Read Doyayo 2 PIYƐR 1 Bible Online

2 PIYƐR 1 - Doyayo bible

2 PIYƐR 1

¹Mii Simɔŋ Piyɛr , Yeesu Kristu woosɔya hi tɔmsɔya. Mi bi̧i̧sig dood wɔ hi dag ɗɔbsig yɔ gi hinɗɔbt an winɛ bɔ a Yeesu Kristu yɔ gi Bɛt wɛ hi Za̧a̧sigya wɛ woos riitɔ bɔ gedu.

²An gɛmsili hi boolumi hi waak tɔɔk a nɛ kpoos du anyɔ nɛ tɔɔk a mɛɛk yɔ nɛ mɛɛ Bɛt gedu hi Waar wɛ Yeesu be.

³Anyɔ wɛ mɛɛ Bɛt yɔ elɛ an wɛ gɛ̧ɛ̧ gbɔlumsɔ hi rɔbgɔkɔ wɔ hi gi ɔ̧nɛ, gii woohin wɛ kpoos du hi tɛŋkɔ gbɔɔlɛ gi gaawɛ hinyɔ ha̧a̧wɛ sɛw an wɛ za̧a̧ wɛ wɛɛ wɛ fɔg hi gbɔnɔ.

⁴Bɛt gbɔlumsɔ bɔ hi woos rɔbɔ bɔ hii gaawɛ hin gbɔɔl yɔ tɔɔ gi daarlɛlɛ hi hinɗɔbt yɔ Bɛt raa a gi gaawɛ, an nɛ ɔks anbɔ a ɗɔɔtilɔ bɔ gedu, an nɛ nɔɔ lɛlha̧tirgo yɔ gi a waal du a ɗɔkum ha̧a̧l dɔŋgo.

⁵I̧i̧n tɛŋk nɛ sɛw an nɛ wɛɛ nɛ gòks woos rɔb nɛ a ɗɔbsig bɔ geha; a woos rɔbɛ wɔ geha, gòòn hinmɛɛki;

⁶a hinmɛɛk bɔ geha gòòn zulhɔniki, a zulhɔnik bɔ geha, gòòn hinmɔŋk rɔbo; a hinmɔŋk rɔb bɔ geha, gòòn Bɛt fɔk hi gbɔnɔ.

⁷A Bɛt fɔk hi gbɔnɔ geha, gòòn yɛ̧ɛ̧dums hato; a yɛ̧ɛ̧dums hat bɔ geha, gòòn hat a dood muul sɛw.

⁸Yɔ anbɔ gid hin wɔrɔ hi gi a nɛɛge, hi wɛɛ hi tɔɔk nɛ kpoos du, yɔ ansin hɛ̧ɛ̧rwɛɛki, yɔ a̧a̧n an bɔ̄ ɛmbil nɛ gi kɔm tɔs an tɛ̧ɛ̧yɔ kirkɔ, yɔ tɔɔsin nɛ re doosɛ hi Waar wɛ Yeesu Kristu mɛɛkɔ,

⁹yɛrɛ za̧a̧nyɔ taan hin wɔrɔ gi kpoos du gɛ, kɔm an yɔ̧ɔ̧ryɔ, gbɛ̄n hɛmltɔnɔ gɛ, wɛɛ zɛn hinha̧a̧lɔ amntɛ wɔ da gaas nɛ dɔglya̧.

¹⁰Yɔ anbɔ, yɛ̧ɛ̧dɛ mi wɛ, i̧i̧n tɛŋk nɛ du gi daarɔ an waakyɔ nɛ waako gi zuun gaattɔnɔ a Bɛt elinɛ wɛɛ herinɛ; ya̧a̧nɛ, gɔ nɛ gɔk anbɔ nɛ taa dɔɔ za siŋk ma.

¹¹Hi rɔbo, hi wookɔ anbɔ ro Bɛt gi gaan gbɔnɔ talk rɔbtɔnɔ a Waar wɛ hi Za̧a̧sigya wɛ Yeesu Kristu wáátɔ yɔ gi faa gedu.

¹²Ya̧a̧nɛ mi wɛɛ mi look woosɔ an mi waasin hin wɔrɔ dɔglya̧ dɔk an nɛ mɛksɔ; anyɔ nɛ mɛks nɛ dɔglɔ gii hɛw, hi anyɔ nɛ mɛɛ nɛ rɔb yɔ nɛ i̧i̧yyik hi tɛŋk nɛ a gedu gii hɛw.

¹³Yɛrɛ yɔ anyɔ mi waak a muul dokil yɛrɛ gedu da amntɔnɔ gi an mi kpòònɛ mi raasin hin nɛ mɛksɔ anyɔ kol mi gi kete.

¹⁴Ya̧a̧nɛ mi mɛɛ a kuudu kaasi mi hod muul dokil yɛrɛ nɔɔktɔnɔ mi ɔɔ-ɔ an hinyɔ Waar wɛ Yeesu Kristu raasim an mi mɛɛ.

¹⁵Yɛrɛ mí kɛɛ woosɔ an gɔ nɛ mɔkɔ nɛ waak hin wɔrɔ mɛɛki kuudu gɔ mi wɔrɔ.

¹⁶Yɔ wi raasin Waar wɛ Yeesu Kristu tɛŋkɔ hi zaakɔ, wí rāan hi bid wɔ dood hi midil hi kɛ̧ɛ̧tig gii gɛ, yɛrɛ wi gbɛn waar umsɔ gbɔlums hi lɔl winɛ.

¹⁷Yeesu Kristu dag ɗɔbsigi hi gbɔlumsɛ a Baaba Bɛt ge yɔ ya̧a̧ za booyz hi ɗɔbsigzanɔ gbɔɔl a bɛtha a gi zulha: a yɛrɛ gi waa be yɔ ha̧a̧b ge hi kpoos be sɛw giya.

¹⁸Wii hi zul wi yɔ wi gi nɛ hi gii a ga̧a̧t gaat bɔ geha ro wi lag ya̧a̧ bɔrɔ gi booyz a bɛtha.

¹⁹Hin bɔ lab gii wa̧a̧ kpoos wi a Bɛtya̧a̧kɛŋkya wɔ dɔglya̧ gi rɔbo; nɛ wook rɔbtɔnɔ nɛd gig ook rɔbtɔnɔ; gi an pitila yɔ gi gaak a lɛlwil du gi gaa gi tuur a lɛlgaakilya̧, gi tuur a ɔ̧tyɔ lɛlgaal gɔ gi tɔɔ nɛ kpoos du gedu an sɛwal bi̧i̧lum yɔ yɛɛl gaaki.

²⁰Yɛɛlin nɛ mɛɛ hinyɛrɛ: a Bɛt ya̧a̧ɔ yɔ hi bi̧i̧ a ɗɛɛrwol du doo za ɗɛ̄ɛ̄ an gi wad hi hinmɛɛkɔ gɛ.

²¹Ya̧a̧nɛ hinyɔ Bɛt boo gi ya̧a̧ du fu̧u̧z nɛ hinɔ a hinyɔ doo ha̧a̧g gedu gɛ zaŋ. Bɛt Mɔkil ɔ̧ɔ̧n gɔ kamz hinyɔ Bɛt gɔ raa, za̧a̧n bɔ gi yɛr gi boosig hinɔ.