Read Doyayo 1 PIYƐR 2 Bible Online

1 PIYƐR 2 - Doyayo bible

1 PIYƐR 2

¹Yɛrɛ, bisin hinyɔ gɔ hi el a bɔbs yɔ gi sɛw, ya̧a̧gɔ̧ɔ̧nɛ, mɛlɛ, ka̧a̧si, hi ya̧a̧ha̧a̧l yɔ gi sɛw.

²Yɔ nɛ gi an waat burko, yɛgi ha̧a̧n wa̧a̧l gaat mɔkilya bɔ an waayɛ̧s yɔ gɔ ha̧a̧g nɔɔtɔ wa̧a̧l be, an nɛ tɔɔn nɛ za̧a̧nɔ.

³Nɛ́ dag Waar Yeesu dɔglɔ hɛmntigɔ dag be, nɛ́ mɛɛ gɔ a Waar bɔ gi Doo rɔbo.

⁴Zaan a Waar Yeesu ge. Gii gi bet za̧a̧til yɔ dood hi bisige. Anyɔ Bɛt herig nɛko, wɛɛsig hin rɔb yɔ daarlɛlɛ.

⁵Nɛɛ hɛw, ɔɔn Bɛt gi loon an bet za̧a̧tili gi wɔmnin lukɔ yɔ Mɔkilɔ gɔ gi waa gedu. Nɛ wɛɛsig maakwookɔya gaatɛ an nɛ gɔsig maak rɔb mɔkilyaadɛ wɔ hi bɛsig a Yeesu Kristu dɔŋgo.

⁶Hinɔ gii hi bi̧i̧ a Bɛt ɗɛɛrwol du: a sɔ̧ɔ̧nɛ, be gbaak bet za a Siyona, bet gbɔɔl tɛŋkya yɔ be herige gi wɛɛ hin rɔb yɔ daarlɛlɛ. Za̧a̧nyɔ ɗɔbsige seem taag wa̧a̧k nɛ zaŋ.

⁷Nɛɛ yɔ nɛ gig ɗɔbsig be, wɛɛsin hin rɔb yɔ daarlɛlɛ. Wɔ hi ɗɔbs gɛ be, hi bi̧i̧ dɔglya̧ a bet yɔ lukwɔŋkya wɔ hi bisige, gii wɛɛ bet gbɔɔl tɛŋkya.

⁸Hi wɛɛ hi bi̧i̧ ɓɛ: a bet dɔɔsiŋkya, hɛɛl doodmatigya. Yɔ hi ta̧a̧ Bɛt dɔgl kɛŋk gɛ gii hi siŋk dɔɔ. Bɛt nagsihi anbɔ.

⁹Yɛrɛ nɛya, nɛ gi dɔ̧ɔ̧t yɔ Bɛt herig giya, nɛ gi. Waar bɔ Bɛt maakwookyaadɛ ɔ̧ɔ̧, nɛ gi dood gaatɛ, nɛ gi Bɛt dood ɔ̧ɔ̧nɛ an nɛ dɔg woosɔ gbɔlɛ wɔ. Gii elzinɛ gi tudzin a lɛlwil du, wɛɛ gbaan a lɛlgaalɔ gɛrsya bɔ gedu.

¹⁰Yɔ da doosɛ, nɛ taa nɛ Bɛt doodɔ, yɛrɛ ɓɔryɔ, nɛ wɛɛ dood ɔ̧ɔ̧n ma. Da doosɛ, Bɛt mɛ̄ɛ̄sirnɛ ya̧a̧r kɛn gɛ, yɛrɛ ɓɔryɔ, mɛɛsin ya̧a̧r mɛɛsɔ.

¹¹Saam mi rɔbɛ wɛ, nɛ gi an rɔ̀bɛ gbɔnɔdaakyaadɛ a waal yɛrɛ gedu. Ya̧a̧nɛ mi zɔ̧nɛ, bɔnɛ ɔs muulɗɔkum wɔ gbɔnɔ an hi gaa kol nɛ nɔko hi ha̧tirge.

¹²Waan rɔbtɔnɔ a dood wɔ hi mɛɛ Bɛt gɛ hi tees du. An hi gin seek an hinha̧a̧lwookyaadɛ, hi gi book ya̧a̧ha̧a̧l nɛ zul ha si̧, ɔɔnɛhi hi gbɛn woos nɛ rɔbɛ wɔ, hi ɗɔbs Bɛt a ɔ̧tyɔ gɔ gi zaa gedu.

¹³Tiitsin dood nabl wɔ sɛw zul nɛ, a Waar Yeesu dɔŋgo. Tiitsin waar gbɔɔl hɛbtzulya Kaysara yɔ gi waar ɛ zaadɛ waar ya̧ zulɛ.

¹⁴Tiitsin waar ɛ dɛɛt wɔ zulɛ. Waar gbɔɔl bɔ herihi gbaahi an hi gaa hinha̧a̧l wookya wɔ ya̧a̧rhanto, hi wɛɛ hi baan hinrɔb wookya wɔ be.

¹⁵Hinyɔ Bɛt ha̧a̧g gɛ: a rɔbnɛwook bɔ gii gi gɔ an dood yoo wɔ hi mɛ̄ɛ̄ hin gɛ hi book ya̧a̧ha̧a̧l nɛ zulha hi waksɔ.

¹⁶Waan an dood wɔ hi dag zulya̧ aakil du. Nɛ yɔ anbɔ, bɔnɛ oo zul nɛ gik bɔ aakil du an gbandili nɛ yaatin hinha̧a̧l nɛ. Lab gɛ! Woonhin an Bɛt woosyaadɛ.

¹⁷Ɗɔbsin dood sɛw. Gi ha̧a̧nɛ yɛ̧ɛ̧dɛ Yeesu fɔkya wɔ sɛw, hoob ha̧a̧nɛg Bɛto, ɗɔbsin waar gbɔɔl hɛbtya bɔ.

¹⁸Woosya wɛ, tiisin zul nɛ a baa nɛ dɔŋdi hi hoob gbɔɔltɔnɔ. Gid hi gi dood rɔbɛ zulhɔnikyaadɛ, zaabe, dood gabsɛ, gborin zul nɛ tiisigi.

¹⁹Za̧a̧nyɔ wōō nɛ hinza ha̧a̧l yɔ rı̄ı̄ an hi gaag ya̧a̧rhant dɔŋgɔ ge gɛ, wɛɛ hi gig gaak kosgumn be, gid mɔm kosgumn bɔ a Bɛt zulɛ bɛɛrɔ.

²⁰Wɛɛ hí gin lɛk a hinha̧a̧l nɛ yɔ nɛ woo gi dɔŋgo nɛ wɛɛ nɛ mɔŋk kosgumn bɔ, bɔ gi bāānin nɔ? Yɛrɛ hi gin gaak ya̧a̧rhant a hinrɔb yɔ nɛ wook gi dɔŋgo, nɛ́ wɛɛ nɛ́ mɔŋk kosgumnɛ, hinɔ gii bɛs Bɛto.

²¹Bɛt elzin an nɛ woo anbɔ. Kristu yɔ̧ ya̧a̧rhant a nɛ dɔŋ be, wɛɛsin gbɔnɔdorkya an nɛ fɔb tɛ̧ɛ̧sɔ nɛ woo an giya.

²²Gii ɔ̧nɛ wōō hinha̧a̧l gɛ, gɔ̧ɔ̧s doo za ya̧a̧ gɛ be.

²³Yɔ hi niige, wɛɛn gɛ; yɔ gi ya̧a̧ryɔ̧ko, gɔ̄ gabs gɛ. Gaa kolɔ a Za̧a̧nyɔ gi yɛ̧ɛ̧k dɔgl hi gbɔnɔ gi naan du.

²⁴Gii hi zulɔ yɛr hinha̧a̧l wɛ, pɛɛnihi muul ɔnɛ a tɛ̧ɛ̧gbeet ha yɔ̧ ya̧a̧rhant a wɛ kalɛ an wɛ wɛɛ wɔrkɛ a hinha̧a̧l gbaŋgi, wɛ wɛɛ wɛ za̧a̧ a waabil riit gbaŋgi. Nɔk diilɔ wɔ dagɔ hi za̧a̧sin muul nɛ.

²⁵Da amntɔnɔ, nɛ gi nɛ ɛmbik di tɔs an tamɔ. Yɛrɛ ɓɔryɔ nɛ wɛɛz ma a Nɛɛra nɛ kol nɛ Ookya bɔ gi dɔŋdi.