Read Doyayo HINWƆ HI MITS YOHANA 16 Bible Online

HINWƆ HI MITS YOHANA 16 - Doyayo bible

HINWƆ HI MITS YOHANA 16

¹Mi wɛɛ mi lag ya̧a̧ za booy hi tɛŋk a Bɛtluk du gi raak Bɛt walɛsɛrɛ nɔɔn-er wɔ: a silin hɛbtdi nɛ gub hinwɔ hi gi a Bɛt nɔɔtigɔ dak wɔ nɔɔn-er gedu!

²Bɛtwalsɛr doos bɔ sil gubz hinnɔɔtigya bɔ gi a dakɔ bɔ gedu a hɛbtdi. Yɔ anbɔ nɔk ha̧a̧l wɔ hi bɛr seek gɛ hi tuu a dood wɔ hi gin nambhɛtum bɔ gbɛɛtɔ hi muulɛ hi wɔ hi ɗɔbsig muulɔ bɔ hi wɔmɔ.

³Bɛtwalsɛr eesim bɔ sil hɛbtdi gubz hin bɔ gi dak du a mɛmbal gbɔɔl du. Mɛm wɛɛ zɛmr an wɔ̍rk za ga̧a̧mɛ. Hinza̧a̧til wɔ hi ginɛ a mɛmbal gbɔɔl bɔ gedu sɛw hi wɔrɔ.

⁴Wɛɛ kuudu Bɛtwalsɛr taasim bɔ sil hɛbtdi gub hin bɔ ginɛ gi dak du a zɛɛ wɔ hi du, hi mɛmzɔk wɔ hi du, mɛm wɔ hi wɛɛ ga̧a̧mɛ.

⁵Mi wɛɛ mi lag Bɛtwalsɛr bɔ gi mɛm zulya dɔgɔ: a Baa, mɔɔ gi Doo Gaati. Mɔ da mɔ gi amntɔnɔ hi nɛɛko. Mɔ gi Doo rɔbo a dɔgl-gbaak mɔ bɔ gedu.

⁶Anyɔ dood wɛrɛ hi gubr dood mɔ ga̧a̧mya̧ hi ya̧a̧kɛŋkya mɔ wɔ ga̧a̧mya̧, ya̧a̧nɛ mɔ yɔ̧nihi ga̧a̧mɛ. Hi dag hinyɔ rii nɛ an hi dag giya.

⁷Mi wɛɛ mi lag Bɛt-maaksɛŋk bɔ gi dɔko: a hɔɔ, anbɔ, Waar Bɛto Tɛŋkya-Sɛw, mɔ gi gbaak dɔgl rɔbo anyɔ rii.

⁸Kuudu Bɛtwalsɛr nasum bɔ rek da gubz hinyɔ gi a gi dak du a ɔ̧t muulɛ, wɛɛ hi gàà ɔ̧t bɔ gbɔnɔ an gi dɔ̧ɔ̧s dood hi laa.

⁹Ɔ̧t bɔ dɔ̧ɔ̧s dood wɔ, hi wɛɛ hi nii Bɛt nuŋgɔ yɔ gi ya̧a̧rhant wɔrɔ zulya̧. Hí tā̧ā̧ hin-ha̧a̧lya̧ ɔɔk an hi wɛɛ hi zɛmr kpoosya̧ a Bɛt ge hi gaag gbɔlums gɛ.

¹⁰Bɛtwalsɛr nɔɔntums bɔ siz gubz hinyɔ gi a gi dak du a nambhɛtum ha̧a̧l waar ums ɗɔɔtillɛl bɔ ge, lɛl bul gɔ a waar ums lɛl bɔ ge sɛw. Dood wɔ hi lak kosgumnɛ hi ɓalsig nuŋgya̧.

¹¹Yɔ kosgumn bɔ gihi tɔko hi nɔk ha̧a̧l wɔ, hi nii Bɛt yɔ gi a bɛtha; wɛɛ hā̧ā̧hi hin-ha̧a̧lya̧ ɔɔk an hi zɛmr kpoosya̧ gɛ.

¹²Bɛtwalsɛr nɔɔngbun bɔ sil gubz hinyɔ gi a gi dak du a zɛɛ gbɔɔl bɔ nuŋgɔ a Ofurata gedu. Mɛm bɔ duhɔ ɔ̧ɔ̧sa, zɛɛ bɔ kootɔ an waar ɛ gbɔlɛ wɔ a ɔ̧tkazigi hi dag gbɔnɔ daak gedu.

¹³Mi wɛɛ mi gbɛn loorɛ bɔbtin taarɛ hi gi an puli hi tuuzig a beksloorɛ bɔ gi ya̧a̧ du, hi nambhɛtum ha̧a̧l bɔ gi ya̧a̧ du, hi ya̧a̧kɛŋkɔya bɔ gi ya̧a̧ du.

¹⁴Loorɛ bɔbtin wɔrɔ hii gi loorɛha̧a̧l walɛsɛrɛ wɔ hi wookwoos gɛrsyaadɛ. Hi wɛɛ hi rek a waar ɛ gbɔlɛ wɔ hi gi waal du hi sɛw an hi mɔksihi hi gɔ nɔk a Bɛt Tɛŋkya-Sɛw ɔ̧tɔ bɔ gedu.

¹⁵(Yɛrɛ laginɛ! Be zaak an luuri. Hat gi a za̧a̧nyɔ gi lɔlɛ gi wɛɛ gi gbaak gbandilɔ rɔbtɔnɔ ge an bɔ gi ɛmb ɔ̧lɛ gi dag seem a dood muutdu. )

¹⁶Loorɛ bɔbtin wɔ hi mɔks waar ɛ gbɔlɛ wɔ a lɛlyɔ gɔ hi el nuŋgɔ a Ibraniŋko ya̧a̧boon du a Harmagedɔŋ ge.

¹⁷Bɛtwalsɛr nɔɔn-eesum bɔ gubz hinyɔ gi a gi dak du a bɛtha. Ya̧a̧ za booy hi tɛŋko a Waar ums ɗɔɔtillɛl bɔ ge a Bɛtluk du: a hinɔ da̧a̧da̧ ma!

¹⁸Bɛlya̧bs ya̧bɔ, lɛl dɔntɔ, bɛlya̧a̧sɛɛk gɔya, hɛbt nam ha̧a̧ltɔnɔ. Hɛbt nāmdir zaa anbɔ gɛ anyɔ dood hi yɛɛl tuuk waal du.

¹⁹Waal gbɔɔl mɔɔt bɔ gɛ̧ɛ̧y du taarɛ; waal gbɔlɛ wɔ hɛbtdi sɛw hi ɛ̧ɛ̧blɔ. Bɛt mɔk waal gbɔɔl bɔ gi Baabila gbɔɔl dɔglɔ, yɔ̧nig nɔɔtigɔ ha̧a̧l bumhob bɔ hi̧i̧s a dakwaa bɔ gaag gedu. Fɛ̧ɛ̧ge yɔ̧ da̧a̧sɔ.

²⁰Hɛbt wɔ mɛm rɔhi sɛw hi wagɔ, wɛɛ hi gbɛ̄n gol za ma gɛ.

²¹Bɛlɓatir naadɛ naadɛ hi naŋgz wɛɛha an bɛlɛ a dood muulɛ. Bɛlɓatir gbunu, ɗɔkɔ gi kilo dumbili nasɔ. Yɔ bɛl-ɓatir bɔ ya̧a̧rhantɔ zɛm dood anbɔ, anyɔ gi gi ya̧a̧rhant ha̧a̧l be, dood hi nii Bɛt nii.