Read Doyayo 2 PIYƐR 2 Bible Online

2 PIYƐR 2 - Doyayo bible

2 PIYƐR 2

¹Hɔnɛyɔ gi anbɔ, Bɛtya̧a̧kɛŋkya ya̧a̧gɔ̧ɔ̧nyaadɛ hi tuu a dood tees du hɛw. Hingokya ya̧a̧gɔ̧ɔ̧nyaadɛ hí tuu a nɛ teesdu anbɔ be hí tal hi kɛ̧ɛ̧tig hí gbaa gɛ̧ksili, hí gokthin hi ya̧a̧gɔ̧ɔ̧nɛ an hi waksil doodɛ; hí wɛɛ hí faa Ɗɛnt wɛ Gbɔɔl bɔ Yeesu , Za̧a̧nyɔ za̧a̧sihi a hi hinha̧a̧l du hɛw. Yɔ anbɔ hi zul ya̧a̧n waksig ma nɔɔktɔnɔ bɔ.

²Dood kittɔnɔ hí fɔb gbɔnɔya̧ zɛlkya waksilya bɔ, wɛɛ dood hi boo ya̧a̧ha̧a̧l a rɔb gbɔnɔ bɔ muulɔ a hi dɔŋgo.

³Hi gɔ ɗɔkum an hi lehin wɔ nɛ ginɔ hi mɛl hɛmnti. Ya̧nɛ da amntɔnɔ dɔglya̧-gbaakya bɔ da giz dibed an gi gbaasihi dɔglɛ, wɛɛ za̧a̧nyɔ gɔ gi ha̧tirihi taa yoko.

⁴Ya̧a̧nɛ Bɛt gi ɔ̄ɔ̄ nɛ walɛsɛrɛ ɔ̧ɔ̧ wɔ hi gɔ nɛ hinha̧a̧l gɛ, yɛrɛ yaahi a laazɛŋk du hi a zɛŋk lɛlwil dubtɛ du gihi oonik dɔgl-gbaak bɔ giya;

⁵ɔ̄ɔ̄ hin amntɛ wɔ kim gɛ. Za̧a̧s Nɔwe, za̧a̧nyɔ gi dɔksig dood rɔbgɔk dɔglɛ hi doodɔ wɔ nɔɔn-erɛ. Tuus mɛm hi̧i̧s waal yɔ dood ha̧a̧l hi waak gedu.

⁶Wɛɛ ɓɛ, Bɛt ɔ̄ɔ̄ waal gbɔlɛ wɔ Sodɔma hi Gɔmɔra gɛ, yaaz laa dɔ̧ɔ̧sihi wɛɛnihi an tam yɔ sɛn du hi ips gaati an gi zuns dood wɔ gɔ hi ta̧a̧ Bɛt ɗɔbsig gɛ hinyɔ gɔ gi tursihi ɔ̧tza;

⁷wɛɛ za̧a̧s rɔbwookya bɔ Ludu yɔ gig fɔko yɔ kpoosɔ nɔɔsig ha̧a̧ltɔnɔ hi dood ha̧a̧l wɔ ɛmbilya̧ a zɛlkya̧ bɔ gi dɔŋgo.

⁸Yɔ doo hinriitwookya bɔrɔ da ginɛ waak hi teesdu, kpoosɔ riit bɔ vimr ha̧a̧ltɔnɔ ɔ̧t nuŋg sɛw a hinyɔ gi gbɛŋko gi kɛŋk a Bɛtmaakɗa̧a̧kya̧ bɔ gi dɔŋgo.

⁹Nɛ hin bɔ lab zunsɛ a Waar Bɛt mɛɛ za̧a̧sig yɔ gɔ gi za̧a̧s za̧a̧nyɔ gig fɔk hi gbɔnɔ a gi maatil du, wɛɛ mɛɛ ya̧a̧r yɔ gɔ gi ha̧a̧n dood ha̧a̧lwookya wɔ ya̧a̧rɛ gi gihi oonik a dɔgl-gbaak ɔ̧ti.

¹⁰Dood wɔ gɔ gi ha̧a̧nihi ya̧a̧r gi daarɔ, gɛ dood wɔ hi yaak zulya̧ a muulɗɔkum du ha̧a̧ltɔnɔ an hi gɔ hatil ha̧a̧lɛ hi wɛɛ hi ɗa̧a̧k tɛŋk gbɔlumsya wɔ a bɛtha an bɔhi tiis zulya̧ a hi dɔŋdi. Hi gi kpoos ɓaatilyaadɛ, zulpɛɛkyaadɛ, hoobhā̧ā̧hi Bɛt walɛsɛrɛ wɔ a bɛtha niik gɛ.

¹¹Wɛɛ Bɛt walɛsɛrɛ zaadɛ gbɔlɛ wɔ hi daarin wɔrɔ tɛŋko, hi taasihi niit dɔgl kaŋk a Waar Bɛt muutdu.

¹²Doodya̧ hi gi an nambhɛtim wɔ hi mɛɛhin gɛ, hi mɔɔhi an hinza̧a̧til wɔ hi taan mɔkili, wɔ dood gɔ hi wa̧a̧lihi hi gbɔ̧hi an nambo. Hi niik niit a hinwɔ hi mɛɛ dɔglya̧ gɛ hi zulha, yɔ anbɔ Bɛt gi waksihi an namb wɔ hi wak be,

¹³hi dag ha̧a̧lya̧ bɔ dɔɔrɔɔsɔ ɔ̧nɛ. Hi dak hɛmntigya̧, hi gɔk zɛlk a lurk du hɛw; hi gi dood libtɛ hi ɓi̧i̧limyaadɛ. Gɔ hi lekhin hi nɛya hi dak hat a kɛ̧ɛ̧tigya̧ bɔ gedu.

¹⁴Hi seenik nɛ̄ɛyɔ gi sɛw hi manslɔlɛ, hi hı̧̄ı̧̄ ha̧a̧l hinɔ gɛ. Hi maatig dood wɔ kpoosya̧ er bɛttɔnɔ gɛ hi dɔglya̧ fɔko, ɗɔkumya̧ gi rek a tus muulɛ, kpoosya̧ rɔ̧ɔ̧s anbɔ yɛɛl a̧a̧mɔ, hi gi Bɛt bootɔ waato.

¹⁵Hi wag hi ɔɔ gbɔnɔ yɔ erɔ, hi fɔk Boosɔr waawal Baalam gbɔnɔ ɔnɛ bɔ giya, walɔ ha̧a̧g woos ha̧a̧l rɔɔs daki.

¹⁶Anyɔ gin tɔnzuksɛ Bɛt dɔ̧ɔ̧lig hi pɛɛzum su̧u̧k ya̧a̧boon yɔ boonig an doo gi booko, kpɛ̧ɛ̧ Bɛtya̧a̧kɛŋkya bɔ Baalam yooɔya̧a̧ bɔ gɔ.

¹⁷Dood wɔrɔ lab hi gi an mɛmkɔk yɔ ɔ̧ɔ̧sɔ, hi gi an kuus yɔ kùur gig niŋk a bɛtha. Bɛt gɔsihi lɛlwil dubt bibir gihi ooko.

¹⁸Hi boosig dɔgl pɛɛkilya tɔs: hi maatingo dood hi zɛlk dɔglɛ hi muulɗɔkum dɔglɛ, dood wɔrɔ hi tuuz am gɛ a dood wɔ hi wag Bɛt gbɔnɔ hi teesdu hi dag za̧a̧tigi.

¹⁹Hi wɛɛ hi gihi raak be, a hi dag zulya̧ aakil du, wɛɛ hii be hi zulya̧, hi gi lɛlha̧tirgo gbaaryɔ. Ya̧a̧nɛ, za̧a̧nyɔ gi sɛw gi hinyɔ ɗɛɛg gbaar ɔ̧ɔ̧nɛ.

²⁰Dood wɔrɔ hi da hi yɛɛl hi nɔɔ ɓi̧i̧lum yɔ waal du Waar wɛ Za̧a̧sigya Yeesu Kristu yɔ hi mɛɛg nɛ gi dɔŋgo, yɛrɛ hi wɛɛ hi gul a ɓi̧i̧lumɔ gedu ɓɛ, wɛɛ ɗɛɛhi, yɔ anbɔ, waabilya̧ bɔ̀bt daar doos bɔ ɗaarɔ.

²¹Ya̧a̧nɛ, ya̧nɛ ginɛ an bɔhi dag hinriit gbɔnɔ mɛɛk nɛ gii zaŋ, hi anyɔ hi mɛɛ gbɔnɔɔ lɛlɛ hi zɛmrɔ hi ɔɔ dɔglɔ gaat yɔ hi raa hi fɔkɔ.

²²Hinyɔ ya̧a̧daanik za rɔb gi dɔk tursihi: a kaa wɛɛ gi lek wɛmtɔ, zaabe, a hab hotilyɔ.