Read Doyayo 1 YOHANA 4 Bible Online

1 YOHANA 4 - Doyayo bible

1 YOHANA 4

¹Sa̧a̧m mi rɔbɛ wɛ, bɔnɛ ɗɔbs mɔkil wɔ sɛw. Goonɛhi kɛnɛ an nɛ mɛɛhi hi rɔbo a kinsa hi fu̧u̧z a Bɛt ge. Ya̧a̧nɛ Bɛt ya̧a̧kɛŋkya ya̧a̧gɔ̧ɔ̧nyaadɛ kittɔnɔ hi ɛmbik a waali du.

²Hinyɔ gɔ nɛ mɛɛn Bɛt Mɔkilɔ gɛrɛ: za̧a̧nyɔ raahi n gaattɔnɔ a dood muutdu a be ta̧a̧ a Yeesu Kristu wɛɛ dooyɔ, gi zaa a waal du, gii gin Bɛt Mɔkilɔ.

³Wɛɛ za̧a̧nyɔ raahi n anbɔ a Yeesu zulha gɛ taan Bɛt Mɔkilɔ. Mɔkil bɔrɔ lab gi za̧a̧nyɔ gi hɛ̧ɛ̧nik Kristu lɔl ɔ̧ɔ̧nɛ. Nɛ kɛm nɛ a gi zaako, yɛrɛ zaaza a waal du ma.

⁴Waat mi hatil wɛ, nɛnɛ nɛ fu̧u̧ a Bɛt ge, nɛ ɗɛɛ Bɛtya̧a̧kɛŋkya ya̧a̧gɔ̧ɔ̧nyaadɛ ɗɛɛ, ya̧a̧nɛ, za̧a̧nyɔ gi a nɛ kpoos du gin tɛŋk daar Saydanu yɔ gi a waal du daarɔ.

⁵Bɛtya̧a̧kɛŋkya ya̧a̧gɔ̧ɔ̧nya wɔrɔ labɔ hi fu̧u̧z a waal du. Yɔ anbɔ hi book waal dɔglɛ, wɛɛ waal gisihi kɛŋk be.

⁶Wɛnɛ wɛ gi Bɛt waato, wɛ fu̧u̧z a Bɛt ge. Za̧a̧nyɔ mɛɛ Bɛto gisɛ kɛŋko; wɛɛ za̧a̧nyɔ taa Bɛt waaɔ gɛ, fū̧ū̧ a Bɛt ge gɛ, taasɛ kɛŋko. Hinɔ anbɔ ro wɛ mɛɛn mɔkil rɔbo hi mɔkil a̧a̧bi.

⁷Saam mi rɔbɛ, yɛnɛ gi ha̧a̧tinwɛ. Yɔ anbɔ, ha̧a̧tig fu̧u̧z a Bɛt ge, wɛɛ za̧a̧nyɔ gin hat gi kpoos du gi Bɛt waayɔ, hi mɔɔg a Bɛt ge, wɛɛ mɛɛ Bɛt hɛw.

⁸Za̧a̧nyɔ ha̧a̧g Bɛto hi dooɗ gɛ ɔnɛ mɛ̄ɛ̄ Bɛt gɛ; anyɔ Bɛt gi hato.

⁹Hinyɔ Bɛt zunsin wɛ gaattɔnɔ a ha̧a̧be wɛya: gɛ a yaaz waaɔ gbunsim a waal du an wɛ za̧a̧ gi dɔŋgo.

¹⁰Hinyɔ wɛ mɛɛn a Bɛt ha̧a̧g wɛɛ gɛrɛ: taa an ha̧a̧ wɛɛ Bɛto, yɛrɛ ha̧a̧ gii a wɛɛge gi yaaz waaɔ an gi wɛɛ hinha̧a̧l wɛ naandɛmsɛ.

¹¹Saam mi rɔbɛ, Bɛt gi ha̧a̧g wɛɛ labɔ, wɛɛ hɛw yɛgi ha̧a̧tinwɛ.

¹²Doo za gbɛ̄ndir Bɛt gɛ, yɛrɛ gi giwɛ ha̧a̧tingo, Bɛt gi waak ɔksig gbun hi wɛya, wɛɛ waabil wɛ zuun a Bɛt ha̧a̧tig tɔɔ da̧a̧da̧ wɛ kpoos du.

¹³Anyɔ Bɛt gɛ̧ɛ̧sɛ Mɔkil ɔnɛ, wɛ mɛɛn gɔ a wɛ waak ɔksig gbun hi giya, gii be gi waak ɔksig gbun hi wɛya.

¹⁴Winɛ wi gbɛɛnɔ a Baa wɛ Bɛt yaaz waaɔ an za̧a̧sigya a waal du, wi wɛɛ wi gi dɔglɔ gii raako.

¹⁵Za̧a̧nyɔ raahi n gaattɔnɔ a dood muutdu a be ta̧a̧ a Yeesu gi Bɛt waayɔ, yɔ anbɔ Bɛt gi waak ɔksig gbun hi giya, gii be gi waak ɔksig gbun hi Bɛto.

¹⁶Wɛnɛ wɛ mɛɛmɛ, wɛ ɗɔbs a Bɛt ha̧a̧g hi wɛya, Bɛt gii gi hato. Za̧a̧nɔ gi ha̧a̧g Bɛt hi doodɛ, gi waak ɔksig gbun hi Bɛto, Bɛt be gi waak ɔksig gbun hi giya.

¹⁷Hinyɔ gi zuunik a Bɛt ha̧a̧tigɔ tɔɔ da̧a̧da̧ a wɛ kpoos du gɛ: a anyɔ ɛmbil wɛ gi a waali du an Yeesu ɔnɛ be, wɛ mɛɛ a wɛ gin kpoos saŋtum a ɔ̧tyɔ Bɛt gɔ gi gbaas dood dɔgl gedu.

¹⁸Hat ɔks hi hoob gɛ. Bɛt ha̧a̧tigɔ yɔ tɔɔ gi da̧a̧ a wɛ kpoos du nin hoob ninɔ, an yɔ hoob fu̧u̧ a ya̧a̧rhantyɔ Bɛt gɔ gi gaa dood gedu. Za̧a̧nyɔ hoobha̧a̧ge, Bɛt ha̧a̧tigɔ tɔ̄ɔ̄ dā̧ā̧ gi kpoos du gɛ.

¹⁹Bɛt ha̧a̧ge a wɛɛge doos ro, ya̧a̧nɛ gi ha̧a̧wɛ a ge hi doodɛ.

²⁰Za̧a̧n za gi dɔg a ha̧a̧b Bɛto, gi wɛɛ gigi naazaza lɔlhɛ̧ɛ̧nuko, gi ya̧a̧gɔ̧ɔ̧nyayɔ. Za̧a̧nyɔ hā̧a̧g naaza yɔ gi gbɛnik gɛ rɛ, ɗɛɛ an gi ha̧a̧ge Bɛt yɔ gbɛnig gɛ ri ma nɔ?

²¹Dɔgl yɔ Yeesu raawɛ: gɛ a za̧a̧nɔ gi ha̧a̧g Bɛto gi ha̧a̧g naaza hɛw.