Read Doyayo HINWƆ HI MITS YOHANA 17 Bible Online

HINWƆ HI MITS YOHANA 17 - Doyayo bible

HINWƆ HI MITS YOHANA 17

¹Hɔnɛ Bɛt walɛsɛrɛ nɔɔn-er wɔ hi wa̧a̧k nɛ dak nɔɔn-er wɔ ya̧a̧rhant gi du zaaya̧ gbun zaa raami: a zaamɔ, be goksum dɔgl yɔ gɔ hi gbaas nis gbɔɔl kaat ha̧a̧l bɔ ɗɔɔt a mɛmbal gbɔlɛ kitɛ dɔŋdi.

²Waar ɛ gbɔlɛ wɔ hɛbtdi hi naamans hi giya. Wɛɛ dood wɔ hi waak hɛbtdi hi wɔn mansɔ bumɛ.

³Bɛt Mɔkilɔ zaa zɛmr kol mi, Bɛtwalsɛrɔ ka̧m hɛtdɔŋ du, mi gbɛn niskaat bɔ kar a nambhɛtum za hob yɛl ha. Hi bi̧i̧ nuŋg ya̧a̧ha̧a̧lya a Bɛt zulha kittɔnɔ a nambhɛtum bɔ gi muulɛ, wɛɛ nambhɛtum bɔ gin zul nɔɔn-erɛ hi gur kooblɛ.

⁴Nis bɔ heg gbandil hob muulɛ hi zaa hob bɛlbɛl, root muulɔ hi root wɔ hi gɔn hɛɛlmɔto hi bet rɔbɛ wɔ gɔ hi woonik hinɛ, hi root za rɔbɛ wɔ. Gi wa̧a̧k dakwaa yɔ hi gɔn hɛɛlmɔto gi hi̧i̧s hi hinbɔbtin ɓi̧i̧lumya wɔ hi fu̧u̧ a mans-naakɔ ha̧a̧l bɔ gedu naan du.

⁵Nuŋg za dɔgl hinmɛɛkya dubt bi̧i̧y a gi ti̧i̧l du: a Baabila gbɔɔlɛ, a nɛɛd kaatɛ ha̧a̧l wɔ naaya̧ hi hinbɔbtin wɔ hi gi waal du naaɔ.

⁶Mi wɛɛ mi gbɛn nis bɔ yɔ̧ Bɛt doodɔ wɔ hi boo nɛ Yeesu dɔglɔ ga̧a̧mya̧ wɔnɔ anyɔ gɔ hi wɔnik bumɛ. Yɔ mi gbɛnig anbɔ hin wɛɛsim gɛrs gbɔɔltɔnɔ.

⁷Bɛtwalsɛr bɔ warimi: a nɔ gisum gɛrs wɛɛko? Ɔbe walksum nis bɔ hinmɛɛk dubt bɔ dɔglɔ hi nambhɛtum bɔ kar hage dɔglɔyɔ gin zul nɔɔn-erɛ hi gur kooblɛ.

⁸Nambhɛtum bɔ mɔ gbɛnɔ, da ginɛ za̧a̧tili amntɔnɔ, yɛrɛ ɓɔryɔ taaro, wɛɛ gi kazig a zɛŋk dubt ha̧a̧l bɔ gedu an gi re gi wagɔ. Dood wɔ hi waak hɛbtdi, dood wɔ nuŋgya̧ bi̧i̧y a za̧a̧tig ɗɛɛrwol du gɛ baar a waalyɛɛliki, gɔ hi gbɛn nambhɛtum bɔ, hin gi wɛɛsihi gɛrsɛ anyɔ da ginɛ za̧a̧til gi wɛɛ gi taa ɓɔryɔ gɛ; kuudu gi wɛɛ gi midza.

⁹An za̧a̧nɔ gin zulɛ hi hinmɛɛk dubti gi kɛm hin yɛrɛ. Zul nɔɔn-er wɔ hi gi gol nɔɔn-er wɔ nis bɔ gi ɗɔɔtig hage giya. Hii wɛɛ hi gi waar ɛ gbɔlɛ nɔɔn-er wɔ hɛw.

¹⁰Waar ɛ wɔ nɔɔn-erɛ, zaadɛya̧ nɔɔnɛ hi maatɔ, zaa gbunu gi ɗɔɔtig gi waar ums bɔ duge, zaaɔ be, zaadir gɛ. Gɔ gi zaa, taa an gi am a waar umsɔ bɔ gedu.

¹¹Nambhɛtum bɔ da gi nɛko, yɛrɛ ɓɔryɔ taaro, gii gi waar gbɔɔl gɛ̧ɛ̧simɛ, gii gigi gbun a nɔɔn-er wɔ hi teesdu, gi wɛɛ gi wagɔ.

¹²Gur koobl wɔ mɔ gbɛn be, hii gi waar ɛ kooblɛ; hí yɛ̄ɛ̄l ɗɔɔtig hi waar ums du ket gɛ. Gi an hi dag waar umsya̧ ɔ̧t kaasiwaanɔ hi nambhɛtum bɔ lɛlgbunu.

¹³Waar ɛ wɔ koobl sɛw hi gin mɔkilya̧ gbunu, hi gaa nambhɛtum bɔ tɛŋkya̧ hi gbɔlumsya̧.

¹⁴Hí gɔ nɔk hi Tamwaa bɔ. Wɛɛ Tamwaa bɔ gi ɗɛɛhi anyɔ gi ɗɛntɛ wɔ Ɗɛntya̧, anyɔ gi waar ɛ wɔ Waar ya̧; wɛɛ doodɔ hi gig fɔko hi gi dood wɔ Bɛt elihi, hi wɔ Bɛt sɛ̧ɛ̧hi hi wɔ hi waak ɗɔbsigi hi ɔ̄ɔ̄ dɔglɔ gɛ.

¹⁵Bɛtwalsɛr bɔ wɛɛ raami: a mɛm wɔ mɔ gbɛn nis kaat ha̧a̧l bɔ ɗɔɔt geha, hi gi hɛbtwaato hi dood saalɛ, hi dood hɛbt sɔmsɔm, hi ya̧a̧boon sɔmsɔm.

¹⁶Gur koobl wɔ mɔ gbɛnɔ, hi ɔks hi namhɛtum ha̧a̧l bɔ hi hɛ̧ɛ̧n nis kaat ha̧a̧l bɔ lɔlɛ; hí hodil wɔd wɔ gi gi muul sɛw hí ɔɔg ɔ̧lɛ; hi tɔb nambɔ hi wɛɛ hi dɔ̧ɔ̧sig laa du.

¹⁷Bɛt gii gaahi mɔkil kpoos du an hi woo hinyɔ ha̧a̧ giya, hi woo hi kpoosya̧ gbunu an hi wɛɛn waar umsya̧ bɔ hi tɛŋkya̧ bɔ a nambhɛtum ha̧a̧l bɔ ge gi tuur a ɔ̧tyɔ Bɛt dɔglɔ gɔ gi da̧a̧ gedu.

¹⁸Wɛɛ nis yɔ mɔ gbɛnige, gii gi waal gbɔɔl yɔ ɗɔɔt gi daar waar gbɔlɛ wɔ waal du.