Read Doyayo HINWƆ HI MITS YOHANA 11 Bible Online

HINWƆ HI MITS YOHANA 11 - Doyayo bible

HINWƆ HI MITS YOHANA 11

¹Doo za gaam bɔ̧ɔ̧kkok hingoonikya riitin an sɔɔlɛ, raami: a ɗundumɔ mɔ rek mɔ goo Bɛtluk bɔ, hi Bɛtmaaksɛŋk bɔ mɔ ɓɛr dood wɔ hi gi ɗɔbsig duhɔ.

²Bɔmɔ goo Bɛtluk bɔ tutinɔ wɔ hi gaa dood wɔ hi taa Yahuduya gɛ naan du. Dood wɔrɔ hí ɗa̧a̧ waal gbɔɔl gaat bɔ dɔɔ du sɛɛ dumbili nasɔ daa eerɛ.

³Be yaa segya be wɔ hi heg saa muulɛ an ya̧a̧kɛŋkyaadɛ benɛ, hi rek hi dɔg dɔgl be ɔ̧t duk gbunu hi yɔ̧ɔ̧lɔ kooblɛ daatɔ dumbili nɔɔngbunu (1260).

⁴Hii gi kɔ̧ɔ̧b tɛ̧ɛ̧ eerɛ wɔ hi laa-gbaaklɛl eerɛ wɔ hi erk a hɛbt bɔ Waar ɔ muutdu.

⁵Doo za gi mɔk an gi gɔsihi ha̧a̧lɛ, laa gi tuuk hi ya̧a̧ du an gi dɔ̧ɔ̧ lɔlhɛ̧ɛ̧nikyaya̧ wɔ. Za̧a̧nyɔ ha̧a̧g an gi gɔsihi ha̧a̧lɛ, gi an gi gbɔ̧y anbɔ.

⁶Hi gin tɛŋk an hi kpɛ̧ɛ̧ bɛtha an bɔ bɛl gi naŋg a ɔ̧t wɔ gɔ hi dɔksig dood wɔ Bɛt dɔgl gedu. Hi gin tɛŋk an hi zɛmr mɛm gi wɛɛ ga̧a̧mɛ. Hi wɛɛ hi gin tɛŋk an hi yaa ya̧a̧rhant yɔ gi sɛw a waal du a ɔ̧tyɔ ha̧a̧hi gedu sɛw.

⁷Gɔ hi da̧a̧s dɔglya̧ bɔ bookɔ, nambhɛtum ha̧a̧l bɔ gɔ gi kaz a zɛŋk dubt ha̧a̧l bɔ gedu gi gɔtin nɔk hi segya eerɛ wɔrɔ gi ɗɛɛhi gi wɛɛ gi gbɔ̧hi.

⁸Hi ɔɔ wɔrkya̧ hi kɔm a gbɔnɔnɔɔ du a waal gbɔɔl mɔɔt bɔ hi doo nɛ Waar ya̧ Yeesu gedu a dɔ̧ɔ̧r ha nuŋgɔ a ya̧a̧daanik du a Sodɔma hi Misra.

⁹Dood zaadɛ a zaadɛ teesdu anyɔ dɔ̧ɔ̧tya̧ fɔbɔ, a ya̧a̧boon du, a hɛbt lɛl wɔ hi gi ge sɛw hi gbɛn wɔrkya̧ ɔ̧t taarɛ hi yɔ̧ɔ̧sumɔ bi̧i̧l du, wɛɛ dood wɔrɔ hi ta̧a̧ an hi i̧i̧ wɔrkya̧ wɔ loor du gɛ.

¹⁰Anyɔ Bɛtya̧a̧kɛŋkya eerɛ wɔrɔ hi ha̧a̧n nɛ dood waal du ya̧a̧r gbɔɔltɔnɔ, dood wɔ hi waak a waal bɔ duge kpoosya̧ gi harihi a wɔrkya̧ bɔ zulɔ hage. Hí nànaabɔ, hin gi bɛsihi, hi gaatin gaasɛ.

¹¹Yɛrɛ yɔ kuudu ɔ̧t taarɛ hi bi̧i̧lɔ zaa du, Bɛt yaas segya ɔ̧ɔ̧ eerɛ wɔ holum za̧a̧tigya tal hi muul du hi rɛml hi ɗund hi erɔ, dood wɔ hi gbɛn hin bɔrɔ lab sɛw kol tuuhi.

¹²Kuudu Bɛtya̧a̧kɛŋkya wɔ hi eerɛ hi lag ya̧a̧ za boozihi bɛtha hi tɛŋko: a dɔɔzin hɛdi! Hi ɗundɔ hi dɔɔ bɛtha a kuus du, lɔlhɛ̧ɛ̧nikya wɔ hi gihi seeko.

¹³Yɔ a ɔ̧tɔ ge anbɔ hɛbt nam ha̧a̧ltɔnɔ; waal gbɔɔl bɔ bɛrkɔ za kooblɔ ɛ̧btiro, wɛɛ dood duk nɔɔn-erɛ (7.000) hi wɔrɔ. Dood zaadɛ wɔ hi za̧a̧, hoobha̧a̧hi hi ɗɔbs Bɛt yɔ gi bɛtha.

¹⁴Ya̧a̧rhant eesim bɔ tal gɔ, yɛrɛ ya̧a̧rhant taasum bɔ gi zaak nɔɔko.

¹⁵Bɛtwalsɛr nɔɔn-eesum bɔ ul pɔ̧rɔ. Ya̧a̧boon gbɔlɛ hi booy bɛtha mi lagɔ: a waar ums yɔ waal du wɛɛ gi Waar wɛ Bɛto hi Masihu ɔ̧ɔ̧ bɔ ya̧a̧nɛ. Bɛt wɛ waar umsɔ gi waa wɛlɛ hi wɛlɛ.

¹⁶Wɛɛ ɗɛntɛ yɔ̧ɔ̧lgbun daa nas wɔ hi ɗɔɔt a Bɛt muutdu a hi waar ums ɗɔɔtillɛlɛ hi wɛɛ hi zagl gi muutdu hí ɗɔbsig Bɛto, hí raako:

¹⁷a wi baanumɔ, Waar Bɛto Tɛŋkya-Sɛw, mɔ gi ɔ̧tigi zulɛ, mɔ da mɔ gi amntɔnɔ, wi baanumɔ anyɔ mɔ zuun tɛŋk mɔ gbɔɔlɛ, mɔ loo waar umsɛ,

¹⁸dood wɔ hɛbtdi hinnɔɔhi. Yɛrɛ nɔɔtig mɔ tuutu ma, wɛɛ ɔ̧tyɔ gɔ mɔ gbaas wɔrkɛ wɔ dɔgl du riiri, hi ɔ̧tyɔ gɔ mɔ gaa woosya mɔ ya̧a̧kɛŋkya wɔ hi dood gaatɛ mɔ wɔ sɛw, hi dood wɔ hoob gihi ha̧a̧k mɔya, an dood tɔs wɔ hi dood nabl wɔ sɛw dɔɔrɔɔsya̧, tuur ma. Ɔ̧tyɔ an gɔ mɔ ha̧tir dood wɔ hi ha̧tirgo hɛbt bɔ be tuur ma hɛw!

¹⁹Yɔ anbɔ, Bɛtlukɔ bɔ a bɛtha gboorɔ, hi ɗɛɛ an hi gbɛn ya̧a̧wɔk akɔti bɔ. Wɛɛ bɛlya̧bs ya̧bɔ, lɛl dɔntɔ, bɛl sɛɛya̧a̧, hɛbt namɔ, wɛɛ bɛlɓatir ha̧a̧l hi naŋgɔ.