Read Doyayo HINWƆ HI MITS YOHANA 13 Bible Online

HINWƆ HI MITS YOHANA 13 - Doyayo bible

HINWƆ HI MITS YOHANA 13

¹Mi wɛɛ mi gbɛn namhɛtum ha̧a̧l za gi tuuzig a mɛmbal gbɔɔl du gin gur kooblɛ hi zul nɔɔn-erɛ. Hi heg waar umskal koobl a gurɔ wɔ hahi. Hi bi̧i̧ nuŋg ya̧a̧ha̧a̧lya Bɛt zulha a namhɛtum ha̧a̧l bɔ zulɔ wɔ hage nɔɔn-erɛ.

²Mi gbɛn namhɛtum ha̧a̧l bɔ hinɔ riitin an naam bakraki, dɔɔɔ wɔ hi riitin an namb za ha̧a̧l tɛsim yɔ gɔ hi el nuŋgɔ a kùmsyɔ; ya̧a̧ɔ du riitin an naamnɔɔ ɔnɛ. Beksloorɛ bɔ gaag tɛŋkɔ hi waar umsɔ ɗɔɔtillɛlɛ hi waar ums tɛŋk za gbɔɔlɛ.

³Mi gbɛn zulɔ zaabɔ an hi gbɔŋg nɛ gbɔmɔ; wɛɛ nɔkɔ bɔ wɔn nɛko ramɔ. Yɔ hin kɔms dood hɛbtdi sɛw gɛrsɛ, hi fɔ namhɛtum ha̧a̧l bɔ kuudu.

⁴Dood sɛw hi ɗɔbs beksloorɛ bɔ anyɔ hi gbɛn gi gaa namhɛtum ha̧a̧l bɔ kaz mɛmbal du tɛŋkɔ. Hi ɗɔbs namhɛtum ha̧a̧l bɔ hi wɛɛ hi warɔ: a bɔ riitin hi namhɛtum ha̧a̧l yɛrɛ nɔ? Bɔ rii an gi gɔtin gabs hi gii nɔ?

⁵Namhɛtum ha̧a̧l bɔ dag gbɔnɔ gɔ an gi pɛɛ zulɔ gi boo ya̧a̧ha̧a̧l a Bɛt zulha. Dag gbɔnɔ an gi wɛɛ gbɔɔl a dood zul ha sɛɛ dumbili nasɔ daatɔ eerɛ.

⁶Namhɛtum ha̧a̧l bɔ aaya̧a̧ an gi nii Bɛto, gi book ya̧a̧ha̧a̧l hi Bɛt nuŋgɔ hi ɗɔɔtillɛlɔ, hi wɔ hi ɗɔɔtig bɛtha sɛw.

⁷Wɛɛ dag tɛŋk an gi gɔ gabs hi Bɛt doodɔ gi ɗɛɛhi; dag tɛŋk a dood dɔ̧ɔ̧t zulha sɛw, a dood wɔ ya̧a̧boonya̧ gi sɔmsɔm hi zulha sɛw hi hɛbt sɛw.

⁸Dood wɔ hi ɗɔɔtig hɛbtdi sɛw, dood wɔ hi bı̧̄ı̧̄ nuŋgya̧ a Tamwaa bɔ hi gbɛɛrig nɛ gi za̧a̧tig ɗɛɛrwol bɔ gedu gɛ yɔ da baar nɛ a waalyɛɛliki, hí ɗɔbs namhɛtum ha̧a̧l bɔ ɗɔbsɔ.

⁹Za̧a̧nyɔ gi gin tɔnɛ gi kɛmɔ.

¹⁰Za̧a̧nyɔ gi an hi wà̧a̧g a gabs du, hi wà̧a̧g hi kaŋgkamɔ. Za̧a̧nyɔ gi an hi gbɔmnig daŋbɛsimi, hi gbɔmnig hi daŋbɛsimi; yɔ anbɔ, Bɛt doodɔ mɔ̧hi hinɛ hi Bɛt ɗɔbsigi.

¹¹Mi wɛɛ mi gbɛn namhɛtum ha̧a̧l za gi tuuzig hɛbtdi, gin gur eerɛ an tamwaa, wɛɛ booya̧a̧ an beksloorɛyɔ.

¹²Gi woonik namhɛtum ha̧a̧l biitir bɔ tɛŋkɔ bɔ sɛw a gi lɔlgbarɔ, wɛɛ fɛ̧ɛ̧ waal sɛw hi dood wɔ hi waak gedu hi ɗɔbs namhɛtum biitir nɔk ha̧a̧lya bɔ nɔkɔ ramɔ.

¹³Namhɛtum eesim bɔ tuus gɛrs gbɔlɛ. Sidz laa bɛtha a hɛbtdi a dood lɔlgbar sɛw.

¹⁴Maat dood wɔ hi waak hɛbtdi hi gɛrs wɔ dag gbɔnɔ an gi woon a namhɛtum biitir bɔ gi muutdu. Namhɛtum eesim bɔ raa dood waal du sɛw a hi wɔm hinza yɔ riitin an namhɛtum bɔ da ginnɛ daŋbɛsim nɔko gi wɛɛ gi za̧a̧ nɛko.

¹⁵Namhɛtum eesim bɔ dag tɛŋko an gi yaa holum za̧a̧tigya a namhɛtum biitir bɔ riitinsɔ hi wɔ̧m gedu an gi booya̧a̧ gi wɛɛ gi dag tɛŋk an gi raa hi gbɔm dood wɔ hi ta̧a̧g ɗɔbsig gɛ sɛw.

¹⁶Wɛɛ namhɛtum eesim bɔ fɛ̧ɛ̧ doodɛ, dood tɔs wɔ, dood gbɔlɛ, dood rɔɔsya hi ya̧a̧rya wɔ, dood wɔ hi taa gbaarɛ gɛ, hi gbaarɛ wɔ hi dag gbɛɛt a hi naanrɔbo, zaabe a hi ti̧i̧l du.

¹⁷Doo za gi taan gbɛɛtɔ gi muul gɛ, raakɔ a namhɛtum ha̧a̧l bɔ nuŋgɔ, zaabe nuŋgɔ hinɓɛrkya bɔ hi bi̧i̧, ɗɛ̄ɛ̄ an gi zeb hinza, zaabe gi zebr gɛ.

¹⁸Doo ginig hinmɛɛki an gi kɛm dɔgl yɛrɛ. Za̧a̧nyɔ gin zulɛ, ɗɛɛ an gi ɓɛr namhɛtum ha̧a̧l bɔ hinɓɛrkɔ bɔ. Hinɓɛrk bɔ gi a doo nuŋgo: gi tɛmɛrɛ nɔɔngbunu, daatɔ dumbili nɔɔngbunu daa nɔɔngbun be.