Read Doyayo HINWƆ HI MITS YOHANA 12 Bible Online

HINWƆ HI MITS YOHANA 12 - Doyayo bible

HINWƆ HI MITS YOHANA 12

¹Hinza hinmɛɛnikya gbɔɔl midz bɛtha: nis za midɔ heg ɔ̧ti an gbandili a gi muulɛ, sɛɛ gi gi dɔɔ du, heg waar umskal yɔ hi katin hi sɛwaat koobl daa eer gi zulha.

²Gi nɛ buudu gi waa gulko. Waagulk bɔ ya̧a̧rhantɔ gig tɔk gi kaako, wɛɛ gi ook hi koltuun an gi gul waaɔ bɔ.

³Wɛɛ hinza dɔɔm hinmɛɛnikya mid a bɛtha: beksloorɛ hob gbɔɔlɛ hi zul nɔɔn-erɛ, hi gur kooblɛ hi waar ums kal a zul nɔɔn-er wɔ hage gbunu gbunu.

⁴Nams sa̧a̧nɔ gɛ̧ɛ̧n sɛwaat wɔ bɛtha lɛl taarɛ, wɛɛ lɛbtir zaadɛ wɔ sɛw bɛrkya̧ taasum wɔ hi sa̧a̧nɔ bɔ hi mɛlz hɛbtdi. Beksloorɛ bɔ er a nis bɔ gi gulk waa gi muutdu an gi i̧i̧ waaɔ bɔ gɔ gi gulige.

⁵Nis bɔ gul waaɔ wal bɔ gɔ gi wɛɛ waal wɔ hɛbtdi sɛw waar ya̧ gi oo doodya̧ hi sɔɔltusɛ. Yɔ anbɔ hi pɛɛr waaɔ bɔ hi dɔɔnig bɛtha a Bɛt ge hi da hi gbaag a Bɛt waar ums ɗɔɔtillɛlɛ.

⁶Nis bɔ nɔɔ rek hɛtdɔŋdu, Bɛt gɛmntsig lɛl hɔ, gaag lees ɔ̧t duk gbunu hi yɔ̧ɔ̧lɔ kooblɛ daatɔ dumbili nɔɔngbunu (1260).

⁷Yɔ anbɔ gabs ɗund gɔ bɛtha. Bɛtwalsɛrɔ za gbɔɔl nuŋgɔ a Misɛl hi walɛsɛrɛ ɔ̧ɔ̧ hi ɔks hi gɔ gabs hi beksloorɛ bɔ a bɛtha. Beksloorɛ bɔ ɔks hi walɛsɛrɛ ɔ̧ɔ̧ be a gabs bɔ gedu.

⁸Bɛtwalsɛrɔ gbɔɔl bɔ Misɛl hi walɛsɛrɛ ɔ̧ɔ̧ hi ɗɛɛ wɔrɔ ɗɛɛ. Beksloorɛ bɔ hi walɛsɛrɛ ɔ̧ɔ̧ hí wɛ̄ɛ̄ hí dāg tɛŋk ɗɔɔtig a bɛtha hɔ ma gɛ.

⁹Hi yarzig hɛbtdi. Gii gi beks amnti, nuŋgɔ a loorɛha̧a̧lɛ, zaa a Saydanu, gii gi maatig dood waal du sɛw. Hi yarzig hɛbtdi hi walɛsɛrɛ ɔ̧ɔ̧ wɔ sɛw lɛlgbunu.

¹⁰Mi lag ya̧a̧ za tɛŋkya booy a bɛtha: a yɛrɛ Bɛt yaaz za̧a̧tigɔ tuurɔ; zuun tɛŋkɔ hi waar umsɔ. Yɛrɛ Masihu ɔ̧ɔ̧ bɔ zuun waar umsɔ tɛŋk gɔ be. Ya̧a̧nɛ, za̧a̧nyɔ gi nɛ yɛ̧ɛ̧dɛ wɛ hingɛ̧ɛ̧nik a Bɛt muutdu yɛms du hi lurk du sɛw, hi bisig-bis ma.

¹¹Dood wɛ hi ɗɛɛgɗɛ hi Tamwaa bɔ ga̧a̧mɔ tɛŋkɔ, hi Yeesu dɔglyɔ hi boosig nɛ dood tɛŋkɔ. Hi wɛɛ hi ta̧a̧ an hi gaa kolya̧ hi wɔrɔ.

¹²Yɔ anbɔ, bɛtha, dagum hato, nɛɛ wɔ nɛ waak bɛtha, kpɛ̧ɛ̧nɛ. Yɛrɛ nɛɛ hɛbto hi mɛmbal gbɔɔlɛ, ya̧a̧rhant gisinɛ! Anyɔ hi bis loorɛha̧a̧l bɔ hɛbt di gi wɛɛ gi mɛɛ a ɔ̧t zɛ̧rsib tɔɔ gɛ, sil nɛɛge hi nɔɔtig ha̧a̧lɛ.

¹³Yɔ beksloorɛ bɔ gbɛn hi bidzig hɛbtdi anbɔ, yɛɛl nis bɔ mɔɔ waaɔ wal gii fɔbtugo.

¹⁴Hi hɛ̧ɛ̧s nis bɔ seereere gbɔɔl pakir eerɛ an gi wir beksloorɛ bɔ gi naandu gi ɗundin gi rek a lɛlyɔ gɔ hi lenig wɛl taarɛ hi sɛɛ nɔɔngbun ge a hɛtdɔŋ du.

¹⁵Beks bɔ wɛɛ wɛm mɛm gbɔɔl an mɛm yɔ gɔ tuu a zɛɛ gbɔɔl du an gi re gi tuur nis bɔ.

¹⁶Hɔnɛ hɛbt bɔ ɗaas nis bɔ aaya̧a̧ yɔ̧r mɛm gbɔɔl yɔ beksloorɛ bɔ wɛmɔ.

¹⁷Yɔ anbɔ, hinnɔɔ beksloorɛ bɔ hi nis bɔ, rek da gɔ gabs hi nis bɔ waatɔ zaadɛ wɔ, raakɔ a dood wɔ hi wa̧a̧k Bɛt dɔglɔ wɔ, wɔ hi book Yeesu dɔglɔ.

¹⁸Beksloorɛ bɔ wɛɛ da er gɔ a hɔ̧ɔ̧l ha a mɛmbal gbɔɔlya̧.