Read Doyayo 3 YOHANA 1 Bible Online

3 YOHANA 1 - Doyayo bible

3 YOHANA 1

¹Mii ɗɛnt bɔ mi bi̧i̧ ɗɛɛrwol yɛrɛ a Gayus, saam mi rɔb yɔ ha̧a̧m a ge hi rɔbo.

²Saam mi rɔbo, mi dɔgrik an hin sɛw gi resum bɛttɔnɔ, an muul mɔ gi wɛɛ gigi rɔbtɔnɔ anyɔ mɔkil mɔ gi kɔmbik rɔbtɔnɔ.

³Yɔ yɛ̧ɛ̧dɛ Yeesufɔkya wɔ zaadɛya̧ hi tuurɔ, hi dɔg hin rɔb yɔ dɔglɔ gi mɔɔge anyɔ ɛmbil mɔ gi rek a rɔb-gbɔnɔ du be, mi dag hat gbɔɔltɔnɔ.

⁴Hatmiza yɔ daarin yɛrɛ lɛlɛ, taaro: gɛ anyɔ mi lag a waat mi hi ɛmbik a rɔb-gbɔnɔ du.

⁵Saam mi rɔbo, gɔ mɔ woosig yɛ̧ɛ̧dɛ Yeesufɔkya wɔ hinza, mɔ wookwoos rɔbo, wɛɛ hin mɔ rɔb wook a rɔ̀bɛ gbaŋgi bɛr daarlɛlɛ.

⁶Rɔ̀bɛya̧ hi boo ha̧a̧tig mɔ dɔglɛ a Yeesufɔkya ɔksil du. Mi zɔ̧mɔ ɗaasimɔhi an hi rek laksya̧ anyɔ riis Bɛt woosɔyaadɛ.

⁷Yɔ anbɔ, hi rek laksya̧ a Yeesu Kristu nuŋg dɔŋgo, hí wɛɛ hí tā̧ā̧ an dood wɔ hi mɛɛ Bɛt gɛ hi ɗààsihi gɛ.

⁸Gi an wɛ ɗaas dood wɔrɔ labɔ an wɛ wootin rɔb woosɛ hi hii lɛlgbunu.

⁹Mi bi̧i̧s Yeesufɔkya wɔ ɗɛɛrwoli, wɛɛ Diyoterfes yɔ ha̧a̧ge an gi wɛɛ zul a hi teesdu, zew gɛ.

¹⁰Gɔ gi anbɔ, gɔ mí zaa, mi wɛɛ mi raasihi woos yɔ gi wooko, hi ya̧a̧ha̧a̧l yɔ gɔ gi book wi zulha. Hı̧̄ı̧̄ ha̧a̧l wɔ gi wook gɛ, ya̧a̧nɛ gii hi zulɔ gi zēb yɛ̧ɛ̧dɛ wɔ gɛ, wɛɛ gi ya̧a̧nik wɔ ha̧a̧hi an hi zehi, gihi tuusugo a Yeesufɔkya ɔksil du.

¹¹Saam mi rɔbo, bɔmɔ fɔb ha̧a̧lɛ, fɔm hinyɔ gi rɔbo. Za̧a̧nyɔ gi wook hinrɔbo gi Bɛt doo ɔ̧ɔ̧nɛ. Za̧a̧nyɔ gi wook ha̧a̧lɛ gbɛn Bɛt gɛ.

¹²Dood sɛw hi rɔb bɔ zulɔ hi zuun a Demɛtɛryus gi rɔbwookyayɔ, wii hɛw, wi book dɔglɔ anbɔ, mɔ wɛɛ mɔ mɛɛ be a dɔgl wi yɔ wi book a gi zulha gi rɔbo.

¹³Mi dag hin kittɔnɔ an mi bi̧i̧sumɔ, yɛrɛ hā̧ā̧m an mi bi̧i̧sin hin a ɗɛɛrwol du hi hinbi̧i̧nik mɛkya bɔ gɛ.

¹⁴Mi dɔgrik an mi seemɔ kuudu kaasi, wɛ bootin ya̧a̧ hi ya̧a̧.

¹⁵An boolum gigi hi mɔya! Saam zaadɛ wɔ hi boom du. Boom saam wɔ nuŋgo hi nuŋgo. Anbɔ!