wɛɛ wɛ gi boonik gii doo yɔ ki̧y an Bɛt ritinsɔ an boot gi wa̧a̧ge.

¹⁰Rɔbsɛ hi booto hi tuuk a ya̧a̧ gbuna bɔ gedu. Yɛ̧ɛ̧ mi wɛ! Bɔgi gi anbɔ a nɛ teesdu, bɛr gɛ!

¹¹Mɛm gburklɛl ɗɛɛ an gi gbur mɛm hɛmnti hi mɛm zobtil ya̧a̧gbun du ya? Lab gɛ.

¹²Yɛ̧ɛ̧ mi wɛ, yɔmntnɔɔ dɛɛ̄ an gi hum kɔ̧ɔ̧b gɛ, wɛɛ namleesɛ ɗɛɛ an gi hum yɔmntnɔɔ gɛ. Gi anbɔ be, mɛmgburklɛl ti̧i̧til ɗɛɛ an gi gbur mɛmhɛmnt gɛ.

¹³Bɔ gi hinmɛɛkya dubti hi hinkɛŋkya zul du a nɛ teesdu nɔ? Za̧a̧nɔ zuun hinɔ hi ɛmbilɔ rɔbo hi woosɔ wɔ gi wook hi zultiisigi an hinyɔ hinmɛɛkɔ dubt bɔ kpoos du gisig goko.

¹⁴Yɛrɛ nɛ gin kubl ha̧a̧l hi gabs a nɛ kpoos du, nɛ mɔkig hinyɔ gɔ nɛ daks zul nɛ gii kpɔdi, bɔnɛ pɛɛ zul nɛ, bɔnɛ gɔ̧ɔ̧ya̧a̧ a rɔb muulɛ.

¹⁵Hinmɛɛk bɔrɔ taa hinmɛɛk yɔ gi fu̧u̧zig bɛtha a Bɛt Mɔkil ge; gi hinmɛɛk yɔ gi fu̧u̧zig a waali du, hi a loorɛha̧a̧l ge giya.

¹⁶Ya̧a̧nɛ lɛlyɔ lɔlha̧a̧l gi ge hi ka̧a̧si, lɛl-ha̧tirgo hi woos ha̧a̧l zaadɛ sɔmsɔm hi gi ge be.

¹⁷Yɛrɛ hinmɛɛk yɔ gi fu̧u̧zig a bɛtha gii gaa gi ɗaarlɛlɛ, wɛɛ gin boolumi, saŋtimi, ɗɔɔtil rɔbo, ya̧a̧rmɛɛk gbɔɔlɛ, gi waak hinrɔb wooki, gɔ zɛmr gɛ, taa mɛlya ha̧a̧lɛ.

¹⁸Dood wɔ hi kamzig boolum a dood tees di, dɔ̧ɔ̧t yɔ hi dɔ̧ɔ̧k hi boolumi, gɔ bɛɛ pirko, tɔɔ gaa humlɔ gɛ hinriiti.