Read Doyayo 1 YOHANA 3 Bible Online

1 YOHANA 3 - Doyayo bible

1 YOHANA 3

¹Sɔ̧ɔ̧n ha̧a̧tig gbɔɔl yɔ Baa wɛ Bɛt ha̧a̧g hi wɛya, giwɛ elik a wɛ gi waat ɔ̧ɔ̧nɛ; hi rɔbo, wɛ gi Bɛt waato. Ya̧a̧ gi dood waal du hi mɛ̄ɛ̄wɛ gɛ. Hi mɛ̄ɛ̄ Yeesu gɛ, gi nɛ an hi mɛɛwɛ ri nɔ?

²Saam mi rɔbɛ wɛ, ɓɔri wɛ gi Bɛt waat ma. Yɛrɛ hinyɔ gɔ wɛ wɛɛ hinɔ midir kɛn gɛ. Yɛrɛ wɛ mɛɛmɛ a Kristu, Masihu bɔ gɔ gi midza, wɛ gbɛnige anyɔ giro, anbɔ, wɛ́ riitin hi giya.

³Za̧a̧nyɔ gi ook hinyɔ Kristu gɔ gi woosig anbɔ, gi wɛɛnik kpoosɔ gaati an Kristu yɔ gi Doo gaat be.

⁴Za̧a̧nyɔ gi wook hinha̧a̧lɛ gi ɗa̧a̧k Bɛt maakdɔglɔ gig wɛɛnik tɔsyɔ. Hinha̧a̧l bɔ wookɔ gi Bɛt maakɗa̧a̧kyɔ.

⁵Yɛrɛ nɛ mɛɛ a Kristu midz an gi ha̧s hinha̧a̧lɛ; gii ɔnɛ hinha̧a̧l taa a ge.

⁶Za̧a̧nyɔ gi waak ɔks hi giya, taa hinha̧a̧l wooko. Za̧a̧nyɔ gi wook hinha̧a̧l be gbɛndir Yeesu kɛn gɛ, wɛɛ mɛ̄ɛg gɛ hɛw.

⁷Waat mi hatil wɛ, bɔnɛ ɔɔ doo za gi maatinɛ. Za̧a̧nyɔ gi wook hinyɔ rii gi doo riityɔ anyɔ Kristu gi doo riit be.

⁸Za̧a̧nyɔ gi wook hinha̧a̧lɛ gi loorɛha̧a̧l doo ɔ̧ɔ̧nɛ. Loorɛ-ha̧a̧l gi gbosig hinha̧a̧l wooki, yɛɛl a waalyɛɛliki tuur ɓɔryɔ. Yɔ gi nɛ an Bɛt waa bɔ gi ha̧tir loorɛha̧a̧l woosɔ wɔ gii gi midza wɛ tees du.

⁹Za̧a̧nyɔ mɔɔy a Bɛt ge gi Bɛt waayɔ, taa hinha̧a̧l wooko, ya̧a̧nɛ Bɛt dɔ̧ɔ̧tɔ za̧a̧tig seg bɔ Bɛt gaage, gi waak a gi kpoos du. Anyɔ mɔɔy a Bɛt ge, ɗɛ̄ɛ̄ an gi waa hinha̧a̧l wook ma gɛ.

¹⁰Hinyɔ gi gɛ̧ɛ̧k Bɛt waatɔ hi loorɛha̧a̧l waatɔ gɛrɛ: Za̧a̧nyɔ taa hin riit wooko, zaabe gɔ gi hā̧ā̧ge a naaza Yeesu fɔkya muul gɛ, taa Bɛt waaɔ.

¹¹Dɔgl yɔ nɛ kɛm gi yɛɛl a biitirnaandu gɛrɛ a yɛnɛ gi ha̧a̧tin wɛ.

¹²Bɔwɛ riitin an za̧a̧n bɔ nuŋgɔ a Kaynu, yɔ gi Saydanu za̧a̧n bɔbtin bɔ doo ɔnɛ gi lɛbr yɛ̧ɛ̧tɔ yɔ hi mɔɔtinihi buu gbun du. Gbɔŋg a nɔ dɔŋg nɔ? Gbɔŋg a hinriit yɔ gi wook gi dɔŋgo, anyɔ hinwɔ gii gi wook ha̧a̧lɔ.

¹³Nɛya, yɛ̧ɛ̧dɛ be, waal gi gin lɔlhɛ̧ɛ̧nuko, bɔ hinɔ gi kɔmsin gɛrsɛ.

¹⁴Wɛnɛ wɛ mɛɛ a wɛ tuuz wɔrk du, wɛ wɛɛ wɛ gul a za̧a̧tig waal du da̧a̧da̧, wɛ mɛɛ anyɔ ha̧a̧wɛ a yɛ̧ɛ̧dɛ wɛ Yeesu fɔkya wɔ hi muulɛ, ya̧a̧nɛ. Za̧a̧nyɔ hā̧a̧g Yeesu fɔkya zaadɛ gɛ, gis a wɔrk du tɛ̧.

¹⁵Za̧a̧nyɔ gi hɛ̧ɛ̧nik naaza lɔlɛ gi zul gbɔŋkyayɔ. Nɛɛ mɛɛ a zulgbɔŋkya taan za̧a̧tig faa; za̧a̧tig bɔ ɗɛ̄ɛ̄ an gi waa gi kpoos du gɛ.

¹⁶Hinyɔ wɛ mɛɛn Bɛt ha̧a̧kɔ ha̧a̧g gɛrɛ: anyɔ Kristu ta̧a̧ an gi wɔr a wɛ dɔŋgo, gi an wɛ ta̧a̧ an wɛ wɔr a nawɛza zaadɛ wɔ hi gi a Bɛt gbɔnɔ du hi dɔŋg be.

¹⁷Yɛrɛ doo za gi gin rɔɔsɛ, wɛɛ gi gbɛn naaza gi ha̧a̧k ya̧a̧rɛ, gi tā̧ā̧ an gi mɛɛsigya̧a̧r gɛ, yɔ raa ri a ha̧a̧be Bɛt nɔ?

¹⁸Waat mi hatil wɛ, bɔgi ha̧a̧wɛ a nawɛza zaadɛ hi ya̧a̧kosɛ, ɗɛwɛ zuun hat wɛ hi woosɛ hi rɔbo.

¹⁹Gid ha̧a̧-tinwɛ, wɛ mɛɛ gɔ a wɛ gi Bɛt rɔb bɔ waat ɔ̧ɔ̧nɛ, kpoos wɛ gi saŋ gɔ ma a Bɛt muutdu.

²⁰Kpoos wɛ gi mɔksɛ a wɛ woo hinha̧a̧lɛ, Bɛt tɔɔ daar kpoos wɛ daarɔ, wɛɛ mɛɛ hin sɛw.

²¹Sa̧a̧m mi rɔbɛ wɛ, kpoos wɛ gi mɔ̄ksɛ a wɛ woo hinha̧a̧l gɛ, wɛ gin kpoos saŋtum a Bɛt muutdu.

²²Yɔ anbɔ, anyɔ wɛ gi dɔglɔ wɔ raa wa̧a̧ko, wɛ wɛɛ wɛ wook hinyɔ harig be, wɛ dak hinyɔ wɛ gig ɛrk sɛw a gi naan du.

²³Dɔglɔ yɔ raawɛ: gɛ a wɛ ɗɔbs waaɔ Yeesu Kristu nuŋgɔ, gi wɛɛ gi ha̧a̧tinwɛ anyɔ Bɛt raawɛ be.

²⁴Dood wɔ hi wa̧a̧k dɔglɔ wɔ, hi waak ɔksig gbun hi Bɛto, Bɛt gi waak ɔksig gbun hi hii be. Hinyɔ wɛ mɛɛn a Bɛt gi waak ɔksig gbun hi wɛɛ gɛ Mɔkil yɔ gaazɛ gisɛ raako.